மர்மம் தொடர்கிறது...

காணாமல்போன விமானம் தொடர்பில் மாறுபட்ட தகவல்கள்

கோலாலம்பூரிலிருந்து பீஜிங்கிற்கு பறந்து கொண்டிருந்த மலேசிய விமானம் காணாமல்போய் மூன்று தினங்கள் கடந்துள்ள நிலையிலும் அது எங்கே என்ற மர்மம் தொடர்ந்தும் நீடித்து வருகிறது. இந்த விமானம் கடத்தப்பட்டிருப்பதற்கான வாய்ப்பையும் மறுக்கமுடியாது என்று மலேசிய சிவில் விமான சேவைத் தலைவர் அசாருதீன் அப்துல் ரஹ்மான் குறிப்பிட்டார். இந்த விமானம் வீழ்ந்திருக்கக் கூடுமென்று சந்தேகிக்கப்படும் கடற்பகுதியில் நேற்று ஒரு மஞ்சள் நிற உயிர்பாதுகாப்புப் படகு ஒன்று கண்டெடுக்கப் பட்டபோது அது இந்த சம்பவத்துடன் தொடர்பற்ற பொருள் என பின்னர் உறுதிசெய்யப்பட்டது.

மலேசிய விமான சேவைக்குச் சொந்தமான எம்.எச்.370 விமானம் மூன்று தினங்களுக்கு முன்னர் ராடர் திரைகளிலிருந்து காணாமல்போனது. கோலாலம்பூரிலிருந்து பீஜிங் சென்றுகொண்டிருந்த இந்த விமானத்தில் 239 பேர் இருந்தனர். காணாமல்போனவர்களது உறவினர்கள் விமானத்துக்கு என்னவானது என்ற செய்தி வரும்வரை மலேசிய விமான நிலையத்தில் காத்திருந்தனர்.

இதில் களவாடப்பட்ட கடவுச்சீட்டுக்களுடன் குறித்த விமானத்தில் பயணித்த சந்தேகத்துக்கு இடமான இரு பயணிகள் தொடர்பான விபரங்களைப் பெற சீன உளவுத்துறையுடன் இணைந்து செயற்படுவதாக மலேசிய ஆயுதப்படைகளின் பிரதானி குறிப்பிட்டார்.

மலேசிய போக்குவரத்து அமைச்சர் ஹிஷாமுதீன் குசைன் கூறும்போது, சந்தேகத்துக்கு இடமான இரண்டு பயணிகள் பற்றிய விபரங்களைப் பெறப் பல நாடுகளினதும் உளவுத்துறையினை அணுகியிருப்பதாகத் தெரிவித்தார்.

இதேவேளை, இந்தத் தேடுதல் நடவடிக்கையை மலேசிய நிர்வாகம் துரிதப்படுத்த வேண்டுமென சீனா அழுத்தம் கொடுத்துள்ளது. காணாமல்போன விமானத்தில் 150ற்கும் அதிகமான சீன நாட்டவர்கள் பயணித்துள்ளனர்.

“இந்த சம்பவம் குறித்து மலேசிய தரப்பு நேர்மையாகச் செயற்படுகின்றபோதும் அது மந்தமாக உள்ளது. மலேசியா தமது செயற்பாட்டைத் தீவிரப்படுத்த வேண்டும்” என்று சீன வெளியுறவு அமைச்சின் பேச்சாளர் தனது வழமையான ஊடக சந்திப்பில் குறிப்பிட்டார்.

இந்தத் தேடுதல் நடவடிக்கையில் ஈடுபட்டிருக்கும் அமெரிக்காவின் செவின் பிZட் யுத்தக்கப்பலின் கொமாண்டர் வில்லியம் மார்க் விமானத்தின் எச்சங்கள் நீரில் மிதக்க சாத்தியங்கள் இருப்பதாகக் கூறினார்.

“அமைதியான கடலில் ஒரு சொக்கர் பந்து அல்லது கூடைப்பந்து மிதந்தாலும் அதனை ராடர் சமிக்ஞை மூலம் கண்டறிய முடியும். விமானப் பதிவில் ஒலியலை சமிக்ஞைகள் எழுப்பப்படும். அவ்வாறு பயணிக்கும் விமானத்தில் சமிக்ஞை பெற முடியும். ஆனால் இதுவரை எந்தத் தடயமும் கிடைக்கவில்லை” என்றும் அவர் விளக்கினார்.

விமானத்தின் கதவுப் பகுதி உட்பட இரு பொருட்களை தெற்கு வியட்னாம் கடற்கரைப் பகுதியில் கண்டதாக வியட்நாம் நிர்வாகம் கடந்த ஞாயிற்றுக்கிழமை மாலை கூறியிருந்தது. இதே பகுதியில் எண்ணைத் திட்டுக்கள் இருந்ததை விமானப்படையின் விமானங்கள் கடந்த சனிக்கிழமை கண்டுள்ளன.

எனினும், இந்த விடயங்கள் இன்னும் உறுதிசெய்யப்படவில்லையென்று மலேசிய சிவில் விமான சேவைத் தலைவர் தெரிவித்தார். அதேபோன்று காணாமல்போன விமானத்தில் எந்த எச்சமும் இதுவரை கண்டுபிடிக்கப் படவில்லையென்று அமெரிக்க விமானப்படை அதிகாரிகள் நேற்றுத் தெரிவித்தனர்.

