பாகிஸ்தானின் அப்போதாபாத்தில் ராணுவ அகடமிக்கு அருகே பதுங்கியிருந்த ஒசாமா!

பாகிஸ்தானின் அப்போதாபாத்தில், ஒசாமா பின்லாடன் பதுங்கியிருந்த கட்டடம், ராணுவ அதிகாரிகள் தங்குவதற்காக கட்டப்பட்டது. இந்த கட்டடம், ராணுவ அதிகாரிகள் பயிற்சி பெறும் அகடமியிலிருந்து, 300 அடி தூரத்தில் உள்ளது. ஆப்கானிஸ்தான் போருக்கு பின், ஒசாமா, அங்குள்ள குகைகள் நிறைந்த டோரோ போரா மலைப்பகுதியில் ஒளிந்திருப்பதாக சந்தேகிக்கப்பட்டது. இதையடுத்து, அப்பகுதியில் அமெரிக்கப்படைகள் முகாம் அமைத்து இரவு பகலாக தேடின. ஆப்கானிஸ்தான் எல்லை அருகே, பாகிஸ்தானின் பழங்குடிகள் வசிக்கும் பகுதியில் ஒசாமா தங்கியுள்ளதாக அமெரிக்க புலனாய்வுத்துறை நீண்ட நாட்களாக நம்பி வந்தது. இதையடுத்து, அமெரிக்காவின் கவனம் முழுக்க அந்த பகுதியில் தான் செலுத்தப்பட்டது. ஆனால், ஒசாமா தங்கியிருந்த அபோதாபாத், பாகிஸ்தானின் ராணுவ கோட்டையாக விளங்கும் பகுதி. தலைநகர் இஸ்லாமாபாத்திலிருந்து, ஒன்றரை மணி நேரத்தில் இந்த நகரை அடைந்து விடலாம். இந்த கட்டடத்திலிருந்து, 300 அடி தூரத்தில் தான், ககுல் ராணுவ அகடமி உள்ளது. அபோதாபாத்தில், பெரும்பாலும், ஓய்வு பெற்ற ராணுவத்தினர் வசிக்கின்றனர்.

ஒசாமா வசித்த வீடு, 18 அடி உயர சுற்றுச்சுவருடன் முள்கம்பி வேலியுடன் கூடிய பாதுகாப்புடன் இருந்தது. இரண்டு தளங்களை கொண்ட, மற்ற வீடுகளை விட, எட்டு மடங்கு பெரிதான இந்த வீட்டில், பெண்கள், குழந்தைகள் வசித்தாலும் கடுமையான பாதுகாப்பு போடப்பட்டிருந்தது.மூன்றாவது தளமான மொட்டை மாடியின் சுற்றுச்சுவர் மட்டும், ஏழு அடி உயரம் கொண்டது. இந்த தளத்தில், அரேபிய பாதுகாவலர் பணியில் ஈடுபட்டிருந்தார். இந்த வீட்டின் வாசலில் உள்ள பெரிய கதவருகே, இரண்டு பாதுகாவலர்கள் பணியில் இருந்துள்ளனர்.ராணுவ அகடமி அமைந்துள்ள இடத்தருகே, ஒசாமா வசித்து வந்துள்ளது, பாகிஸ்தான் ராணுவ புலனாய்வுத் துறைக்கு தெரியாமல் இருந்திருக்காது என, சந்தேகிக்கப்படுகிறது.

இந்நிலையில், பாகிஸ்தான் பழங்குடியினர் வசிக்கும் பகுதியில் கவனம் செலுத்தி வந்தது அமெரிக்க புலனாய்வுத்துறைக்கு, ஒசாமாவுக்கு நெருங்கிய இருவர் மட்டும், அங்கு போய்வந்ததைக் கண்டறிந்தனர்.அவர்கள் இருவரும், செப்., 11 சம்பவத்திற்கு காரணமான காலித் ஷேக்கிற்கு நெருக்கமானவர்கள் என்று அறிந்தனர். அங்கு, போன், "டிவி' போன்ற எலக்ட்ரானிக் சாதனங்கள் கிடையாது. இவ்வளவு பாதுகாப்பான கட்டடத்திற்குள் ஒசாமா இருக்க வேண்டும் என, அமெரிக்க புலனாய்வுத்துறை முடிவு செய்தது.இதையடுத்து, இந்த வீட்டின் காம்பவுண்டிற்கு அருகே, ஹெலிகாப்டரில், கமாண்டோ படையினர் தாக்கினர். ஒசாமாவை வீழ்த்தும் பணி, 40 நிமிடங்கள் நடந்தன. ஒசாமா மட்டும் அல்ல, மொத்தம் மூன்று பேர் சுட்டுக் கொல்லப்பட்டனர்.

இந்த நடவடிக்கையில், ஒரு ஹெலிகாப்டர் பழுதாகி விட்டது. அதை, அங்கேயே செயலிழக்க வைத்தனர். இதையடுத்து, அந்த ஹெலிகாப்டரில் இருந்தவர்கள் பாதுகாப்பாக வெளியேறி விட்டனர். அப்போது, ஒசாமாவின் சடலத்தையும், ஆப்கனில் உள்ள பாக்ரம் என்ற இடத்தில் அமைந்த அமெரிக்க ராணுவ முகாமிற்கு கொண்டு சென்றதாக கூறப்படுகிறது.
தற்போது, ஒசாமாவை வீழ்த்திய இடம் அருகே, கடந்த 23ம் தேதி, சர்வ வல்லமைபடைத்த பாக்., ராணுவ தளபதி கயானி, வீரர்களிடம் பேசும்போது, "பயங்கரவாதத்தின் முதுகெலும்பை முறித்தாகி விட்டது' என்று பேசினார்.

மேலும், கோட்டை போல பாதுகாப்பு அரணில் ஒசாமா வசித்தது பற்றி, உளவுத்துறை நிபுணர் கருத்து தெரிவித்த போது, "இம்மாதிரி கோட்டை போல கட்டடங்கள், அதற்கு சுற்றுச்சுவர், பாதுகாப்பு வசதிகள் என்பது, பத்தான் மக்கள் வழக்கம். அதனால், அதற்கு பெரிய அளவில் அர்த்தம் காண வேண்டியதில்லை' என்றார்.