இந்தியாவில் அரசியல் பதற்றம்

அரசைக் காப்பாற்றிக்கொள்ள காங்கிரஸ் பகீரதப் பிரயத்தனம்

காங்கிரஸ் தலைமையிலான இந்திய மத்திய அரசாங்கத்துக்கு வழங்கிய ஒத்துழைப்பை திராவிட முன்னேற்றக் கழகம் விலக்கிக் கொண்டதையடுத்து இந்திய மத்திய அரசில் நெருக்கடி நிலை ஏற்பட்டுள்ளது. மத்திய அரசுக்கான ஆதரவை விலக்கியதாக தி.மு.க. அறிவித்ததைத் தொடர்ந்து, தி.மு.க.வின் மத்திய அமைச்சர்கள் ஐந்து பேர் நேற்றையதினம் தமது இராஜினாமாக் கடிதங்களை இந்திய பிரதமர் மன்மோகன் சிங்கிடம் கையளித்தனர். தி.மு.க மத்திய அரசிலிருந்து விலகிக் கொண்டாலும் அரசாங்கம் ஸ்திரமான நிலையிலேயே இருப்பதாகவும், யாராலும் அதனை அசைக்க முடியாது என்றும் மத்திய நிதியமைச்சர் ப.சிதம்பரம் நேற்றும் கூறியுள்ளார். இருந்தபோதும், மத்தியில் தனது ஆட்சியைத் தக்கவைத்துக்கொள்வதற்காக ஏனைய கட்சிகளின் ஆதரவுகளைத் திரட்டுவதற்கு காங்கிரஸ் கட்சி பகீரதப் பிரயத்தனங்களை மேற்கொண்டுள்ளது.

முலாயம் சிங் தலைமையிலான சமாஜ்வாடி கட்சியின் ஆதரவைப் பெறும் நோக்கில், முலாயம் சிங்கை தீவிரவாதி என விமர்சித்த பேனி பிரசாத் வர்மாவை அமைச்சர் பதவியிலிருந்து நீக்குவதற்கும் காங்கிரஸ் கட்சி தயாராகியிருப்பதாகவும் விடயமறிந்த வட்டாரங்கள் தெரிவிக்கின்றன. இதனை உறுதிப்படுத்தும் வகையில் காங்கிரஸ் தலைவி சோனியா காந்தி, முலாயம் சிங்கைச் சந்தித்துப் பேச்சுவார்த்தை நடத்தியுள்ளார்.

நாடாளுமன்றத்தில் பிரச்சினைகள் ஏற்படுவதைத் தவிர்த்துக் கொள்வதற்கு காங்கிரஸ் கட்சி முலாயம் சிங் மற்றும் மாயாவதி ஆகியோரின் உதவியை நாட வேண்டிய தேவை ஏற்பட்டிருப்பதாக அரசியல் ஆய்வாளர்கள் சுட்டிக்காட்டுகின்றனர். தி.மு.க. ஆதரவை விலக்கிக் கொண்டதால் மத்திய அரசுக்கு எவ்விதப் பாதிப்பும் இல்லையெனக் கூறினாலும் ஆட்சியைத் தக்கவைத்துக் கொள்ள காங்கிரஸ் தொடர்ந்தும் போராடி வருகின்றது.

இலங்கை விடயத்தைக் காரணம் காட்டி மத்திய அரசாங்கத்திற்கு வழங்கிய ஆதரவை விலக்கிக் கொள்வதாக தி.மு.க. தலைவர் மு.கருணாநிதி நேற்றுமுன்தினம் அறிவித்தார். இதனையடுத்து நேற்றுமுன்தினம் இரவு குடியரசுத் தலைவர் பிரணாப் முகர்ஜியை சந்தித்த டி.ஆர்.பாலு, மத்திய அரசுக்கான ஆதரவை விலக்கிக்கொள்வதாகக் கூறி உத்தியோகபூர்வ கடிதத்தைக் கையளித்தார்.

அழகிரி அதிருப்தி

இதன் தொடர்ச்சியாக தி.மு.க.வின் மூன்று அமைச்சர்களான பழனி மாணிக்கம், ஜெகத்ரட்சகன், காந்தி செல்வம் ஆகியோர் நேற்று முற்பகல் பிரதமர் மன்மோகன் சிங்கைச் சந்தித்து தமது இராஜினாமாக் கடிதங்களைக் கையளித்தனர். எனினும், மத்திய அமைச்சர் அழகிரி மற்றும் பிரதி அமைச்சர் நெப்போலியன் ஆகியோர் தனியாகப் பிரதமரைச் சந்தித்து தமது இராஜினாமாக் கடிதங்களைக் கையளித்தனர். மத்திய அரசாங்கத்துக்கான ஆதரவை விலக்கிக் கொள்வதாக எடுக்கப்பட்ட முடிவு தன்னுடன் கலந்து ரையாடி எடுக்கப்படவில்லை யென்பதால் தான் அதிப்தியடைந்திருப்பதாக அழகிரி கூறியுள்ளார். இருந்தாலும் கட்சித் தலைமைத்துவம் எடுத்த தீர்மானத்துக்கு தலை வணங்கி அமைச்சுப் பதவியை இராஜினாமா செய்திருப்பதாகவும் அழகிரி இந்திய ஊடகங்களுக்குத் தெரிவித்துள்ளார்.

கபட நாடகம்

தி.மு.க. தலைவர் கருணாநிதி மீண்டுமொரு கபட நாடகத்தை அரங்கேற்றியிருப்பதாக தமிழக முதலமைச்சர் ஜெயலலிதா குற்றஞ்சாட்டியிருந்த நிலையில், தி.மு.க.வின் செயற்பாடு மக்களை ஏமாற்றும் நடவடிக்கை எனக் கூறி அ.தி.மு.க. சார்பில் தமிழகத்தின் பல்வேறு இடங்களில் சுவரொட்டிகளும், டிஜிட்டல் பனர்களும் கட்டப்பட்டுள்ளன. ‘மக்களை ஏமாற்றுவதற்கு இன்னும் எத்தனை கபட நாடகங்களோ?’ எனும் தலைப்பில் பல்வேறு பனர்கள் தமிழகத்தில் கட்டப்பட்டுள்ளன.