மீண்டும் உருவானது ‘டெசோ’

ராஜபக்ச நம்பவைத்து ஏமாற்றியதாக கருணாநிதி புகார்

கடைசிக்கட்ட போரின்போது கனரக ஆயுதங்களை பயன்படுத்தமாட்டோம் என்று  இலங்கை அதிபர் ராஜபக்ச் நம்ப வைத்து ஏம்மாற்றியதாக இன்று நடைபெற்ற ’டெசோ’  கூட்டத்திற்கு பின்னர் தி.மு.க. தலைவர் கருணாநிதி குற்றம்சாட்டியுள்ளார்.  தி.மு.க. தலைமையகமான அண்ணா அறிவாலயத்தில், இலங்கைத் தமிழர் பிரச்னை  குறித்து,  தமிழ் ஈழம் ஆதரவாளர்களின் சார்பில் கலந்துரையாடல் கூட்டம் நடைபெற்றது. இந்தக் கூட்டத்தில் கருணாநிதி,தி.மு.க. பொதுச் செயலாளர் அன்பழகன், திராவிடர்  கழகத் தலைவர் கி.வீரமணி, சுப்புலட்சுமி ஜெகதீசன், திராவிட இயக்கத் தமிழர்  பேரவையின் பொதுச் செயலாளர் சுப. வீரபாண்டியன் ஆகியோர் கலந்து கொண்டனர். இந்தக் கூட்டத்தில் இலங்கைத் தமிழர் பிரச்சினைக்குத் தீர்வு காண்பதற்கான அமைப்பு  ஒன்று மீண்டும் உருவாக்கப்பட்டது. முன்பு போலவே இந்த அமைப்புக்கு, தமிழ் ஈழம் ஆதரவாளர் அமைப்பு என்று தமிழிலும்;  Tamil Eelam Supporters Organisation (TESO) என்று ஆங்கிலத்திலும்  பெயர் சூட்டப்பட்டது.

இந்த அமைப்புக்கு கருணாநிதி தலைவராகவும்,பேராசிரியர் அன்பழகன்,கி. வீரமணி,  சுப்புலட்சுமி ஜெகதீசன்,சுப. வீரபாண்டியன் ஆகியோர் உறுப்பினர்களாகவும்  தேர்ந்தெடுக்கப்பட்டார்கள். கூட்ட முடிவில், தனித் தமிழீழத்துக்காக பொது வாக்கெடுப்பு நடத்த வேண்டும் என்று  தீர்மானம் நிறைவேற்றப்பட்டது.

இது குறித்து தகவல் தி.மு.க. வெளியிட்ட அறிக்கையில் இடம்பெற்றிருந்தது.மேலும்  ’டெசோ’வின் எதிர்கால குறிக்கோளும் அதில் இடம்பெற்றிருந்தது.

“பல்லாண்டுகளாகப் பாரம்பரியமான முறையில் இலங்கையின் தேசிய இனமாக இருந்து  வரும் தமிழினம்; மனித உரிமைகளும், குடிமை உரிமைகளும் பறிக்கப்பட்டு, இந்த  நூற்றாண்டில் மிகப் பெரிய இனப் படுகொலைக்கு ஆளாக்கப்பட்டு, அணிஅணியான அல்லல்களால் அனுதினமும் அலைக்கழிக்கப்பட்டு வரும் பிரச்னை தீர்வதற்கு தனித்  தமிழ் ஈழம் அமைவதைத் தவிர வேறு தகுந்த வழியில்லை என்ற உண்மை நிலையை  இந்தியத் திருநாட்டின் பிற மாநிலங்களிலும், உலக நாடுகளிலும் உணரச் செய்வதற்கும், தக்க ஆதரவு திரட்டுவதற்கும் உகந்த நடவடிக்கைகள் மேற்கொள்ளுதல்.

