ஜெயலலிதா - கருணாநிதி பிரசாரத்தில் சூடுபிடிக்கும் தமிழ்நாட்டின் தேர்தல் களம்

தி.மு.க. தலைவர் கருணாநிதி நேற்று முன்தினம் தனது தேர்தல் பிரசாரத்தை திருவாஷரூரில் தொடங்கி விட்டார். அ. தி. மு. க. பொதுச் செயலாளர் ஜெயலலிதா நேற்று திருச்சியில் தொடங்கினார். இரு கட்சி வேட்பாளர்களும் முழு வீச்சில் களமிறங்குவதால் தேர்தல் களம் சூடுபிடித்துள்ளது.  தமிழகம் மற்றும் புதுச்சேரி சட்டசபைத் தேர்தலுக்கு குறுகிய காலமே அவகாசம் இருந்ததால், கூட்டணிக்கான தொகுதிப் பங்கீட்டில் கட்சிகள் அவசரம் காட்டின. இதனால், அ.தி.மு.க.- தி. மு. க. இரண்டு கூட்டணிகளிலுமே சிக்கல் ஏற்பட்டது. எனினும் ம.தி. மு. க. விவகாரம் தவிர, அனைத்துச் சிக்கல்களும் தீர்க்கப்பட்டு, தொகுதிப் பங்கீடு, வேட்பாளர் பட்டியல் போன்றவை வெளியிடப்பட்டன.

இரு அணிகள் மட்டுமன்றி, பாரதிய ஜனதா மற்றும் ஐ. ஜே. கே. தலைமையிலான அணிகளிலும் வேட்பாளர் பட்டியல் வெளியிடப்பட்டுள்ளன. ஏற்கனவே பல வேட்பாளர்கள் மனுத் தாக்கல் செய்துவிட்டனர். நேற்று நல்ல நாள் என்பதால், தமிழக முதல்வர் கருணாநிதி அ. தி. மு. க. பொதுச் செயலர் ஜெயலலிதா, தே. மு. தி. க. தலைவர் விஜயகாந்த் உள்ளிட்டவர்களும், மற்ற வேட்பாளர்களும் மனுத்தாக்கல் செய்தனர்.

அ. தி. மு. க. தலைமை ஏற்கனவே பிறப்பித்த உத்தரவுப்படி, அனைத்து அ. தி. மு. க. வேட்பாளர்களும் நேற்றுக் காலை வேட்புமனுத் தாக்கல் செய்தனர். மனுத் தாக்கலுக்கு, 26ம் திகதி கடைசி நாள், மனுக்கள் பரிசீலிக்கப்பட்டு, அவற்றை மீளப்பெற 30ம்திகதி கடைசி நாள். எனவே இறுதி வேட்பாளர் பட்டியல், 30ம் திகதி வெளியாகிறது.

வாக்குப்பதிவுக்கு இன்னும், 20 நாட்கள் இருந்தாலும், ஏப்ரல் 11ம் திகதி பிரசாரத்தை முடிக்க வேண்டும். எனவே, இறுதி வேட்பாளர் பட்டியல் வெளியான பின் பிரசாரத்துக்கு 12 நாட்களே இருக்கும். அதற்குள் தலைவர்களது வருகை போன்றவற்றில் கவனம் செலுத்த வேண்டிய நிலையும் ஏற்படும். எனவே, இறுதி வேட்பாளர் பட்டியல் வெளியாவதற்காக காத்திருக்காமல், தீவிர பிரசாரத்தை தொடக்க, வேட்பாளர்கள் முடிவு செய்தனர்.

அவ்வாறு பிரசாரம் செய்தாலும், ஒவ்வொரு தொகுதியிலும் வீடு வீடாக வாக்காளர்களை சந்தித்து, பிரசாரம் செய்வதற்கான அவகாசமும் குறைவாகவே உள்ளது. தி. மு. க. தலைவர் கருணாநிதி, வேட்புமனு தாக்கல் செய்வதற்கு முன்னரே தனது பிரசாரத்தை, திருவாஷரூரில் தொடக்கிவிட்டார்.

ஸ்ரீரங்கம் தொகுதியில், வேட்புமனு தாக்கல் செய்த ஜெயலலிதா, தேர்தல் அறிக்கையையும் வெளியிட்டார். தனது தொகுதியில் பிரசாரத்தைத் தொடங்கும் அவர், தொடர்ந்து தமிழகம் முழுவதும் சூறாவளி சுற்றுப்பயணம் மேற்கொண்டு அ.தி. மு. க. கூட்டணி வேட்பாளர்களுக்கு ஆதரவு திரட்டுகிறார்.

தலைவர்களது பிரசாரம் மட்டுமன்றி, திரைப்பட நட்சத்திரங்கள் மற்றும் முக்கிய நிர்வாகிகள் பிரசாரமும் இன்று முதல் தொடங்கின. கருணாநிதியின் உடல் நிலையைக் கருத்தில் கொண்டு மத்திய அமைச்சர் அழகிரியும், துணை முதல்வர் ஸ்டாலினும் தான் தி. மு. க. கூட்டணி பிரசாரத்தை தோளில் சுமக்க உள்ளனர்.

காங்கிரஸை பொறுத்தவரை, மத்திய அமைச்சர்கள் சிதம்பரம், வாசன் போன்றோர் பாராளுமன்றக் கூட்டத் தொடரிலும் கலந்துகொள்ள வேண்டியுள்ளதால், விடுமுறை நாட்களில் தீவிர பிரசாரம் செய்யவுள்ளனர்.

அ.தி. மு. க. அணியில் உள்ள கூட்டணிக் கட்சித் தலைவர்களாக விஜயகாந்த், தா. பாண்டியன், ராமகிருஷ்ணன் உள்ளிட்டவர்கள் ஜெயலலிதாவுடன் ஒரே மேடையில் பிரசாரம் செய்வார்களா என்ற எதிர்பார்ப்பு எழுந்துள்ளது. தொகுதிப் பங்கீட்டில் ஏற்பட்ட மனவருத்தங்களை சரிசெய்து, தொண்டர்களை தீவிர களப்பணியாற்ற வைக்க, இந்த ஒரே மேடை பிரசாரம் உதவும் என்று நிர்வாகிகள் நம்புகின்றனர்.

ஆளுக்கு ஒரு திசையாகச் சென்றால், நிறைய மக்களைச் சந்திக்கலாம் என்ற சிந்தனையும் அந்தக் கூட்டணியில் உள்ளது.

இவ்வாறாக சட்டசபைத் தேர்தல் திருவிழா கோலாகலமாகத் தொடங்கிவிட்டது. வாக்காளர்களைக் கவர வாக்குறுதி மழை பொழியப் போகிறது என்பது திண்ணம்.