வட, கிழக்கில் இராணுவ பிரசன்னத்தை குறைக்க நடவடிக்கை - கோதாபய ராஜபக்ஷ

வடக்குக் கிழக்குப் பகுதிகளில் இராணுவத்தின் பிரசன்னத்தைக் குறைப்பதற்கான முயற்சிகளில் அரசாங்கம் ஈடுபட்டிருப்பதாக பாதுகாப்புச் செயலாளர் கோதாபய ராஜபக்ஷ தெரிவித்துள்ளார். வடக்குக் கிழக்கில் பொலிஸ் படையில் 1600 தமிழர்கள் இணைத்துக்கொள்ளப்பட இருப்பதாகவும் பாதுகாப்புச் செயலாளர்  கூறியுள்ளார். ஜப்பானின் விசேட தூதுவர் யசூசி அகாசியுடனான சந்திப்பின் போதே பாதுகாப்பு செயலாளர் இதனைத் தெரிவித்திருக்கிறார். டோக்கியோவிற்கு உத்தியோகபூர்வ விஜயத்தை மேற்கொண்டிருக்கும் கோதாபய ராஜபக்ஷ பொலிஸ் படையில் 1600 தமிழர்களை சேர்ப்பதற்கான நடவடிக்கைகள் எடுக்கப்பட்டிருப்பதாகக் கூறியுள்ளார்.

இதனை டோக்கியோவிலுள்ள இலங்கைத் தூதரகம் விடுத்த அறிக்கையில் தெரிவித்திருக்கிறது. கடந்த வருடம் 20 ஆயிரத்திற்கும் அதிகமான புலம்பெயர்ந்த தமிழர்கள் வடக்கு, கிழக்கிற்கு வருகை தந்திருந்தனர். தமது குடும்பங்கள் உறவினர்களைப் பார்ப்பதற்கு அவர்கள் வந்திருந்தனர். கடந்த மாதம் மட்டும் 5 ஆயிரத்திற்கும் அதிகமானோர் வருகை தந்திருந்தனர். மோதலின் போது நாட்டை விட்டு வெளியேறிய தமிழ் மக்களில் பலர் இப்போது நாட்டில் சமாதானமும் ஸ்திரத்தன்மையும் ஏற்பட்டுள்ளது என்ற நம்பிக்கையின் அடிப்படையிலேலேயே வருகை தருகின்றனர். இது உண்மையில் குறிப்பிடத்தக்க விடயமாகும் என்று கோதபாய ராஜபக்ஷ தெரிவித்ததாக அந்த அறிக்கையில் தெரிவிக்கப்பட்டுள்ளது.

ஜப்பானுக்கு விஜயம் மேற்கொண்டுள்ள கோதாபய ராஜபக்ஷ ஜப்பானின் சிரேஷ்ட அமைச்சர்கள் பாராளுமன்ற உறுப்பினர்களைச் சந்தித்து தற்போதை அபிவிருத்தி மற்றும் ஜப்õனினால் வழங்கப்படும் நிதி தொழில்நுட்ப குறித்தும் அவர் கலந்துரையாடியுள்ளார்.
புலிகளுடனான முப்பது வருட மோதல் முடிவுக்கு வந்ததைத் தொடர்ந்து நாட்டில் சமாதானமும் அபிவிருத்தியும் ஏற்பட்டிருக்கும் நிலையில் இலங்கை அரசு மேற்கொண்டுள்ள நல்லிணக்கம் புனர்வாழ்வு மீள்கட்டுமான முன்முயற்சிகள் குறித்தும் கலந்துரையாடல்கள் இடம்பெற்றுள்ளன.  வடக்கு, கிழக்கில் அபிவிருத்தியை மேற்கொள்வதற்கான சாதகமான நடவடிக்கைகளை இலங்கை அரசாங்கம் மேற்கொண்டிருப்பதாக தூதுவர் அகாசி குறிப்பிட்டுள்ளார். மக்களினால் தெரிவு செய்யப்பட்ட அரசாங்கமானது பொருத்தமான நடவடிக்கைகளை அமுல்படுத்துவதற்கான முன்முயற்சிகளை முன்னெடுப்பதற்கான உரிமையைக் கொண்டிருக்கின்றது எனவும் அகாசி தெரிவித்திருக்கிறார்.