தீ ர் மா ன ம் இலங்கையில் நடைபெற்ற போர்க்குற்றங்களுக்காக ஐக்கிய நாடுகள்  அமைப்பின் வாயிலாக அமைக்கப்பட்ட இந்தோனேசிய அரசின் தலைமை வழக்கறிஞரைத்  தலைவராகக் கொண்ட விசாரணைக் குழு, இலங்கை இராணுவத்தினர் ஈழத் தமிழர்கள்  மீது நடத்திய கண்மூடித்தனமான தாக்குதலை உறுதி செய்திருக்கிறது.  வாழ்வுரிமைக்காகப் போராடிய ஈழத் தமிழர்கள் கடத்திச் செல்லப்பட்டு  கொடுமைப்படுத்தப்பட்டதற்கும், மனித உரிமை மீறல்களுக்கும் ஆதாரங்கள் இருப்பதாகக்  கூறியுள்ளது.

இந்தக் குழுவின் அறிக்கை 2011, ஏப்ரல் 25 ம் தேதியன்று நியூயார்க்கில்  வெளியிடப்பட்டது. விடுதலைப் புலிகளுக்கு எதிரான போரின் இறுதிக் கட்டத்தில்  இலங்கை ராணுவம், 40 ஆயிரத்துக்கும் அதிகமான அப்பாவித் தமிழர்களைக் குண்டு  போட்டுக் கொன்றதோடு; போர்க் கைதிகளையும் கொடூரமாகச் சுட்டு அழித்தது என்றும்;  வீராங்கனைகள் பலாத்காரம் செய்யப்பட்டனர் என்றும் அந்த அறிக்கையிலே  சுட்டிக்காட்டப்பட்டுள்ளன.

இலங்கைப் போர்க் குற்றங்கள் பற்றி ஐ.நா. குழு பரிந்துரைத்துள்ளவாறு சர்வ தேச  விசாரணை ஆணையத்தை அமைத்து விசாரணை நடத்தி, குற்றங்களுக்குக்  காரணமானவர்கள் மீது உரிய நடவடிக்கை எடுக்கப்பட வேண்டும் என்றும், அதற்கு

வேண்டிய அனைத்து முயற்சிகளிலும் இந்திய அரசு உடனடியாக ஈடுபட வேண்டும்  என்றும்; திராவிட முன்னேற்றக் கழகத்தின் உயர்நிலை செயல் திட்டக் குழு மத்திய  அரசை வலியுறுத்தி ஏற்கனவே தீர்மானம் வாயிலாகக் கேட்டுக் கொண்டுள்ளது.

இலங்கையில் போர் முடிந்த பிறகு தமிழர் பகுதிகளை சிங்கள ராணுவம் ஆக்கிரமித்து  நிற்கின்றது. தமிழர் பகுதிகள் எல்லாம் சிங்கள மயமாக்கப்பட்டு வருவதாகவும்; தமிழ்  ஊர்ப் பெயர்கள் கூட சிங்களப் பெயர்களாக மாற்றப்படுவதாகவும்; இந்துக் கோவில்கள்,  கிறித்துவத் தேவாலயங்கள் மற்றும் இஸ்லாமியர் மசூதிகள் ஆகியவை புத்த  விகாரங்களாக மாற்றப்படுவதாகவும் செய்திகள் வருகின்றன.

இந்த நிலையில் தனி ஈழம் அமைவதற்கு தமிழர்கள் மத்தியில், ஜனநாயக முறையில்  பொது வாக்கெடுப்பு நடத்தி முடிவு செய்திட வேண்டும் என்பது தான் இலங்கைத்  தமிழர்கள்பால் அன்பும், அக்கறையும் கொண்டுள்ள அனைவரது கருத்தாக இருக்கிறது.  ஐக்கிய நாடுகள் மன்றத்தின் தலையீட்டினையடுத்து இதைப்போல பொது வாக்கெடுப்பு  நடத்தப்பட்டு; கொசோவோ, தெற்கு சூடான், கிழக்கு திமோர், மாண்டிநீக்ரோ  போன்றவை தனி நாடுகள் என்ற அங்கீகாரத்தை ஏற்கனவே பெற்றிருக்கின்றன. அதன்  அடிப்படையில் இலங்கையில் வாழும் தமிழர்கள் மற்றும் புலம் பெயர்ந்து வெளிநாடுகளில்  வாழும் இலங்கைத் தமிழர்கள் மத்தியில் பொது வாக்கெடுப்பு நடத்த வேண்டும்;  இலங்கையில் தமிழர் பகுதிகளில் புதியதாகக் குடியேற்றப்பட்ட சிங்களவர்களுக்கு இந்தப்  பொது வாக்கெடுப்பில் வாக்குரிமை வழங்கப்படக் கூடாது; நடத்தப்படும் பொது  வாக்கெடுப்பு முடிவின்

