உருத்திரகுமாரின் நிகழ்ச்சி நிரலுக்கு அமைவாகவே அமெரிக்காவின் செயற்பாடுகள்  - அமைச்சர் வீரவன்ச

விடுதலைப்புலிகளின் சர்வதேச தலைவராகச் செயற்பட்டுவரும் உருத்திரகுமாரின் நிகழ்ச்சி நிரலுக்கேற்பவே அமெரிக்கா செயற்படுவதாக குற்றம் சாட்டிய அமைச்சர்  விமல் வீரவன்ச, இலங்கையில் புலிகளின் செயற்பாட்டை ஊக்குவிக்கவே அமெரிக்கா முயற்சிப்பதாகவும் கூறியதுடன், தமது நிலைப்பாட்டில் இருக்கும் உருத்திரகுமாரை அமெரிக்கா இதுவரையில் ஏன் கைது செய்யவில்லை எனவும் கேள்வியெழுப்பியுள்ளார். பத்தரமுல்லையில் தேசிய சுதந்திர முன்னணியின் அலுவலகத்தில் அவர் வெள்ளிக்கிழமை நடத்திய ஊடகவியலாளர் மகாநாட்டில் பேசுகையிலேயே மேற்கண்டவாறு தெரிவித்தார். அவர் இங்கு மேலும் கூறுயதாவது ;
அமெரிக்கா விடுதலைப்புலிகளுக்கு சக்தியளித்து அதன் செயற்பாடுகளை இலங்கையில் ஊக்குவிக்க முயல்கிறது. புலிகள் அமைப்பின் சர்வதேச  வலையமைப்பு தலைவராக உருத்திரகுமார் இருக்கின்றார். இவரை அமெரிக்கா பயங்கரவாதத் தடுப்புச் சட்டத்தின் கீழ் கைது செய்யாமல் இருக்கின்றது. இதற்கான காரணமென்ன ? அவர் பல பயங்கரவாத செயற்பாடுகளுடன் சம்பந்தப்பட்ட குற்றவாளி. அவரின் நிகழ்ச்சி நிரலுக்கே அமெரிக்கா இயங்கி வருவதுடன், பாதுகாப்பதன் மூலம் புலிகளுக்கு சக்தியளித்து இலங்கையில் அதன் செயற்பாட்டை ஊக்குவிக்க முயல்கிறது  என்பதும் தெளிவாகின்றது.
இறுதி யுத்தத்தின் போது விடுதலைப் புலிகள் மூன்று இலட்சம் தமிழ் மக்களை மனிதக் கேடயமாக வைத்திருந்தனர். இந்நிலையில் படையினர் அவர்களை மீட்டு பராமரித்து  பாதுகாப்பு அளித்தனர். இதற்காகவே அமெரிக்கா இலங்கைக்கு எதிராக மனித உரிமை மீறல் என்ற பிரேரணையை கொண்டுவந்துள்ளது. ஐ . நா. வின் ரோம் உடன்படிக்கை 1998 ஆம் ஆண்டு ஏற்படுத்தப்பட்டு இலங்கைக்கு 2002 ஆம் ஆண்டில் கொண்டு வரப்பட்டது. இதில் தான் கையழுத்திடவில்லையென ரணில் விக்கிரமசிங்க கூறுகின்றார். இதற்கும் அவருக்கும் எந்த சம்பந்தமில்லை எனில் அச்சமயம் ஜனாதிபதியாக சந்திரிகா பண்டார நாயக்க இருந்தார். அவரே எல்லா ஒப்பந்தங்களிலும் கையெழுத்திடும் அதிகாரம் உள்ளதால் அவருக்கே இப்புகழ் செல்ல வேண்டும். இதனை ரணில் விக்கிரமசிங்க தனதாக்க முற்படுகின்றார். சூடான் நாடும் ரோம் உடன் படிக்கையில் கையெழுத்திடவில்லை. எனினும் போர்க் குற்றம் தொடர்பில் தண்டனை நிறைவேற்றப்பட்டது என்பதை ஞாபகப்படுத்துகின்றேன்.
கற்றுக் கொண்ட பாடங்கள் மற்றும் நல்லிணக்க ஆணைக்குழு ஜனாதிபதியால் நடைமுறைப்படுத்தப்பட்டது. அதன் பரிந்துரையில் குறிப்பிட்டவர்களுக்கு கடுமையான தண்டனைகள் வழங்கப்பட மாட்டாது. அமெரிக்காவில் படைத்தளபதிக்கு பதவி இறக்கம் போன்ற தண்டனையே அளிக்கப்பட்ட தொன்றே இங்கும் வழங்கப்பட முடியும். அண்மையில் இலங்கை வந்த அமெரிக்காவின் மரியோ ஒட்டாரே பாதுகாப்புச் செயலாளருடனான  சந்திப்பின் போது    வடக்கில் இராணுவ முகாம்களை அகற்றுமாறு  கூறிச் சென்றுள்ளார். வடக்கில் மட்டுமல்ல நாடு பூராகவும் சகல இடங்களிலும் இராணுவ முகாம் உள்ள நிலையில் இவர் இவ்வாறு கூறுவதற்கு காரணம் யுத்தத்தை எதிர்காலத்தில்  நாட்டில் ஏற்படுத்துவதற்கேயாகும். லிபியா, சிரியா போன்று ஆசியாவுக்குள் ஏற்படுத்துவதற்கு இலங்கையைக் கேந்திரமாகப் பாவிப்பதற்கே அமெரிக்கா முற்படுகிறது. மன்னார், திருகோணமலையிலுள்ள எண்ணெய் வளங்களை சூறையாடுவதே அமெரிக்காவின் இலக்காகும்.
நீர்கொழும்பில் எரிபொருள் விலையேற்றத்துக்காக மீனவர்கள் ஆர்ப்பாட்டத்தை மேற்கொண்டனர். இதன் பின்னணியில் அரச சார்பற்ற நிறுவனமொன்று  உள்ளது. நாட்டின் ஏனைய பகுதியில் மீனவர் ஆர்ப்பாட்டம் செய்யாத நிலையில் நீர்கொழும்பில் ஆர்ப்பாட்டம் இடம்பெற்றுள்ளது. கொழும்பிலுள்ள  மேற்கு நாடுகளின் தூதுவராலயங்கள் அரச சார்பற்ற நிறுவனங்கள் ஊடாக டொலர் வழங்கியுள்ளதென தெரியவருகின்றது.
இவ்வாறான நிலையில் எதிர்க் கட்சியினர் அரசாங்கத்தை  கவிழ்ப்பதற்கு முற்படுகின்றனர். எண்ணெய் விலை அதிகரிப்பு தொடர்பில் பாராளுமன்றத்தைக் கூட்டுமாறு எதிர்க் கட்சித் தலைவர் ரணில் விக்கிரமசிங்க மற்றும் ஜே. வி. பி. யின் அநுரகுமார திஸாநாயக்க கூறியுள்ளனர். பாராளுமன்றத்தைக் கூட்டுவதன் மூலம் எண்ணெய் விலை குறையுமா ?