லெபாரா நூலகம் (‘Lebara Library’) கிளிநொச்சியில் திறப்பு!!!

போரால் பாதிக்கப்பட்ட தாயக மக்களிற்கு ‘லெபாரா நிதியத்தினால்’ (Lebara Foundation) கிளிநொச்சியில் புதிய நவீன நூலகம் ஒன்று கட்டிக் கொடுக்கப்பட்டுள்ளது. குறைந்த விலையில் வெளிநாட்டுத் தொலைபேசிச் சேவைகளை வழங்கும் ‘லெபாரா மொபைலின்’ அங்கமான லெபாரா நிதியம், இலங்கை, இந்தியா உட்பட பல உலக நாடுகளில் பல்வேறு தொண்டுப் பணிகளை மேற்கொண்டு வருகின்றது. வன்னியில் போரில் பாதிக்கப்பட்ட மக்களும், மாணவர்களும் மீள் குடியேறி, தமது வாழ்வை மீண்டும் கட்டியெழுப்ப முனையும் இந்தக் காலப்பகுதியில், அர்ப்பணிப்புடன் பணியாற்றும் ஆசிரியர்களும், அவர்கள் வழிநடக்கும் மாணவர்களுக்கும் இந்த நூலகம் நிச்சயம் உதவும்.

கல்வி நூல்கள் மட்டுமன்றி 25 இற்கும் மேற்பட்ட கணினிகள், காணொளி, ஒலி அமைப்பு உட்பட உபகரண வசதிகளுடன் நவீன முறையில் இந்த நூலகம் அமைக்கப்பட்டுள்ளமை, பல நூற்றுக் கணக்கான ஆசிரியர்களும், பல்லாயிரக் கணக்கான மாணவர்களும் பயன்பெற ஏதுவாக இருக்கும் என இந்தத் திட்டத்திற்கு உறுதுணையாக இருந்த மத குருக்கள் தெரிவித்தனர்.

நூல்களை வாசிப்புதற்கு மட்டுமன்றி நாளாந்தம், மற்றும் வார முறையில் கல்வி வகுப்புகளை நடத்தும் வகையிலும் இந்த நூலகம் அமையப் பெற்றிருப்பதால், உள்நாட்டிலும், வெளிநாட்டில் இருந்தும் செல்லும் கல்வியாளர்களால் மாணவர்கள் கல்வி, மற்றும் பல்மொழி அறிவைப் பெற இருக்கின்றனர். வசதியற்ற மாணவர்களுக்கும் நிதியுதவி செய்து கல்வி வழங்கும் திட்டமும் இதில் உள்ளடப்பட்டுள்ளது.

வன்னியில் போரினால் பாதிக்கப்பட்ட மாணவர்களுக்கு மேலதிக கல்வியறிவை ஊட்டும் நோக்கில் இந்த நூலகம் திறந்து வைக்கப்பட்டுள்ளது. போரின் போதும், அதன் பின்னர் இடம்பெயர்ந்தபோதும் இழந்த கல்வியை ஈடுசெய்ய இந்த நூலகம் உதவியாக இருக்கும் என நம்பப்படுகின்றது.

மிக வேகமாக வளர்ந்துவரும் உலகின் அறிவியல் வளர்ச்சிக்கு ஈடாக, தம்மை வளர்த்தெடுக்க பாடசாலைக் கல்விக்கு அப்பால் இந்த நூலகம் வன்னி மாணவர்களிற்கு துணை நிற்கும் என லெபாரா நிதியம் நம்புவதாக அதன் நோக்கக் குறிப்பில் கூறப்பட்டுள்ளது. அத்துடன், தமிழ் மக்களின் சொத்தாக இருக்கும் கல்வி அறிவை தக்க வைக்கும் ஓர்ம மனநிலையை மாணவர்களின் மத்தியில் பேணும் முக்கிய தேவையும் இருக்கின்றது.

இந்த நூலகத்திற்கு நூல்களை வழங்க விரும்புவர்கள் லெபாரா நிறுவனம் இயங்கும் 8 நாடுகளில் அதன் அலுவலகத்தை அல்லது லெபாரா நிதியத்தைத் தொடர்புகொண்டு அவற்றை வழங்க முடியும் என அறிவிக்கப்பட்டுள்ளது.

கடந்த வருடம் இதே காலப்பகுதியில் (பெப்ரவரி 2012) யாழ்ப்பாணம் மணியம்தோட்டத்தில் 50 வீடுகள் அடங்கிய ‘லெபாரா கிராமம்’ (Lebara Village) போரினால் பாதிக்கப்பட்ட குடும்பங்களிற்கு கையளிக்கப்பட்டிருந்தன. லியோன், பாஸ்கரன், ரதீசன் (LE-BA-RA) ஆகியோரால் உருவாக்கப்பட்டு, கடந்த 11 வருடங்களாக புலம்பெயர் நாடுகளில் இயங்கிவரும் லெபாரா நிறுவனம், தனது நிதியத்தின் ஊடாக பல்வேறு தொண்டுகளை செய்து வருகின்றது.

இந்தியா தமிழ்நாட்டில் ஈழத்தமிழ் மக்கள் தங்கியுள்ள 113 ஏதிலிகள் முகாம்களில் உள்ள 4000 இற்கும் மேற்பட்ட சிறுவர்களுக்கு கடந்த பல வருடங்களாக இந்த நிதியத்தினால் பல்வேறு பணித்திட்டங்கள் மேற்கொள்ளப்பட்டு வருகின்றன.

லெபாரா நிறுவனத்தின் 10வது ஆண்டு நிறைவை முன்னிட்டு தாயகம், தமிழ்நாடு மற்றும் உலகில் உள்ள சிறுவர்கள், ஏதிலிகளுக்கு உதவி புரிவதற்காக ஒரு மில்லியன் யூரோவை ஐக்கிய நாடுகள் சிறுவர் நிதியம் (UNICEF), மற்றும் ஐக்கிய நாடுகள் ஏதிலிகள் அமைப்பிற்கு (UNHCR) லெபாரா வழங்கி இருந்தது. இதன் மூலம் ஒரு இலட்சத்து 75 ஆயிரம் சிறுவர்கள் அனைத்துலக ரீதியாகப் பயன்பெற்றிருந்தமை குறிப்பிடத்தக்கது.

(நன்றி: பரா நிரஞ்சன்)