இலங்கை அணி இறுதி போட்டிக்கு தெரிவு விடைபெற்றார் முரளி

கடைசி பந்தில் விக்கெட் வீழ்த்தி தனது சொந்த மண் ணில் விடை பெற்றார் இலங்கை நட்சத்திர வீரர் முத்தையா முரளிதரன். இந்த உலகக் கிண்ண போட்டியுடன் சர்வதேச கிரிக்கெட்டில் இருந்து ஓய்வு பெறும் முத்தையா முரளிதரன் நேற்று அரையிறுதியில் தனது சொந்த மண்ணில் விளையாடி னார். ஆர் பிரேமதாச மைதானத்தில் நேற்று நடந்த நியூஸிலாந்துக்கு எதிரான போட்டியில் முரளி தனது 10 ஓவர்களுக்கும் 42 ஓட்டங்களை கொடுத்து 2 விக்கெட்டுகளை வீழ்த்தினார். இதில் அவர் தனது சொந்த மண்ணில் வீசிய கடைசி பந்தில் ஸ்கொட் ஸ்னரிஸை எல்.பி.டபிள்யூ. முறை யில் வீழ்த்தியமை குறிப்பிடத்தக்கது. இதேபோன்று முரளி டெஸ்ட் கிரிக்கெட்டிலும் தனது கடைசி பந்துக்கு விக்கெட் வீழ்த்தியமை குறிப்பிட்டத்தக்கது.

இதன்படி முரளி தனது சொந்த மண்ணில் 109 ஒருநாள் போட்டிகளில் விளையாடி 154 விக்கெட்டுகளை வீழ்த்தியுள்ளார். எனினும் அவர் சொந்த மண்ணில் அதிக விக்கெட்டுகள் வீழ்த்தியோர் வரிசையில் 4 ஆவது இடத்தையே பிடித்தார். இந்த சாதனை பட்டியலில் தென்னாரிபிக்க முன்னாள் வீரர் ஷோன் பொலக் 193 விக்கெட்டுகளுடன் முதலிடத்தை தக்கவைத்துக்கொண்டுள்ளார்.

அடுத்து வரும் சனிக்கிழமை நடைபெறவுள்ள உலகக் கிண்ண இறுதிப் போட்டியில் முரளி விளையாடவுள்ளார். இதுவே அவர் கிரிக்கெட் வாழ்க்கையில் விளையாடும் கடைசி ஆட்டமாகவும் அமையவுள்ளது.

நியூசிலாந்தை 5 விக்கெட்டுக்களால் வீழ்த்தி

இறுதிப் போட்டியில் இலங்கை அணி

நியூஸிலாந்துடனான அரையிறுதியில் 5 விக்கெட்டுக்களால் வெற்றியீட்டிய இலங்கை அணி உலகக் கிண்ண இறுதிப்போட்டியில் விளையாட மீண்டும் ஒருமுறை தகுதிபெற்றது. இதன்படி வரும் சனிக்கிழமை மும்பை வென்கட் அரங்கில் நடைபெறவுள்ள இறுதிப் போட்டியில் இலங்கை அணி விளையாடவுள்ளது. இன்று நடைபெறும் இந்திய - பாகிஸ்தான் அணிகளுக்கு இடையிலான இரண்டாவது அரையிறுதியில் வெற்றிபெற்ற அணியுடன் கிண்ணத்தை வெல்வதற்காக இலங்கை மோதும். இலங்கை அணி இதற்கு முன்னர் 1996 மற்றும் கடந்த 2007 ஆம் ஆண்டு உலகக் கிண்ண இறுதிப் போட்டிக்கு முன்னேறியது. இதில் 1996 ஆம் ஆண்டு தொடரில் அவுஸ்திரேலியாவை வீழ்த்தி உலகக் கிண்ணத்தை வென்றது.

கொழும்பு ஆர் பிரேமதாச மைதானத்தில் நேற்று நடந்த அரையிறுதிப் போட்டியில் 218 ஓட்டங்கள் பெற்றால் வெற்றி எனப் பதிலெடுத்தாடிய இலங்கை அணிக்கு உப்புல்தரங்க, டில்சான் ஆகியோர் ஆரம்பத் துடுப்பாட்ட வீரர்களாக களமிறங்கினர். உப்புல் தரங்க 31 பந்துகளை எதிர்கொண்டு 4 பெளண்டரி மற்றும் ஒரு சிக்சர் அடங்கலாக 30 ஓட்டங்கள் பெற்ற போது செளத்தியின் பந்தில் ரைடரிடம் பிடிகொடுத்து ஆட்டமிழந்தார்.

பின்னர் டில்சானுடன் ஜோடி சேர்ந்த அணித்தலைவர் சங்கக்கார இனைந்தார். இருவரும் 2 வது விக்கெட்டுக்காக 120 ஓட்டங்களைக் குவித்தனர். டில்சான் 93 பந்துகளை எதிர்கொண்டு 10 பெளன்டரி, மற்றும் ஒரு சிக்சர் அடங்கலாக 73 ஓட்டங்களைப் பெற்றபோது ஆட்டமிழந்தார்.

