இந்திய கடற்படை

சோமாலிய கடற் கொள்ளையர்கள்  61 பேரைகைது செய்தனர்

அரபிக் கடலில் இந்திய கடற்படையினர் மேற்கொண்ட அதிரடி நடவடிக்கையில், சோமாலிய கடற்கொள்ளையர்கள் 61 பேர் கைது செய்யப்பட்டனர். அவர்கள் பிடியில் இருந்த கப்பலும், அதிலிருந்த சிப்பந்திகள் 13 பேரும் மீட்கப்பட்டனர். அரபிக் கடல் பகுதியில் சோமாலிய கடற்கொள்ளையரின் அட்டகாசம் அதிகரித்ததையடுத்து, இந்திய கடற்படையினர் தீவிர கண்காணிப்பில் ஈடுபட்டு வருகின்றனர். இந்நிலையில், கடந்த 12ம் தேதி, அங்கு கண்காணிப்பு பணியில் ஈடுபட்டிருந்த கடற்படையினருக்கு, சோமாலிய கடற்கொள்ளையினர், மீன்பிடி கப்பல் ஒன்றை கடத்த திட்டமிட்டுள்ளதாக தகவல் கிடைத்தது. இதையடுத்து, ஐ.என்.எஸ். கல்பேனி என்ற போர்க் கப்பலில், கடற்படையினர் அங்கு விரைந்தனர். இந்தியாவின் மேற்கு கடற்கரையில் இருந்து, 600 கடல் மைல் தொலைவில் சந்தேகத்துக்கிடமான முறையில், ஒரு கப்பல் பயணித்துக் கொண்டிருந்ததை கண்டுபிடித்தனர். அந்த கப்பலை நெருங்கியதும், அதில் இருந்த கடற் கொள்ளையர்கள், இந்திய கடற்படை கப்பலை நோக்கி, துப்பாக்கியால் சுட்டு, தாக்குதல் நடத்தினர்.

இதையடுத்து, இந்திய கடற்படையினரும், அந்த கப்பலை நோக்கி தாக்குதல் நடத்தினர். இதில், கடற்கொள்ளையரின் கப்பலின் சில பகுதிகள் தீப்பிடித்தன. இதைத் தொடர்ந்து, அங்கு விரைந்து சென்ற கடற்படையினர், கப்பலில் இருந்த சோமாலிய கடற்கொள்ளையர் 61 பேரை கைது செய்தனர். கப்பல் சிப்பந்திகள் 16 பேர் மீட்கப்பட்டனர். கடற்கொள்ளையர்கள் வைத்திருந்த வேகா - 5 என்ற பெயர் கொண்ட கப்பல், கடந்தாண்டு டிசம்பரில் கொள்ளையர்களால் கடத்தப்பட்டது. அந்த கப்பலையும் கடற்படையினர் மீட்டனர். கைது செய்யப்பட்ட கொள்ளையர்கள் மும்பை அழைத்து வரப்பட்டனர். அவர்களிடம் விசாரணை நடந்து வருகிறது. இவ்வாறு கடற்படை வட்டாரங்கள் தெரிவித்தன.

இதற்கிடையே, கடந்த டிசம்பரில் சோமாலிய கடற்கொள்ளையரால் கடத்தப்பட்ட வங்கதேசத்துக்கு சொந்தமான கப்பல் ஒன்றும் விடுவிக்கப்பட்டதாக, அந்த கப்பலின் உரிமையாளர் தெரிவித்துள்ளார். கடற்கொள்ளை சம்பவம் குறித்து, ராணுவ அமைச்சர் அந்தோணி, நேற்று லோக்சபாவில் எழுத்து மூலம் அளித்த பதிலில்," கடந்த மூன்று ஆண்டுகளில் மட்டும், சோமாலிய கடற்கொள்ளையரால், 174 கப்பல்கள் கடத்தப்பட்டுள்ளன. லட்சத்தீவு கடற்பகுதியிலும் இதுபோன்ற சில சம்பவங்கள் நடந்துள்ளன' என, தெரிவித்துள்ளார்.