நேட்டோ மாநாடும் நேச நாடுகளின் நலனும்

நேட்டோ அமைப்பின் மாநாடு இன்றும் நாளையும் அமெரிக்காவின் சகானோ மாநிலத்தில் நடைபெறுகின்றது. ஜனாதிபதி பராக் ஒபாமாவின் தாயக மாநிலத்தில் நடைபெறவுள்ள இந்த மாநாட்டின் தீர்மானங்கள் எதிர்கால செயற்பாடுகள் என்பன பராக் ஒபாமாவின் அடுத்த அரசியல் தலைவிதியை தீர்மானிப்பதில் பெரும் பங்காற்றும் என்பது எல்லோரதும் எதிர்பார்ப்பு. நேட்டோவின் இராணுவ நடவடிக்கைகள் கடந்த ஒரு தசாப்தமாகப் பாரிய சவால்களைச் சந்தித்து வரும் சூழ்நிலையில் இன்று மாநாடு ஆரம்பமாகியுள்ளது.

1999ம் ஆண்டு நேட்டோ மாநாடு கடைசியாக நடைபெற்ற பின்னர் இன்று இந்த அமைப்பின் தலைவர்கள் ஒன்றுகூடியுள்ளனர். 1949ம் ஆண்டு இந்த நேட்டோ அமைப்பு ரஷ்யாவின் சவாலுக்கு எதிராகத் தோற்றம் பெற்றது. இன்றைக்கு 28 நாடுகள் இந்த அமைப்பிலுள்ளன. அமெரிக்கா, கனடா, பிரிட்டன், பிரான்ஸ், டென்மார்க், பெல்ஜியம், ஐஸ்லாந்து, இத்தாலி, நோர்வே, நெதர்லாந்து உள்ளிட்ட முக்கிய நாடுகளும் நேட்டோவில் உள்ளதுடன் சோவியத் யூனியன் உடைந்து சிதறிய போது அதிலிருந்த சில நாடுகளும் இதில் இணைந்து கொண்டன. நேட்டோவின் தலைமைக் காரியாலயம் லண்டனில் இயங்கி பின்னர் பிரான்சுக்கு மாற்றப்பட்டு 1966ம் ஆண்டு நிரந்தரமாக புருஸெல்ஸிற்கு மாற்றப்பட்டது. பாதுகாப்பையே முக்கிய இலக்காகக் கொண்டு நேட்டோ செயற்படும். 1999ம் ஆம் ஆண்டு நேட்டோ மாநாடு கூடிய இரண்டு வருடத்தில் 2001 அமெரிக்காவின் இரட்டைக் கோபுரம் தாக்கப்பட்டதன் எதிரோலியே நேட்டோவின் கட்டமைப்பையும் கடமைகளையும் கூர்மையடையச் செய்தன. பயங்கரவாதத்துக்கெதிரான போர் என்ற பெயரோடு பல நாடுகளில் படையெடுக்கப்பட்டன.

இந்தப் படையெடுப்புக்களின் எச்ச சொச்சங்களை லிபியா, ஈராக், ஆப்கானிஸ்தான், பாக்கிஸ்தான், சோமாலியா போன்ற நாடுகளில் காணலாம். அமெரிக்கா தலைமையிலான நேட்டோவின் படையெடுப்புகள், இராணுவ நடவடிக்கையால் எத்தனையோ நாடுகளில் ஆட்சிமாற்றங்கள்- புரட்சிகள் ஏற்பட்டுள்ளன. நீண்டகாலமாக தொடரும் இந்த இராணுவ நடவடிக்கைகளால் நேட்டோ அங்கத்துவ நாடுகளிடையே இழுபறிகள். மனக் கசப்புகளும் ஏற்பட்டமை தெரிந்ததே. சர்வதேச பயங்கரவாதம் ஆழமாக பலநாடுகளிலும் அகலக் காலூன்றியுள்ளதால் நேட்டோவைப் பயன்படுத்த வேண்டுமென்ற தேவையுடனே இன்றைய மாநாடு ஆரம்பித்துள்ளது.

ஆப்கானிஸ்தானைக் கட்டி எழுப்புதல், பாகிஸ்தான் சிரியா, யெமன் உள்ளிட்ட நாடுகளின் எதிர்கால நிலைமைகள் பாதுகாப்புகள் அமெரிக்கா, ஐரோப்பாவிற்கு பயங்கரவாதத்தால் ஏற்படுள்ள அபாயங்கள் அவற்றை இல்லாமற் செய்வதற்கான உபாயங்கள் இந்த இரண்டு நாள் மாநாட்டில் சூடுபிடிக்கும். பாகிஸ்தானில் நேட்டோ விமானங்களின் குண்டு வீச்சக்களால் ஏற்பட்டுள்ள வொஷிங்டன்- இஸ்லாமாபாத் முரண்பாடுகளைக் களையவும் இங்கு முயற்சி மேற்கொள்ளப்படும். அண்மையில் பாகிஸ்தான் பாராளுமன்றத்திலும் அமைச்சரவையிலும் கைபர் கணவாயை மீண்டும் திறந்த ஆப்கானிஸ்தானுடனான எல்லைகளைத் திறப்பது சம்பந்தமாகக் கடுமையான விவாதங்கள் இடம்பெற்றன. பாகிஸ்தான் பிரதமர் நேட்டோ மாநாட்டில் பங்கேற்றுள்ளார். சர்வதேச நாடுகளின் தலைவர்களால் கடுமையான அழுத்தங்களை எதிர்கொண்டுள்ள இஸ்லாமாபாத் வேறு வழியின்றி கைபர்கணவாயை மீண்டும் திறக்கும்.