பின்னர் நம்பிக்கை நட்சத்திரமாக கருதப்பட்ட மஹேல ஜயவர்தன 3 பந்துகளை எதிர்கொண்டு ஒரு ஓட்டம் பெற்ற போது ஆட்டமிழந்து சென்றார். பின்னர் அணித் தலைவர் சிறப்பாக ஆடிக்கொண்டு இருக்கையில் 54 ஓட்டங்களுக்கு ஆட்டமிழந்து சென்றார். அவர் 79 பந்துகளை எதிர்கொண்டு 7 பெளன்டரி உட்பட ஒரு சிக்சரைப் பெற்றார்.

இதேவேளை இப்போட்டியைக் கண்டுகளிப்பதற்காக ஜனாதிபதி மஹிந்த ராஜபக்ஷ அவர்கள் மைதானத்திற்கு வருகை தந்து இலங்கை வீரர்களை உட்சாகப்படுத்தினார்.

உலகக் கிண்ணப் போட்டியில் திலகரத்ன டில்சான் 467 ஓட்டங்களைப் பெற்று அதிக ஓட்டங்கள் பெற்ற வரிசையில் முதலிடத்தில் உள்ளார். இதேவேளை அணித்தலைவர் குமார் சங்கக்கார 417 ஓட்டங்களைப் பெற்று 2வது இடத்தில் உள்ளார்.

நியூசிலாந்த அணி நேற்றைய போட்டியில் 6 தடவை அரையிறுதிப் போட்டிக்கு தெரிவாகி 6 தடவையும் தோல்வியைத் தழுவியது குறிப்பிடத்தக்கது.

கொழும்பு பிரேமதாச மைதானத்தில் இலங்கை அணி 83 போட்டிகளில் விளையாடி 51 போட்டிகளில் வெற்றியீட்டியுள்ளது.

அத்துடன் 5 விக்கெட்டுக்காக இணைந்த சாமர சில்வா 25 பந்துகளை எதிர்கொண்டு 2 பெளன்டரியுடன் 13 ஓட்டங்களுக்கு ஆட்டமிழந்து சென்றார். அப்போது அணியின் ஓட்ட எண்ணிக்கை 185 ஆகும். பின்னர் திலான் சமரவீரவுடன் இணைந்த அஞ்சலோ மெத்திவ்ஸ் அபாரமாக ஆடி 18 பந்துகளை எதிர்கொண்டு ஒரு சிக்சர், ஒரு பெளன்டரியுடன் 14 ஓட்டங்களையும், சமரவீர 38 பந்துகளை எதிர்கொண்டு 2 பெளன்டரி உட்பட 23 ஓட்டங்களை ஆட்டமிழக்காமல் பெற்றார்.

இலங்கை அணி 47.5 ஓவர்களில் 220 ஓட்டங்களைப் பெற்று 5 விக்கெட்டால் வெற்றியீட்டியது. நியூசிலாந்து அணி 5 விக்கெட்டால் தோல்வியைத் தழுவி 6 வது தடவை அரையிறுதியில் தோற்ற அணியாக இடம்பிடித்துக் கொண்டது.

பந்து வீச்சைப் பொறுத்தவரை செளத்தி 3 விக்கெட்டையும், விட்டோரி, மெக்காஸ் ஆகியோர் தலா ஒரு விக்கெட்டையும் பதம் பார்த்தனர்.

இப்போட்டியிகள் ஆட்ட நாயகனாக சங்கக்கார தெரிவானார்.

உலகக் கிண்ண முதலாவது அரையிறுதிப் போட்டியில் முதலில் துடுப்பெடுத்தாடிய நியூசிலாந்து அணி 48.5 ஓவர்கள் முடிவில் சகல விக்கெட்டுகளையும் இழந்து 217 ஓட்டங்களைப் பெற்றது.

நியூசிலாந்து அணியின் ஸ்கொட் ஸ்டைரிஸ் தனியாளாக நின்று 57 ஓட்டங்கள் பெற்றார்.

இலங்கை - நியூசிலாந்து அணிகளுக்கிடையிலான போட்டி நேற்று கொழும்பு ஆர். பிரேமதாஸ மைதானத்தில் இடம்பெற்றது. இப்போட்டியில் நாணயச் சுழற்சியில் வெற்றியீட்டிய நியூசிலாந்து அணித் தலைவர் தனது அணி முதலில் துடுப்பெடுத்தாடும் என அறிவித்தார். அதற்கு இணங்க அவ்வணியில் ஆரம்பத் துடுப்பாட்ட வீரர்களாக மாட்டின்குப்தில், பிரன்டம் மெக்கலம் ஆகியோர் களமிறங்கினர்.

