தேர்தல் நடந்தால் பா.ஜ.வெற்றி பெறும்?

2 ஜி ஸ்பெக்ட்ரம் ஊழல், உலக அரங்கில் இந்தியாவின் மரியாதையை சீர்குலைத்து விட்டதாக 54 சதவிகிதம் பேர் குற்றம் சாட்டியுள்ளனர். இந்த ஊழலில் ப. சிதம்பரத்துக்கு பங்கு இருக்காது என்று 10 சதவிகிதம் பேர் மட்டுமே நம்பிக்கை தெரிவித்துள்ளனர். பாராளுமன்றத்துக்கு இப்போது தேர்தல் நடந்தால், பாரதீய ஜனதா வெற்றி பெறும் என்று கருத்துக்கணிப்பு ஒன்றில் தெரிய வந்துள்ளது. ஐக்கிய முற்போக்கு கூட்டணி ஆட்சி மீது தற்போது பெரும் அதிருப்தி ஏற்பட்டுள்ளது. குறிப்பாக விலைவாசி உயர்வு, ஊழல்கள், ஊழல்கள் மீது நடவடிக்கையின்மை, கட்சிக்குள்ளேயே பெரும் குழப்பம், மூத்த தலைவர்கள் பலர் மீது செக்ஸ் புகார் என்று காங்கிரஸ் தலைமை மத்திய அரசு தத்தளித்து வருகிறது.

தற்போதைய அதிருப்தி நிலையில் தேர்தல் வந்தால் மக்கள் யாருக்கு ஓட்டு போடுவார்கள் என்று ஏ. பி. பி. நியூஸ் - ஏசி நீல்சன் நிறுவனம் கருத்துக் கணிப்பு நடத்தியது. நாடு முழுவதும் மொத்தம் 28 நகரங்களில் ஏப்ரல் மற்றும் மே மாதங்களில் இந்த சர்வே மேற்கொள்ளப்பட்டது.

இந்தக் கருத்துக் கணிப்பில் சில விவரங்கள் தெரியவந்தன.

பாராளுமன்றத்துக்கு இப்போது தேர்தல் நடந்தால் பாரதீய ஜனதா ஆட்சியை பிடிக்கும். பெரிய அளவில் வெற்றி வித்தியாசம் இருக்காது. பாரதீய ஜனதாவுக்கு 28 சதவிகிதமும் காங்கிரசுக்கு 20 சதவிகிதமும் ஓட்டுக்கள் கிடைக்கும்.

கடந்த 2009 ல் காங்கிரஸ் கட்சிக்கு வாக்களித்தவர்கள்

மீண்டும் அக்கட்சிக்கே வாக்களிக்க முடிவு செய்துள்ளனர். ஆனால், நடுநிலை வாக்காளர்களில் 31 சதவிகிதம் பேர் காங்கிரஸ் கட்சிக்கு எதிரான நிலையை எடுத்துள்ளனர். அவர்களில் 12 சதவிகிதத்தினர் பாரதீய ஜனதாவுக்கு வாக்கு போட தீர்மானித்துள்ளனர்.

அதே சமயம், கடந்த தேர்தலில் பாரதீய ஜனதாவுக்கு ஓட்டுப் போட்ட நடுநிலை வாக்காளர்களில் 2 சதவிகிதம் பேர் மட்டுமே இந்த முறை காங்கிரசுக்கு ஓட்டுப் போட இருப்பதாக கூறியுள்ளனர்.

மொத்தத்தில் காங்கிரஸ் கட்சிக்கு 8 சதவிகிதம் ஓட்டிழப்பு ஏற்படும். ஆனால், அந்தப் பலன் முழுமையாக பாரதீய ஜனதாவுக்கு போகாது.

ஒரு சதவிகிதம் மட்டுமே பாரதீய ஜனதாவுக்கு கிடைக்கும். மீதி ஓட்டுக்கள் மாநில கட்சிகளுக்கு செல்லும். பிரதமர் பதவிக்கு யார் வர வேண்டும்? என்ற கேள்விக்கு குஜராத் முதலமைச்சர் நரேந்திர மோடிக்கு 17 சதவிகிதம் பேரும், மன்மோகன் சிங்குக்கு 16 சதவிகிதம் பேரும் ஆதரவு தெரிவித்துள்ளனர். கடந்த ஆண்டு நடந்த கருத்துக் கணிப்பில் நரேந்திர மோடிக்கு 12 சதவிகிதம் பேர் மட்டுமே ஆதரவு தெரிவித்து இருந்தனர். கடந்த ஆண்டு சர்வேயில் மன்மோகன்சிங் 21 சதவிகிதம் ஆதரவை பெற்றிருந்தார்.

ராகுல் காந்திக்கு 19 சதவிகிதம் பேரும், சோனியாவுக்கு 14 சதவிகிதம் பேரும் ஆதரவாக கருத்து தெரிவித்து இருந்தனர்.

தற்போதைய கருத்துக் கணிப்பில் இவர்கள் இருவரின் செல்வாக்கு குறைந்துள்ளது.

ராகுலுக்கு 12 சதவிகிதம் பேரும், சோனியாவுக்கு 9 சதவிகிதம் பேரும் வாக்களித்துள்ளனர். விலை உயர்வு, ஊழல் போன்ற விஷயங்கள் காங்கிரசுக்கு கெட்ட பெயரை ஏற்படுத்தி உள்ளன.

இவ்வாறு கருத்துக் கணிப்பில் தெரிய வந்துள்ளது.