ஐ.நா.வில் இலங்கைக்கு எதிரான தீர்மானத்தில் அப்படி என்னதான் உள்ளது?

ஐ.நா.வில் இலங்கைக்கு எதிராக அமெரிக்கா தயாரித்த தீர்மானத்தின் நகல் ஒன்று கிடைத்தது. அந்த நகலின் தமிழாக்கத்தை கீழே தருகிறோம். படித்துப் பாருங்கள். தீர்மானத்தை இன்று ஜெனீவாவில் அமெரிக்கா தாக்கல் செய்யும் நேரம்வரை, இதுதான் இறுதித் தீர்மானம் என்று அடித்துச் சொல்ல முடியாது. அவர்களிடம் வேறு ஒரு தீர்மானமும் கையில் இருக்கலாம். ஆனால், கீழேயுள்ள நகல் அவர்களிடம் இருந்தது. அவர்களிடம் இருந்துதான் கிடைத்தது. அநேகமாக இந்த தீர்மானமே சமர்ப்பிக்கப்படலாம் என்பது எமது ஊகம். “அமெரிக்கா தாக்கல் செய்யவிருந்த தீர்மானம் மாற்றப்பட்டுள்ளதாகவும், அந்தத் தீர்மானத்தில் இலங்கைக்கு எதிரான நடவடிக்கை ஏதும் இல்லாமல், ‘கவலை அளிக்கிறது’ ‘கவனித்துக் கொண்டு இருக்கிறோம்’ ‘ஏதாவது செய்ய வேண்டிய நிலை ஏற்படலாம்’ என்பது போன்ற முனை மழுங்கிய வாக்கியங்களே அதிகம் இருக்கலாம் என பட்சி சொல்கிறது…” அதை மனதில் வைத்துக்கொண்டு இதை படிக்கவும்.

“இதற்குத்தானா இவ்வளவு ஆர்ப்பாட்டமும், போராட்டமும்?” என்ற கேள்வி உங்களுக்கு எழுந்தால், எம்மோடு சண்டைக்கு வராதீர்கள். அது, உங்களது சொந்த கேள்வி!

• ஐ.நா. பேரவையின் அறிக்கையின் வழிகாட்டுதலின்படியும், சர்வதேச மனித உரிமைகள் குறித்த ஐ.நா. தீர்மானத்துக்கு ஏற்பவும், அது தொடர்பான மற்றைய சர்வதேச ஒப்பந்தங்களுக்கு அமையவும்,

• இலங்கையில் இனங்களுக்கு இடையிலான ஒற்றுமை, மற்றும் இலங்கை அரசுக்கு உள்ள பொறுப்பை ஏற்றுக் கொள்வதற்கான ஐ.நா. மனித உரிமைகள் குழுவின் தீர்மானம் 19/2 ஐ நினைவுகூர்ந்து,

• தமது நாட்டு குடிமக்களின் சுதந்திரம், மற்றும் மனித உரிமைகளைப் பாதுகாப்பதும், உத்தரவாதம் கொடுப்பதும் இலங்கை அரசின் பொறுப்பு என்ற நிலைப்பாட்டை மீண்டும் வலியுறுத்தி,

• இலங்கை அரசின் தேசிய செயல் திட்டம் மற்றும் எல்.எல்.ஆர்.சி பரிந்துரைகளை நடைமுறைப்படுத்துவது தொடர்பான அதன் வாக்குறுதிகளை கவனத்தில்கொண்டு,

• தேசிய செயல் திட்டம் என்பது (இலங்கை அரசால் தயாரிக்கப்பட்ட) எல்.எல்.ஆர்.சியின் எல்லாவிதமான பரிந்துரைகளையும் நடைமுறை படுத்துவதில் போதிய அக்கறை காட்டவில்லை என்பதைக் கவலையோடு சுட்டிக்காட்டி,
• சட்டத்துக்கு விரோதமான கொலைகள், திட்டமிட்ட முறையிலான ஆள் கடத்தல்கள் முதலானவை குறித்த நம்பகமான விசாரணையை மேற்கொள்ளுதல்; இலங்கையின் வடக்குப் பிரதேசத்திலிருந்து ராணுவத்தை முற்றாக விலக்கிக்கொள்வது. நிலங்கள் தொடர்பான புகார்கள் குறித்த நடுநிலையான விசாரணையை மேற்கொள்வது, தடுப்புக்காவல் சட்டங்கள் குறித்து மீள் ஆய்வு செய்வது, முன்னர் சுதந்திரமாக இருந்த சிவில் நிர்வாக அமைப்புகளை பலப்படுத்துவது…….

மாகாணங்களுக்கு அதிக அதிகாரங்களை வழங்குவதற்கான அரசியல் தீர்வைக் காண்பது, அனைத்துத் தரப்பினருக்கும் பேச்சுரிமை உட்பட அனைத்து அடிப்படை உரிமைகளையும் பாதுகாப்பதற்கான சட்டங்களை வலுப்படுத்துவது… ஆகியவை தொடர்பான (இலங்கை அரசால் தயாரிக்கப்பட்ட) எல்.எல்.ஆர்.சி அறிக்கையில் இடம்பெற்றிருக்கும் உருப்படியான பரிந்துரைகளைக் நினைவுபடுத்தி,

• அதேசமயத்தில் இலங்கை அரசின் தேசிய செயல் திட்டமோ, எல்.எல்.ஆர்.சி.யோ, இலங்கையில் சர்வதேச சட்டங்கள் மீறப்பட்டன என்ற குற்றச்சாட்டு குறித்து போதிய அளவில் அக்கறை காட்டவில்லை என்பதைக் கவலையோடு சுட்டிக்காட்டி,