இதன் மூலம் ஆப்கானிஸ்தானிலுள்ள ஆயிரக்கணக்கான நேட்டோ வீரர்களுக்கான உணவு, மருந்து, ஆயுதம், எரிபொருள் என்பன மீண்டும் கொண்டு செல்லப்பட பாகிஸ்தான் சம்மதிக்கும் என்று எல்லோரும் எதிர்பார்க்கின்றனர். நேட்டோ படைகளின் விமானக் குண்டு வீச்சில் 21 பாகிஸ்தான் இராணுவ வீரர்கள் கொல்லப்பட்டனர். இவ்வாறான விமானத்தாக்குதல்களில் நூற்றுக்கணக்கான அப்பாவி பொதுமக்கள் செயல்படுகின்றமை பாகிஸ்தானில் சாதாரண விடயமாகிப் போய்விட்டது. பெண்கள், குழந்தைகள், வயோதிபர்கள் என்று வகைதொகையின்றி பொதுமக்கள் கொல்லப்படுவதால் பாகிஸ்தானில் அடிக்கடி ஆர்ப்பாட்டங்கள், வன்முறைகள் என்பன எழுவதுண்டு. கடைசியாக 21 இராணுவ வீரர்கள் பலியானதையடுத்து பாகிஸ்தான் அரசாங்கம் ஆப்கானிஸ்தான் எல்லையுடனான கைபர்கனவாய் பாதையை முடியது. இதனால் அமெரிக்காவும் நேட்டோவும் வழியின்றித் தவித்தது.

இந்தப் பாதை தொடர்ந்தும் முடப்பட்டுக் கிடந்ததால் ஆப்கானிஸ்தானிலுள்ள நேட்டோபடையினர் பட்டினியால் வாட பேண்டிவரும். இதனால் இவ்வளவு முக்கியம் வாய்ந்த பாதையை திறக்கவைக்கவும், வொஷிங்டன்- இஸ்லாமாபாத் உறவுகளைத் தொடர்ந்து பேணவும் நடவடிக்கை எடுக்கப்பட்டுள்ளது. 2014ம் ஆண்டுக்குள் ஆப்கானிஸ்தானிலிருந்து நேட்டோ படைகள் அனைத்தும் வாபஸ் பெறப்படவுள்ளன. இன்னுமுள்ள இரண்டு வருடங்களில் ஆப்கானிஸ்தான் வீரர்களை நன்றாகப் பயிற்றுவிக்க வேண்டியுள்ளது. எஞ்சியுள்ள தலிபான், அல்கைதா முகாம்களையும் போராளிகளையும் அழித்து ஒழிக்க வேண்டிய தேவையும் உள்ளது. இதனால் கைபர் கணவாயைத் திறந்தே ஆகவேண்டும் என்ற தேவை நேட்டோவுக்கு எழுந்துள்ளதில் வியப்பில்லை. பாகிஸ்தானின் எண்ணெய் விநியோக கம்பனியின் தலைவரை தொலைபேசியில் தொடர்பு கொண்ட அந்நாட்டின் பெற்றோலிய வளத்துறை அமைச்சர் கணவாய்ப் பாதைகள் திறக்கப்படவுள்ளதால் எண்ணெய், பெற்றோல் என்பவற்றை தயார் நிலையில் வைக்குமாறு உத்தரவிட்டுள்ளார்.

நாற்பது அடி நீளமுள்ள பாரிய கெண்டைனர்களில் எண்ணெய் எடுத்துச்செல்ல 100 டொலர் அறவிடப்பட்டது. இப்போது 320 அமெரிக்க டொலரிலிருந்து 500 அமெரிக்க டொலர்வரை இந்த கெண்டெய்னர்களில் ஏற்றிச் செல்லும் எண்ணெய்களுக்கு அறவிடப்படவுள்ளன. இதே போல மருந்து, உடை, ஆயுதம் உள்ளிட்டவையும் கைபர் கணவாயூடாக மீண்டும் ஆப்கானிஸ்தானுக்கு எடுத்துச் செல்லப்படவுள்ளதால் கைபர் கணவாய் பாதைகளிலுள்ள பிரேஞ்சுப் பாதுகாப்புகள் பலப்படுத்தப்பட்டுள்ளன.

ஏ.ஜீ.எம். தெளபீக்