யாழ். நகரை உலுக்கிய அச்சுவேலி முக்கொலை

ஒரே குடும்பத்தைச் சேர்ந்த மூவர் அந்த இடத்திலேயே உயிரிழந்த பரிதாபம்

அச்சுவேலி கதிரிப்பாய் பகுதியில் கடந்த ஞாயிற்றுக்கிழமை நள்ளிரவு வீடு புகுந்து மேற்கொள்ளப்பட்ட வாள்வெட்டுச் சம்பவத்தில் ஒரே குடும்பத்தைச் சேர்ந்த மூவர் அந்த இடத்திலேயே உயிரிழந்த சம்பவம் அப்பகுதியில் மட்டுமல்லாது முழு நாட்டிலுமே பெரும் பரபரப்பை ஏற்படுத்தியிருந்தது. இச்சம்பவத்தில் நிர்குணானந்தம் அருள்நாயகி (வயது 50), இவரது மகன் நி. சுபாங்கன் (வயது 20). யசோதரன் மதுசா (வயது 28) ஆகியோரே உயிரிழந்தவர்களாவர். இதேவேளை இச்சம்பவத்தில் நி. தர்மிகா (வயது 24), த. யசோதரன் (வயது 31) ஆகிய இருவரும் படுகாயமடைந்தவர்களாவர். காயமடைந்தவர்கள் யாழ். போதனா வைத்தியசாலையில் சேர்க்கப்பட்டு தொடர்ந்தும் சிகிச்சை பெற்று வருகின்றனர்.

நடந்தது என்ன?

அச்சுவேலி கதிரிப்பாய் பகுதியில் முக்கொலைச் சந்தேக நபரான தனஞ்சயனின் மனைவியின் தாயார் வீடு உள்ளது. இங்குதான் கொலை இடம்பெற்றது. கொலைச் சந்தேக நபரான தனஞ்செயனுக்கும் அவரது மனைவி தர்மிகாவுக்கு இடையில் ஏற்பட்ட தகராறுகளை அடுத்து இவர்கள் இருவரும் பிரிந்து வாழ்ந்து வந்துள்ளனர்.

வாள்வெட்டில் காயமடைந்த தர்மிகாவும் தனது தாய் வீட்டிலேயே வசித்து வந்தார். மனைவியைப் பிரிந்திருந்த தனஞ்சயன் மனைவியின் சகோதரியான கொல்லப்பட்ட மதுஷா என்பவரைத் தனக்குத் திருமணம் செய்து வைக்குமாறு அவரது குடும்பத்தினரிடம் வலியுறுத்தி வந்துள்ளார். அவர்கள் அதற்கு மறுத்துவிட்டனர்.

தனஞ்சயனுக்கு தெரியாமல் கிளிநொச்சியில் மதுஷாவுக்கு கடந்த வாரம் திருமணம் செய்து வைத்துள்ளனர். இதனை ஒருவாறு தனஞ்செயன் அறிந்து கொண்டதாகக் கூறப்படுகிறது.

இந்த நிலையியே புதிதாகத் திருமணமான மதுஷாவும் தனது கணவருடன் சனிக்கிழமை அச்சுவேலியில் உள்ள தனது தாயாரின் வீட்டுக்கு விருந்துக்கு வந்துள்ளார்.

இதனைத் தனஞ்செயன் அறிந்திருந்தார். அன்று இரவு வீட்டில் அனைவரும் தூங்கிக் கொண்டிருந்தனர். அப்போது தனஞ்செயன் தனது நண்பர்கள் சிலருடன் ஓட்டோ ஒன்றில் வாளுடன் வந்துள்ளார். வீட்டில் வந்து இறங்கியவர் தூங்கிக் கொண்டிருந்த தனது மனைவியின் குடும்பத்தவர்களை வெறி கொண்டு சராமரியாக வெட்டியுள்ளார்.

சத்தம் கேட்டு எழுந்து வந்த மனைவி மற்றும் மைத்துனரையும் துரத்தித் துரத்தி வெட்டியுள்ளார். இவரது வாள்வெட்டுக்கு இலக்காகி படுகாயங்களுடன் கொலைச் சந்தேக நபரின் மனைவி மற்றும் அவரது சகோதரியின் கணவரான புதுமாப்பிள்ளை ஆகியோர் அலறி அடித்துக் கொண்டு வீட்டை விட்டு ஓடி கூச்சலிட்டுள்ளனர். இதனையடுத்து அயலவர்கள் திரண்டு வருவதற்குள் வீட்டில் இருந்த அனைவரையும் வெட்டிக் கொன்றுவிட்டு தனஞ்செயன் தப்பிச் சென்றுள்ளார். வீட்டிலிருந்தோர் இறந்து விட்டதை உறுதிசெய்த அயலவர்கள் காயமடைந்த இருவரையும் மீட்டு வைத்தியசாலைக்கு அனுப்பி வைத்தனர்.

