புலிகளும் கைவிட்டு விட்டது ஐயா கதி அதோகதிதான்

ம.தி.மு.க. உயர்நிலைக் குழுக் கூட்டம் சென்னையில் மார்ச் 19-ம் தேதி (சனிக்கிழமை) நடைபெறுகிறது. சட்டப்பேரவைத் தேர்தலில் அதிமுக அணியுடன் உள்ள உறவு குறித்து இந்தக் கூட்டத்தில் முடிவு எடுக்கப்படும் என்று எதிர்பார்க்கப்படுகிறது. கடந்த 2006 சட்டப்பேரவை தேர்தலில் இருந்து அ.தி.மு.க. அணியில் ம.தி.மு.க. இடம்பெற்று வருகிறது. இப்போது, அந்த அணியில் உள்ள கட்சிகளிலேயே நீண்ட காலம் அ.தி.மு.க.வுடன் தோழமைக் கட்சியாக உள்ள கட்சி ம.தி.மு.க.தான். எனினும், அ.தி.மு.க. அணியில் உள்ள பிற கட்சிகளுக்கெல்லாம் தொகுதிகள் ஒதுக்கப்பட்டுள்ள நிலையில், ம.தி.மு.க.வுக்கு இதுவரை தொகுதிகள் ஒதுக்கப்படவில்லை. மதிமுகவுக்கு ஒற்றை இலக்க எண்ணிக்கையில் தொகுதிகளை ஒதுக்க அதிமுக முன்வந்திருப்பதாகச் சொல்லப்படுகிறது.

2006-ல் 35 தொகுதிகளில் போட்டியிட்ட கட்சி இப்போது 10-க்கும் குறைவான தொகுதிகளில் போட்டியிடுவது என்பதை ஏற்றுக் கொள்ள முடியாது என மதிமுகவினர் கருதுகின்றனர். இருபதுக்கும் குறையாத எண்ணிக்கையில் தங்களுக்குத் தொகுதிகளை ஒதுக்க வேண்டும் என வலியுறுத்தி வருகின்றனர்.

கடந்த சில தினங்களாகவே இதுதொடர்பாக அதிமுக குழுவினருக்கும், மதிமுகவினருக்கும் இடையே பேச்சுகள் நடந்து வருகின்றன. இருந்தபோதிலும் மதிமுகவின் எதிர்பார்ப்புக்கு நெருக்கத்தில்கூட அதிமுக வரவில்லை என்பதால் மதிமுக தரப்பினர் வருத்தம் அடைந்துள்ளனர்.

தாங்கள் இல்லாவிட்டால் சுமார் 60 தொகுதிகளில் அதிமுகவின் வெற்றி வாய்ப்பு பாதிக்கப்படும் என்று மதிமுகவினர் கூறுகின்றனர். 2001 தேர்தல் முடிவு புள்ளிவிவரங்களை அவர்கள் மேற்கோள் காட்டுகின்றனர்.

அதிமுக அணியில் விஜயகாந்த் தலைமையிலான தே.மு.தி.க.வுக்கு 41 தொகுதிகள், மார்க்சிஸ்ட் கட்சிக்கு 12 தொகுதிகள், இந்திய கம்யூனிஸ்ட் கட்சிக்கு 10 தொகுதிகள் ஒதுக்கப்பட்டுள்ளன.

 இதுதவிர சிறிய கட்சிகள் சிலவற்றுக்கும் தொகுதிகள் கிடைத்துள்ளன.

 இந்த நிலையில் மதிமுகவை இழந்தால் வெற்றிக்கான வாக்குகளாக 5000 முதல் 10000 வரையில் வாக்கு இழப்பு ஏற்படும் என்பது மதிமுகவினரின் வாதம். எனவே, தங்களுக்கு கெüரவமான எண்ணிக்கையில் தொகுதி ஒதுக்காவிட்டால் தனித்தே போட்டியிடலாம் என கட்சி நிர்வாகிகள் கூறிவருகின்றனர்.

இந்தச் சூழ்நிலையில் கட்சியின் உயர்நிலைக் குழு கூட்ட அறிவிப்பை கட்சியின் பொதுச் செயலாளர் வைகோ வெளியிட்டுள்ளார்.  இது குறித்து கட்சியின் பொதுச் செயலாளர் வைகோ செவ்வாய்க்கிழமை வெளியிட்ட அறிக்கையில், ம.தி.மு.க.வின் மாவட்டச் செயலாளர்கள், ஆட்சிமன்றக் குழு, அரசியல் ஆலோசனைக் குழு, அரசியல் ஆய்வு மைய உறுப்பினர்கள் கலந்து கொள்ளும் கூட்டம் சென்னை, எழும்பூரில் உள்ள கட்சியின் தலைமை அலுவலகத்தில் வரும் 19-ம் தேதி (சனிக்கிழமை) நடைபெறும் என்று தெரிவித்துள்ளார்.

 சனிக்கிழமைக்கு முன்னதாகவே வேட்பாளர் பட்டியலை ஜெயலலிதா வெளியிட்டுவிடுவார் என எதிர்பார்க்கப்படுகிறது. தேர்தல் பிரசாரத்தையும்கூட ஜெயலலிதா அதற்குள் தொடங்கலாம் என்று தெரிகிறது. எனவே மதிமுக கூட்டம் நடக்கும் நாளுக்கு முன்னதாகவே, அந்தக் கட்சி அதிமுக அணியில் இடம் பெறுகிறதா இல்லையா என்பது தெரிந்துவிடும் என எதிர்பார்க்கப்படுகிறது.