சகல சமூகங்களையும் திருப்திப்படுத்தும் தீர்வுகளே வெற்றிபெற முடியும்

நாட்டின் சகல சமூகங்களையும் திருப்திப்படுத்தக் கூடிய தீர்வுகளே வெற்றிபெற முடியும். எந்த வொரு தரப்பையும் ஒதுக்கி வைத்துவிட்டு தீர்வுகாண முற்பட்டால் அதில் வெற்றியடைய முடியாது. சுனாமி கட்டமைப்பு என்று திணிக்கப்பட்ட தீர்வு முயற்சி தோல்வியில் முடிந்தது அதற்குச் சான்றாகும். இவ்வாறு ஸ்ரீலங்கா முஸ்லிம் காங்கிரஸ் தேசியத் தலைவரும், நீதியமைச்சருமான ரவூப் ஹக்கீம் தெரிவித்தார்.

ஸ்ரீலங்கா முஸ்லிம் காங்கிரஸின் 23 ஆவது பேராளர் மாநாடு வவுனியா புதிய நகர மண்டபத்தில் ஞாயிற்றுக்கிழமை (15) பிற்பகல் நடைபெற்ற போது அங்கு பிரதான உரையை ஆற்றுகையிலேயே அவர் இதனைக் கூறினார். நூர்தீன் மஷர் அரங்கில் இந் நிகழ்வு இடம்பெற்றது.

ஸ்ரீலங்கா முஸ்லிம் காங்கிரஸின் தேசியத் தலைவரும் அமைச்சருமான ஹக்கீம் மேலும் தெரிவித்ததாவது:-

வன்னிப் பெருநிலப் பரப்பின் நுழைவாயிலாக மதிக்கப்படும். வவுனியாவில் எமது கட்சியின் 23 ஆவது பேராளர் மாநாடு நடைபெறுவதற்கு பிரதான காரணம் இந்த வன்னி மண்ணில் பிரிந்த சென்ற துரோகிகளின் சவால்களுக்கும் அடாவடித்தனங்களுக்கும், அட்டகாசங் களுக்கும் இந்தக் கட்சி முகம் கொடுத்திருப்பதாகும்.

இடம்பெயர்ந்த வன்னி மாவட்ட வாக்காளர்களை மீளக் குடியேறிய இட ங்களில் தேர்தல் இடாப்புகளில் பதிவு செய்வது தொடர்பில் நாம் இன்னமும் அரசாங்கத்துடன் பேசி வருகின்றோம். வன்னியிலும், யாழ்ப்பாணத்திலும் அநேகரது வாக்குரிமை பறிபோவதன் விளைவாகத் தெரிவு செய்யப்படும் பாராளுமன்ற உறுப்பினர்களின் எண்ணிக்கை குறைந்துவரும் ஆபத்து உண்டு.

தீர்வுகளைத் திணிக்க முடியாது. அவை இந் நாட்டில் வாழும் சகல சமூகத்தினரையும் திருப்திப்படுத்துவனவாக இருக்க வேண்டும்.

சுனாமிக் கட்டமைப்புக்கு என்ன நேர்ந்தது என்பது எல்லோருக்கும் தெரியும். சுனாமி பேரவையில் ஏனைய சமூகத்தினரின் இழப்புக்குச் சற்றும் குறையாத இழப்பு இந் நாட்டின் முஸ்லிம் சமூகத்திற்கும் நேர்ந்திருந்தது.

இலங்கையின் மீது அழுத்தங்களைப் பிரயோகிக்க பிறசக்திகள் முயற்சிக்கின்றன. அரசாங்கத்தின் பங்காளிக் கட்சி என்ற முறையில் எமது ஆதரவை நாம் வழங்கி வருகின்றோம்.

வெளிநாட்டு சக்திகள் வீட்டோ (ரத்து) அதிகாரம் கொண்ட வல்லரசு நாடுகளுக்கு ஓர் அணுகுமுறையையும், இலங்கை போன்ற அபிவிருத்தியடைந்து வரும் நாடுகளுக்கு இன்னொரு விதமான அணுகுமுறையையும் கையாள்கின்றன.

அரசாங்கத்தின் பொறுப்புக் கூற வேண்டிய கடப்பாட்டை நாம் ஏற்றுக் கொள்கின்றோம். பிரச்சினைகளுக்கான நியாயமான தீர்வுகளை பேச்சு வார்த்தைகளினூடாகக் காண வேண்டும்.

ஸ்ரீலங்கா முஸ்லிம் காங்கிரஸைப் பொறுத்தவரை நாம் நடுநிலையான போக்கை கடைப்பிடித்து வருகின்றோம்.

நாம் பின்பற்றும் இஸ்லாம் சமயமும் அதனையே வலியுறுத்துகின்றது. எந்தவொரு முடிவையும் நாம் தயக்கமின்றி துணிச்சலுடனேயே மேற்கொள்கின்றோம்.

இந்த நாட்டில் நாம் இரண்டாவது சிறுபான்மை சமூகத்தினராக வாழ்ந்து வருகின்றோம்” பெரும்பான்மைச் சமூகமும், முதலாவது சிறுபான்மைச் சமூகமும் ஆயுதங்களை ஏந்திப் போராடினர்.

ஐந்து வருடங்களுக்கு முன்னர் பெரும்பான்மைச் சமூகம் தோல்வி மனப்பான்மையோடு இருந்தது. கடந்த இரண்டு மூன்று வருடங்களாக முதலாவது சிறுபான்மைத் தமிழ் சமூகம் தோல்வி மனப்பான்மைக்குத் தள்ளப்பட்டிருக்கிறது. ஏதோ ஒரு தரப்பு தோல்வி மனப்பான்மைக்குத் தள்ளப்பட்டு வருகின்றது. இந்நாட்டு முஸ்லிம் சமூகம் ஆயுதம் ஏந்திப் போராடவில்லை. இலங்கை முஸ்லிம்கள் யுத்த நிறுத்த காலத்தில் பாதிப்புக்களைச் சந்தித்திருக்கின்றனர்.

ஸ்ரீலங்கா முஸ்லிம் காங்கிரஸின் வகி பாகத்தையும் அதன் பிரயோக வலுவையும், வீச்சையும் அரசாங்கமும், எதிர்க்கட்சிகளும், சர்வதேச சமூகமும் நன்கு தெரிந்து வைத்துள்ளன.

முஸ்லிம் சமூகத்தை கறுப்புக் கண்ணாடியின் ஊடாகப் பார்க்கின்றனர். பந்தியின் கடைசியில் எமக்கு ஓர் ஆசனத்தைப் போட்டு அதில் அமரச் சொன்னால் அதில் போய் எங்களால் உட்கார முடியாது. அரசியல் துறவறம் பூண வேண்டிய அவசியம் எங்களுக்கு இல்லை. நாம் கோழைகள் அல்ல. வீரியத்துடன் செயற்படுவோம்.