எம்.எச்.370 விமானம் உள்ளூர் நேரப்படி கடந்த சனிக்கிழமை 00.41 மணிக்கு கோலாலம்பூரிலிருந்து பீஜிங் நோக்கிப் புறப்பட்டது. ஆனால் ஒரு மணி நேரத்துக்குள் விமானத்துடனான தொடர்பு மலேசிய மற்றும் வியட்னாமுக்கு இடையில்வைத்து துண்டிக்கப்பட்டுள்ளது.

என்ன தவறு நேர்ந்தது என்பது பற்றி அதிகாரிகளால் இன்னும் உறுதிசெய்ய முடியாமல் உள்ளது. எனினும், இந்த விமானம் காணாமல்போய் சில மணிநேரங்களின் பின்னர் தனது பயணப்பாதையிலிருந்து திரும்பியிருப்பது ராடர் சமிக்ஞைகள் மூலம் உறுதிசெய்யப்பட்டுள்ளதையடுத்து மலேசிய நிர்வாகம் தனது தேடுதல் பரப்பை கடந்த ஞாயிற்றுக்கிழமை விரிவுபடுத்தியது.

தற்போது ஒன்பது நாடுகளைச் சேர்ந்த 40 கப்பல்கள் மற்றும் 34 விமானங்கள் வியட்நாம் மற்றும் மலேசிய கடற்பகுதியில் தேடுதல் நடவடிக்கையில் ஈடுபட்டுள்ளன. இந்தத் தேடுதல் பகுதி பல நூறு கிலோமீற்றர்களுக்கு விரிவுபடுத்தியிருப்பதாக அமெரிக்க யுத்தக் கப்பலின் கொமாண்டர் வில்லியம் மார்க்ஸ் கூறினார்.

“வானிலிருந்து பொருட்கள் கை அல்லது கூடைப்பந்து அளவில் மிகச் சிறியதாகவே தென்படும். இந்த பரந்த பகுதியில் இதனைக் கண்டால் அது பெரிய விடயமாகும்” என்றார்.

மறுபுறத்தில் இந்த விவகாரத்தில் தீவிரவாதத் தாக்குதல் உட்பட அனைத்துக் கோணங்களிலும் விசாரணை முடுக்கிவிடப்பட்டுள்ளன. இதில் தீவிரவாதத் தடுப்பு நிறுவனங்கள் மற்றும் எப்.பி.ஐ புலனாய்வுப் பிரிவும் விசாரணைகளைத் தொடங்கியுள்ளன.

காணாமல்போன மலேசிய விமானத்தில் பிரணாப் முகர்ஜியின் இரு உறவினர்கள்

காணாமல்போன மலேசிய விமானத்தில் பயணம் செய்தவர்களில் இருவர் இந்தியக் குடியரசுத் தலைவர் பிரணாப் முகர்ஜியின் உறவினர்கள் என சேலம் நாடாளுமன்றத் தொகுதி காங்கிரஸ் துணைத் தலைவர் மோகன் குமரமங்கலம் தெரிவித்துள்ளார்.

மலேசிய தலைநகர் கோலாலம்பூரில் இருந்து சீனத் தலைநகர் பெய்ஜிங்கிக்கு சனிக்கிழமை சென்ற பயணிகள் விமானம் வியட்நாம் அருகே காணாமல்போனது. கடலில் விழுந்து விபத்தில் சிக்கியிருக்கலாம் எனக் கருதப்படுகிறது. இதில் விமானத்தில் 5 இந்தியர்கள் உட்பட 239 பேர் பயணம் செய்துள்ளனர். இந்தியர்களில் இருவர் பிரணாப் முகர்ஜியின் உறவினர்கள் என தெரியவந்துள்ளது.

நாமக்கல் மாவட்டம் திருச்செங்கோடு அருகே குமரமங்கலத்தை பூர்வீகமாகக் கொண்ட ஜமீன் குடும்பத்தைச் நேர்ந்தவர் உமா முகர்ஜி. தற்போது அவர் சென்னையில் வசித்து வருகிறார். அவரது உறவினர் முகேஷ் முகர்ஜி. கனடா குடியுரிமை பெற்று அங்குள்ள பன்னாட்டு தொழில் நிறுவனத்தில் பணிபுரிந்து வருகிறார்.

அவர் பணி நிமித்தமாக தனது சீன மனைவி ஜாமு (37) என்பவருடன் மலேசியாவில் இருந்து பெய்ஜிங் சென்றுள்ளார். அவர்கள் சென்ற விமானம் பின்னர் காணாமல்போனது. அவருக்கு இரு ஆண் குழந்தைகள் உள்ளனர். சென்னையில் வசிக்கும் குமரமங்கலத்தைச் சேர்ந்த உமா முகர்ஜிக்கு, கணவர் வழியில் இந்திய குடியரசுத் தலைவர் பிரணாப் முகர்ஜி உறவினர் என்பது குறிப்பிடத்தக்கது.

இத்தகவலை உமா முகர்ஜியின் உறவினரும் மறைந்த முன்னாள் மத்திய அமைச்சர் ரங்கராஜன் குமரமங்கலத்தின் மகனுமான சேலம் நாடாளுமன்றத் தொகுதி காங்கிரஸ் துணைத் தலைவர் மோகன் குமரமங்கலம் உறுதி செய்துள்ளார்.