அடிப்படையில் தனி ஈழம் அமைவதற்கு ஐக்கிய நாடுகள் மன்றம் முயற்சிகளை  மேற்கொள்ள வேண்டும்; அதற்கு நமது இந்திய அரசு தேவையான ஒத்துழைப்பினையும்  ஆதரவினையும் நல்குவதோடு; ஐ.நா. மன்றத்திலும், உலக அமைப்புகளின் மூலம்  சர்வதேச அரங்கிலும் உரிய அழுத்தத்தையும் தர வேண்டும். தமிழ் ஈழம் குறித்த  முடிவை தமிழர்களின் விருப்பத்துக்கே விட்டு விடுவது என்ற நிலையை ஐ.நா. மன்றம்  விரைவில் மேற்கொள்ள இருக்கிறது. தமிழ் ஈழம் குறித்த வாக்கெடுப்பு ஒன்று புலம்  பெயர்ந்த ஈழத் தமிழர்கள் மத்தியில் உலக நாடுகளில் நடந்து வருகிறது. இதன் மூலம்  வட்டுக்கோட்டை தீர்மானம் என்ற ஈழப் போராட்டத்தின் அடிப்படைச் சாசனத்தை  சர்வதேசம் அங்கீகரிக்கும் நிலை

தனித் தமிழ் ஈழம் விரைவில் அமைந்திட, ஐ.நா. மன்றம், தமிழர்கள் வாழும்  பகுதிகளில் பொது வாக்கெடுப்பினை விரைவிலே நடத்திட வேண்டுமென்றும்; அதற்கு  நமது இந்தியப் பேரரசு எல்லாவிதமான முயற்சிகளையும் மேற்கொள்ள வேண்டுமென்றும்;  இன்று உருவாகியுள்ள தமிழ் ஈழம் ஆதரவாளர் அமைப்பு இந்தத் தீர்மானத்தின் மூலமாக  வலியுறுத்திக் கேட்டுக் கொள்கிறது” என அதில் மேலும் கூறப்ப்ட்டிருந்தது.

ராஜபக்ச தூரோகம்:

கூட்டம் முடிவடைந்த பின்னர் செய்தியாளர்களை சந்தித்த கருணாநிதியிடம், இப்போது  தமிழீழம் குறித்து இவ்வளவு பேசுகிற நீங்கள் 2009 ல் போரை தடுத்து நிறுத்தாது ஏன்?  என்பது உள்ளிட்ட பல கேள்விகளை நிருபர்கள் சரமாரியாக கேட்டனர்.

ஆனால் பெரும்பாலான கேள்விகளுக்கு முந்தைய காலக்கட்டத்தில் கூறியதையே மீண்டும்  கூறிய அவர்,கடைசிக் கட்டபோரின்போது போரை நிறுத்துவதாகவும்,கனரக ஆயுதங்களை  பயன்படுத்த மாட்டோம் என்றும் இலங்கை அதிபர் ராஜபக்ச வாக்குறுதி அளித்தார்.

அவரது இந்த வாக்குறுதியை காங்கிரஸ் தலைவர் சோனியா காந்தி மற்றும் மத்திய  உள்துறை அமைச்சர் ப.சிதம்பரம் என்னிடம் தெரிவித்ததன் அடிப்படையிலேயே,  மெரினா கடற்கரையில் போரை நிறுத்தக் கோரி இருந்த உண்ணாவிரத்ததை  கைவிட்டேன்.ஆனால் ராஜபக்ச நம்பவைத்து ஏமாற்றிவிட்டார்” என கூறினார். 

தொடர்ந்து பேசிய அவர்,” "ஆட்சியில் இல்லாத போதுதான் இலங்கை பிரச்னையை நான் தீவிரமாக கையில் எடுப்பதாக சிலர் கூறுகிறார்கள்.
 