மெக்கலம் 21 பந்துகளை எதிர்கொண்டு 21 பெளண்டரிகள், ஒரு சிக்சர் அடங்கலாக 13 ஓட்டங்கள் பெற்றபோது ரங்கன ஹேரத்தின் பந்தில் போல்ட் ஆனார். அப்போது நியுசிலாந்து அணியின் ஓட்ட எண்ணிக்கை 32 ஆகும். பின்னர் குப்திலுடன் இணைந்த ஜெசிரைடர் இருவரும் சற்று நிதானமாக ஆடிக்கொண்டிருந்தபோது முரளிதரனின் பந்தில் விக்கெட் காப்பாளர் சங்கக்காரவிடம் பிடிகொடுத்து ரைடர் 34 பந்துகளை எதிர்கொண்டு 3 பெண்டரி உட்பட 19 ஓட்டங்கள் பெற்றார்.

அப்போது அணியின் ஓட்ட எண்ணிக்கை 69 ஓட்டங்களாகும். குப்தில் 39 ஓட்டங்களுக்கு ஆட்டமிழந்தார். பின்னர் டைலருடன் ஜோடி சேர்ந்த ஸ்டைரிஸ் ஆகியோர் இணைந்து 4வது விக்கெட்டுக்காக 77 ஓட்டங்களை இணைப்பாட்டமாக பெற்று சரிவிலிருந்த அணியை மீட்டெடுத்த வேளை டைலர் மென்டிசின் பந்து வீச்சுக்கு உப்புல் தரங்கவிடம் பிடி கொடுத்து ஆட்டமிழந்தார்.

அவர் 55 பந்துகளை எதிர்கொண்டு ஒரு பெளண்டரியுடன் 36 ஓட்டங்களைப் பெற்றார்.

பின்னர் ஸ்டைரிசுடன் இணைந்த இளம் துடுப்பாட்டவீரர் வில்லியம்சன் 14 பந்துகளை எதிர்கொண்டு 3 பெளண்டரிகள் அடங்கலாக 22 ஓட்டங்களைப் பெற்றார்.

அப்போது அணியின் ஓட்ட எண்ணிக்கை 192 ஆகும். பின்னர் 6வது விக்கெட்டுக்காக நியுசிலாந்து அணியின் சுழற்பந்து வீச்சாளர் நதன் மெக்கலம் ஸ்டைரிசுடன் இணைந்துகொண்டார்.

இதேவேளை இப்போட்டியில் முத்தையா முரளிதரன் விளையாடமாட்டார் அவருக்கு காயம் என்று ஊடகங்கள் செய்தி வெளியிட்டாலும் அவர் நேற்றைய போட்டியில் களமிறங்கினார்.

இலங்கை அணி சார்பாக இந்தப் போட்டியிலும் 3 சுழற்பந்து வீச்சாளர்கள் களமிறங்கினர். இது இலங்கை அணிக்கு ஒரு வகையில் சாதகம் என்று கூறலாம்.

நியூசிலாந்து அணி முதலாவது பவர்பிளேயில் ஒரு விக்கெட்டை இழந்து 38 ஓட்டங்களையும், இரண்டாவது பவர் பிளேயில் 22 ஓட்டங்களையும் பெற்றது.

3வது பவர் பிளேயில் 42 ஓட்டங்களையும் 2 விக்கெட்டுகளையும் இழந்தது. இதேவேளை முத்தையா முரளிதரன் நேற்றைய போட்டியுடன் உலகக் கிண்ணப் போட்டியில் 68 விக்கெட்டை வீழ்த்தினார்.

மெக்கலம் அதிரடியாக ஆட நினைக்கையில் மலிங்கவின் பந்தில் விக்கெட் காப்பாளரிடம் பிடி கொடுத்து ஆட்டமிழந்தார். அவர் 9 பந்துகளை எதிர்கொண்டு 9 ஓட்டங்களைப் பெற்றார். இவர் ஒரு சிக்சர் அடித்தார்.

சிறப்பாகவும் நன்றாகவும் விளையாடிக்கொண்டிருந்த ஸ்டைரிஸ் 76 பந்துகளைக எதிர்கொண்டு 5 பெளண்டரிகள் அடங்கலாக 57 ஓட்டங்களைப் பெற்று ஆட்டமிழந்தார். அப்போது அணியின் ஓட்ட எண்ணிக்கை 213 ஆகும். இதேவேளை பின்னர் வந்த வீரர்கள் சார்பாக இலங்கை வீரர்களின் பந்துகளை எதிர்கொள்ள முடியாமல் ஆட்டமிழந்தனர்.

நியூசிலாந்து அணியில் கடை 5 விக்கெட்களும் 25 ஓட்டங்களுக்கு வீழ்த்தப்பட்டது. பந்து வீச்சைப் பொறுத்தவரை மலிங்க, மெண்டிஸ் தலா 3 விக்கெட்டையும் முரளிதரன 2 விக்கெட்டையும் டில்சான், ஹேரத் ஆகியோர் தலா ஒரு விக்கெட்டையும் வீழ்த்தினர்.

இதேவேளை முத்தையா முரளிதரன் இலங்கையில் விளையாடும் கடைசிப் போட்டி என்பதால் அவர் கடைசி ஓவரின் கடைசி பந்தில் ஒரு விக்கெட்டை வீழ்த்தி ரசிகர்களுக்கு அந்த விக் கெட்டை பரிசாக வழங்கி பிரியாவிடை பெற்றுச் சென்றார்.