• இலங்கையில் மனித உரிமைகள் மீறப்படுவது தொடர்பாகவும், சட்டத்தின் ஆட்சிக்கும், நீதித்துறையின் சுதந்திரத்துக்கும் ஏற்பட்டிருக்கும் அச்சுறுத்தல் தொடர்பாகவும், மாகாணங்களுக்கு அதிகாரத்தை வழங்குவது உட்பட, வாக்குறுதிகளை இலங்கை அரசு தொடர்ந்து மீறிவருவது தொடர்பாக தொடர்ந்து முன்வைக்கப்படும் குற்றச்சாட்டுகளைப் பற்றிக் கவலை தெரிவித்து,

1. ஐ.நா. மனித உரிமைகள் குழுவின் தலைவர் அளித்திருக்கும் இலங்கை தொடர்பான அறிக்கையை இந்தத் தீர்மானம் வரவேற்கிறது.

2. (இலங்கை அரசால் தயாரிக்கப்பட்ட) எல்.எல்.ஆர்.சி.யின் உருப்படியான பரிந்துரைகளை விரைவாகச் செயற்படுத்துதல், இலங்கையின் அனைத்துக் குடிமக்களுக்கும் நீதி, சமத்துவம், இன ஒற்றுமை ஆகியவற்றை உறுதி செய்வதற்கான சட்டரீதியான நடைமுறைகளை ஏற்படுத்துதல் தொடர்பாக ஏற்கனவே தெரிவிக்கப்பட்ட நிலைப்பாட்ட இத் தீர்மானம் மறுபடியும் வலியுறுத்துகிறது.

3. மனிதவுரிமைச் செயற்பாட்டாளர்கள், வழக்கறிஞர்கள், நீதிபதிகள், பேச்சுரிமை, ஒன்றுகூடுவதற்கான உரிமை, சட்டவிரோதமான தன்னிச்சையான கொலைகள், திட்டமிட்ட முறையிலான ஆள்கடத்தல் ஆகியவை தொடர்பான ஐ. நா குழுக்களின் சிறப்பு அலுவலர்கள் இலங்கைக்குத் தடையின்றி சென்று ஆய்வுகளை நடத்த இலங்கை அரசு அனுமதிக்கவேண்டும் என இத்தீர்மானம் வலியுறுத்துகிறது

4. மேற்சொன்ன பரிந்துரைகளை நிறைவேற்றுவதில் இலங்கை அரசோடு கலந்து ஆலோசனை செய்து, அதன் ஒப்புதல் பெற்று, ஐ.நா. மனித உரிமைகள் தலைவர் மற்றும், அவருக்கு இருப்பது போன்ற அதிகாரம் கொண்ட பிற அமைப்பினர் இலங்கை அரசுக்கு உதவிட வேண்டும் என இத்தீர்மானம் வலியுறுத்துகிறது.

5. ஐ.நா மனித உரிமைகள் குழுவின் தலைவர் மற்றும் அவருக்கு இருப்பது போன்ற அதிகாரம் கொண்ட பிற அமைப்பினர், இலங்கையில் சர்வதேச சட்டங்கள் மீறப்பட்டிருப்பது தொடர்பாகவும், இன ஒற்றுமை, பொறுப்பு ஏற்றுக் கொள்ளல் குறித்து இலங்கை அரசு எடுத்திருக்கும் நடவடிக்கைகள் தொடர்பாகவும், ஐ.நா. மனித உரிமைகள் குழுவின் 25-வது கூட்டத்தில் அறிக்கை ஒன்றை சமர்ப்பிக்கவேண்டும் என இத்தீர்மானம் வலியுறுத்துகிறது.

இவர்கள் குறிப்பிடும் ஐ.நா. மனித உரிமைகள் குழுவின் 24-வது கூட்டம், வரும் செப்டெம்பர் 9-ம் தேதி நடக்கவுள்ளது. 25-வது கூட்டத்துக்கு இன்னமும் தேதி குறிக்கப்படவில்லை.

பின்குறிப்பு: இதில் மிக முக்கியமான சுவாரஸ்யமான விடயம் என்னவென்றால்…. அமெரிக்காவால் ஐ.நா. வில் சமர்பிக்கவிருந்த உத்தேச தீர்மானமானது, முன்கூடியே இலங்கையரசிடம் கையளிக்கப்பட்டு, அவர்களின் ஆலோசனைகளும் பெறப்பட்டதன் அடிப்படையிலேயே மனித உரிமைகள் பேரவையில் இத் தீர்மானம் சமர்பிக்கப்படுகிறது.

ஆகவே.., ஐ.நா.வில் இலங்கைக்கு எதிராக அமெரிக்கா தயாரித்த தீர்மானத்தின் உள்ளடக்கங்களின் முழுமையான விபரங்களை இந்திய மத்திய அரசாங்கமும், இலங்கையரசாங்கமும் ஏற்கனவே அறிந்திருந்தமையால் அவர்கள் இதைபற்றி பெரிதாக அலட்டிக்கொள்ளவில்லை.

ஆனால்.., தமிழ் ஊடகங்களும், சனல்-4 போன்ற தொலைக்காட்சியும் தமிழர்களை நல்லா குஷிப்படுத்தி தங்கள் ஊடக (பிரச்சார) வியாபாரத்தை நடத்தி முடித்துவிட்டார்கள்.