ஐ.நா. மனித உரிமைப் பேரவை அமர்வில் ஐரோப்பிய ஒன்றியம், ரஷ்யா எதிர்ரெதிர் நிலைப்பாடு

கற்றுக்கொண்ட பாடங்கள் மற்றும் நல்லிணக்கத்துக்கான ஆணைக்குழுவின்  பரிந்துரைகளை முழுமையாக அமுல்படுத்துமாறு இலங்கையை ஊக்குவிக்க வேண்டுமென ஐ. நா.   மனிதஉரிமைகள்   பேரவையிடம்  ஐரோப்பிய ஒன்றியம் தெரிவித்திருக்கிறது. ஐ.நா. மனிதஉரிமைகள் பேரவை அமர்வில் ஐரோப்பிய ஒன்றியத்தின்  சார்பில்  உரையாற்றிய டென்மார்க்கின்  வெளிவிவகார அமைச்சர்  வில்லி சவுண்டாப்  நிபுணர் குழுவின்  அறிக்கை தொடர்பாக ஐ. நா. வுடன் நடவடிக்கைகளில் ஈடுபடுமாறு  இலங்கைக்கு கூறப்பட வேண்டும் என்று தெரிவித்துள்ளார்.

இதேவேளை நாடுகளை நல்லவையெனவும் தீங்கானவையெனவும் பிளவு படுத்துவதற்கும்  அரசியல்  அழுத்தத்திற்கான கருவியாகப் பயன்படுத்துவதற்கும்  ஐ. நா.  மனிதஉரிமைகள் பேரவையை மாற்றுவதற்கான முயற்சிகளுக்கு  ஆதரவளிக்க முடியாது என்று ரஷ்யா கூறியுள்ளது.

ஐ.நா. மனித உரிமைகள் பேரவை அமர்வில் நேற்று புதன்கிழமை உரையாற்றிய ரஷ்ய பிரதி வெளிவிவகார அமைச்சர் கென்னடி காட்டிலோவ் இந்த  கருத்தை தெரிவித்திருக்கிறார்.
ஐ.நா.  வின் பிரதான மனித உரிமைகள் அமைப்பை அரசாங்கங்களுக்கிடையிலான  தன்மை கொண்டதாக மாற்றும் முயற்சிகளுக்கு சரியான ஆதரவு  அளிக்காது  என்று  அவர்  கூறியுள்ளார்.

நாம் எதிர்பார்க்கின்ற சில  விடயங்களில்  சர்வதேச  பரிமாணத்தின்  அடிப்படையிலேயே மனித உரிமை விவகாரங்கள் பொதுவாகப் பயன்படுத்தப்படுகின்றன. ஆனால்  மனித உரிமைகள்  விவகாரத்தை  கணிசமான  நாடுகள் அழுத்தத்துக்கான  கருவியாக பயன்படுத்தும்   கலந்துரையாடலில் ஈடுபடுகின்றன. மனித உரிமை விடயங்களைப் பிரத்தியேகமான முறையில்   எவரும் தமது  கட்டுப்பாட்டுக்குள்   கொண்டிருக்க  முடியாது என்று ரஷ்யா நம்புகிறது. 

உள்நாட்டு மோதல்களில்  ஒரு தரப்புக்கு ஆதரவாக  வெளிமட்ட ஆயுதத் தலையீட்டை ரஷ்யா   திட்டவட்டமாக  எதிர்க்கிறது.  மனிதஉரிமை மீறல்களை தண்டிக்கப்படாமல்   விட்டுச்   செல்லக் கூடாது. ஆனால்  மனிதஉரிமைகள் என்ற போர்வையில்   நடவடிக்கைகள்  மேற்கொள்ளப்பட்டு அவை பாரிய அளவில்   பொது மக்கள் மரணங்கள்    உட்பட பாரிய மனிதஉரிமை மீறல்களுக்கு வழிவகுப்பதாக இருக்கக் கூடாது என்று அவர்  கூறியுள்ளார்.