ஆட்சியில் இருக்கும் போதும், இல்லாத போதும் இலங்கை தமிழர்களின் உரிமைக்காகவும் நல்வாழ்வுக்காகவும் வாதாடி இருக்கிறோம்.போராடி இருக்கிறோம். அமைதிப்படை என்ற பெயரால் இலங்கையில் தமிழர்கள் அழித்தொழிக்கப்பட்டனர். அந்த அமைதிப்படை இந்தியா வந்தபோது அன்று முதலமைச்சராக இருந்த நான் வரவேற்க செல்லவில்லை.அதனால் ஆட்சியை இழக்கவும் தயாராக இருந்தவர்கள் நாங்கள்.
 
இலங்கையில் போர் உச்சகட்டத்தில் இருந்தபோது அதை நீங்கள் தடுக்க தவறியதாகவும், இப்போது 'டெசோ' அமைப்பை கையில் எடுத்திருப்பதாகவும் விமர்சிக்கிறார்கள்.விமர்சிப்பவர்களைப் பற்றி கவலை இல்லை.என்னையோ, டெசோ அமைப்பையோ விமர்சிப்பது அவர்களாகவே இந்த அமைப்புக்கு தரும் விளம்பரமாகவே கருதுகிறேன். ஆட்சியை இழந்ததால் இதை உருவாக்கவில்லை.
 
போர் முடிந்த பிறகு உருவாக்கப்பட்ட இந்த அமைப்பால் ஈழ தமிழர்களுக்கு எந்த அளவுக்கு உதவ முடியும்? எனக்கேட்கப்படுகிறது.முன்னேற்றம் ஏற்படும் என்ற நம்பிக்கையில் இருக்கிறோம்.அறவழியில் அனைத்து நாட்டு ஆதரவையும் திரட்ட இருக்கிறோம். இதற்கு அனைவரும் ஆக்கமும் ஊக்கமும் தர வேண்டும்” என்றும் அவர் கூறினார்.

பிரபாகரன் உயிருடன் இருக்கிறாரா? இல்லையா? என்ற கேள்விக்கு ப்திலளித்த கருணாநிதி,”போராளிகளுக்கு எப்போதும் சாவு இல்லை”என்றார்.

மத்திய அரசு உதவி செய்யாவிட்டால் ஆட்சியில் இருந்து விலகுவீர்களா? என்று கேட்டபோது,”உதவி பெற முயற்சிக்கிறேன்.முயற்சி வெற்றி பெறும் என்று நம்புகிறோம். இலங்கைக்கு எதிரான தீர்மானத்தை இந்தியா ஆதரித்தது தி.மு.க.வால் என்பதை மறந்து விடக்கூடாது” என்றார்.
 
புலிகள் மீண்டும் போராடினால் 'டெசோ' ஆதரிக்குமா? என்ற கேள்விக்கு பதிலளித்த கருணாநிதி,”ஜனநாயக வழியில் போராட வேண்டும் என்று கேட்டுக் கொள்வோம்”என்றார்.
 
இந்த அமைப்பின் அடுத்த கட்ட நடவடிக்கை தமிழ்நாடு முழுவதும் இந்த அமைப்பை பரப்புவது.மக்களிடையே ஆதரவை திரட்டுவது.தமிழ் ஈழம் பெற ஜனநாயக வழிமுறைகளை கடைபிடிப்பது.அதற்கு மத்திய அரசு ஒத்துழைக்க வலியுறுத்துவது என்றும் அவர் மேலும் கூறினார்.
 
”ஜனாதிபதி வேட்பாளர் யார் என்று மத்திய அமைச்சர் அந்தோணி சொன்னாரா? என்று கேட்டபோது,”என்னிடம் சொன்னார். ஆனால் உங்களிடம் சொல்ல வேண்டாம்”என்றார்.
 
நீங்கள் யார் ஜனாதிபதியாக வர வேண்டும் என்று விரும்புகிறீர்கள் எனக்கேட்டபோது,நல்ல ஜனாதிபதி வர வேண்டும் என்று பதிலளித்தார் கருணாநிதி.