இந்தத் தகவல்களை காயமடைந்து வைத்தியசாலையில் உள்ள கொலைச் சந்தேக நபரின் மனைவி பொலிஸாருக்கு வழங்கிய வாக்குமூலத்தில் தெரிவித்துள்ளார். இதேவேளை, மூர்க்கத்தனமாக வெட்டியதில் தனஞ்செயனின் மனைவியி சகோதரியின் கை மற்றும் கைவிரல்கள் துண்டாக்கி ஆங்காங்கே தனித்தனியாக விழுந்து கிடந்த நிலையில் மீட்கப்பட்டன. அவரது கழுத்தின் பின்புறமாக பாரிய வெட்டு விழுந்துள்ளது.

இதேபோன்றே மனைவியின் தாய், சகோதரன் ஆகியோரையும் மூர்க்கத்தனமாக கொலையாளி வெட்டிக் கொன்றுள்ளார். சம்பவம் தொடர்பாக அச்சுவேலிப் பொலிஸாருக்குத் தகவல் கொடுக்கப்பட்டது. சம்பவ இடத்திற்கு அச்சுவேலிப் பொலிஸாரும், அப்பகுதி இராணுவத்தினரும் விரைந்து வந்தனர்.

மல்லாகம் நீதவான் நீதிமன்ற நீதிபதி ஜோய் மகிழ் மகாதேவா சம்பவ இடத்தில் விசாரணைகளை மேற்கொண்டார். பின்னர் சடலங்கள் அங்கிருந்து மீட்கப்பட்டு அச்சுவேலி பிரதேச வைத்தியசாலையில் ஒப்படைக்கப்பட்டன. அங்கிருந்து மூவருடைய சடலங்களும் பிரேத பரிசோதனைக்காக யாழ். போதனா வைத்தியசாலைக்கு அனுப்பி வைக்கப்பட்டன.

இக்கொலைச் சம்பவத்துடன் தொடர்புடையவர்கள் என்ற சந்தேகத்தின் பெயரில் இருவர் கைது செய்யப்பட்டுள்ளனர் என அச்சுவேலிப் பொலிஸார் அறிவித்துள்ளனர். அத்துடன் கொலைக்குப் பயன்படுத்தப்பட்டதாகக் கூறப்படும் முச்சக்கர வண்டி ஒன்றும் இரத்தக் கறைகளுடன் நவக்கிரிப் பகுதியிலிருந்து மீட்கப்பட்டுள்ளதாகப் பொலிஸார் தெரிவித்துள்ளனர். வாள் வெட்டுக்கு இலக்காகிப் படுகாயமடைந்த நிலையில் வைத்தியசாலையில் சேர்க்கப்பட்டுள்ள தர்மிகா என்பவரது கணவரான தனஞ்செயன் என்பவரும் மற்றுமொரு நபருமே இவ்வாறு கைது செய்யப்பட்டுள்ளனர் என்று பொலிஸார் தெரிவித்தனர்.

இதேவேளை முக்கொலைகள் தொடர்பில் சந்தேகத்தின் பேரில் பொலிஸாரால் கைது செய்யப்பட்ட தனஞ்செயனை எதிர்வரும் 16 ஆம் திகதி வரை விளக்கமறியலில் வைக்கு¡று உத்தரவிடப்பட்டுள்ளது. இவரை அச்சுவேலிப் பொலிஸார் மல்லாகம் நீதிமன்றில் முற்படுத்தினர். இதன் போது வழக்கை விசாரணை செய்த மல்லாகம் நீதிமன்ற நீதவான் ஜோய் மகிழ் மகா தேவா, சந்தேக நபரை விளக்க மறியலில் வைக்க உத்தரவிட்டார்.

இதேவேளை, சந்தேக நபரை அச்சுவேலி பொலிஸார் திங்களன்று நீதிமன்றுக்கு அழைத்து சென்ற வேளை சந்தேக நபரைப் பார்க்கவென பலர் அச்சுவேலிப் பொலிஸ் நிலையத்தில் கூடினர். சந்தேக நபரைத் தம்மிடம் ஒப்படைக் கக் கோரி அச்சுவேலி பொலிஸ் நிலையத்தினைச் சூழ்ந்து கொண்ட மக்களினால் பொலிஸ் நிலையத்தில் பதற்றமான சூழ்நிலை ஏற்பட்டது.

பொதுமக்களை பொலிஸ் நிலையத்திற்கு வெளியே நிற்கும்படி கூறிய பொலிஸார் நிலைய வாயிலில் வைத்து குறித்த சந்தேக நபரை பொதுமக்களுக்குச் காட்டிவிட்டு மல்லாகம் நீதிமன்றத்திற்கு பலத்த பாதுகாப்புடன் அழைத்துச் சென்றனர்.

மல்லாகம் நீதிமன்றத்திலும் பெருமளவு பொதுமக்கள் சூழ்ந்திருந்தமையினால் அங்கு பொலிஸ் மற்றும் இராணு வத்தினர் அதிகளவில் குவிக்கப்பட்டிருந்தனர்.

(எம்.எப்.ஜெய்னுலாப்தீன்)