பாலையூற்று தூய லூர்து திருநாள் இன்று

தூய லூர்து அன்னையின் வருடாந்த வைபவம் மிக விமர்சையாக இன்று பாலையூற்றில் கொண்டாடப்படுகி ன்றது. திருநாளில் அடையாளமாக அன்னையின் விழாக் கொடி கடந்த 18 ஆம் திகதி ஆலய வளவில் அடியார்களின் பங்களிப்புடன் ஏற்றி வைக்கப்பட்டது. இந்த ஆரம்ப வைபவத்தில் திருகோணமலை மாவட்டத்தை சார்ந்த கிறிஸ்தவ மக்கள் கலந்துகொண்டு சிறப்பித்தனர். அன்னையின் ஆலயம் திருகோணமலை நகரிலிருந்து சுமார் மூன்று மைல்களுக்கப்பால் அமைந்துள்ள பாலையூற்று எனும் பிரதேசத்திலுள்ளது. இப்பிரதேசம் அன்று கொடிய மிருகங்களின் அட்டகாசத்தை கொண்ட ஒரு பிரதேசமாகும். இன்று இப்பிரதேசம் மிகவும் அபிவிருத்தியடைந்து பல துறைகளிலும் முன்னேற்றம் கண்ட பிரதேசம் என்று கூறினால் தவறில்லை.

19 ஆம் நூற்றாண்டில் எமது நாடு முழுவதும் ‘வைசூரி’ எனும் கொடிய நோய் பரவி இருந்தது. இந்த கொடிய நோயால் மக்கள் ஆயிரக் கணக்கில் இறக்க நேரிட்டது.

அவ்வேளையில் திருமலை – மட்டு நகர் மறைமாவட்ட ஆயராக செயல்பட்ட அதிவணக்கத்திற்குரிய ஹெம்பேக்கர் அடிகளார் அன்னையின் திருமுகம் பார்த்து மன்றாடினார்.

அவரின் மன்றாட்டம் ஏற்றுக்கொள்ளப்பட்டு அந்த கொடிய நோயான வைசூரி இருந்த இடம்தெரியாமல் ஓடி ஒளிந்து கொண்டது.

மக்கள் சாவிலிருந்து காப்பாற்றப்பட்டனர். அதற்கு நன்றிக்கடனாக அன்றைய ஆயர் அன்னைக்கு பாலையூற்றுப் பகுதியில் அழகான ஆலயமொன்றை அமைத்தார். அது ஆரம்பத்தில் யாத்திரிகர் ஸ்தலமாக இருந்தது.

நாளடைவில் அன்னையின் ஆலயம் சகல தேவைகளையும் பூர்த்தி செய்யும் சிறப்பான ஆலயமாக திகழ்ந்தது. பங்குத் தந்தையர்கள், மற்றும் அங்குள்ள மக்களின் பங்களிப்பால் இன்று பாலையூற்று லூர்து ஆலயம் பாரிய அபிவிருத்தியடைந்துள்ளதை காணக்கூடியதாகவுள்ளது.

அந்த ஆலயம் துரித அபிவிருத்தியடைய காரணமாக இருந்தவர்கள், அப்பங்கிற்கு கடமையின் நிமித்தம் இட மாற்றலாக வரும் சகல பங்குக் குருமார்களே. அவர்கள் தத்தமது காலப் பகுதியில் தங்களது பெயர் நிலைகக் மிக அற்புதமான அடிப்படைத் தேவைக்கான பல மேம்பாட்டுப் பணிகளை அங்கு புரிந்துள்ளார்கள்.

அன்றைய வடக்கு – கிழக்கு மாகாண கல்வி அமைச்சுக் கூட அன்னை லூர்துவின் பெயரில் அங்கு பாடசாலை ஒன்றை நிர்மாணித்துக் கொடுத்துள்ளது. உண்மையில் அந்தப் பாடசாலை அங்குள்ள மாணவர்களுக்கு ஓர் அரிய வரப்பிரசாதமென்றே கூற வேண்டும்.

ஏனெனில் பாலையூற்றில் இருந்து திருகோணமலை நகருக்கு செல்ல வேண்டுமெனில் மூன்று மைல் தூரத்தை கடக்க வேண்டும். ஆனால் காலத்தையும், பணத்தையும் மிகுதிப்படுத்த அங்குள்ள மாணவர்களுக்கு அப்பாடசாலை உதவியுள்ளது. இதைவிட கல்வி அபிவிருத்திக்கான பல அடிப்படை வசதிகள் கூட அங்கு முழுமையடைந்துள்ளன.

அன்னை லூர்து தன்னை அண்டிவரும் அடியாளர்களை என்றுமே கைவிட்டதில்லை. அவரின் அருளும், ஆசியும் பெற்று பலன் பெற்றவர்கள் பலர்.

தூய அன்னை லூர்துவின் ஆலயம் திருகோணமலை மாவட்டத்தில் பழமை வாய்ந்ததும், வரலாற்று முக்கியத்துவம் வாய்ந்த ஆலயங்களில் அதுவும் ஒன்றாகும்.

அன்னையின் ஆலயம் அமைந்துள்ள இடம் அடர்ந்த காட்டுப் பகுதியாக அன்று காட்சியளித்தாலும் இன்று பல புதிய குடியேற்றங்களினால் அப்பகுதி அச்சம் பீதியற்ற பகுதியாக காட்சியளிக்கின்றது.

கொடிய மிருகங்கள் அன்று அங்கு வாழ்ந்தமைக்கான பல தடயங்கள் இன்று கூட அங்கு காணக்கூடியதாகவுள்ளது. இயற்கை அழகினால் நிரம்பி வழியும் திருகோணமலை நகர்ப்புறத்திற்கு அன்னையின் ஆலயப் பகுதியும் மேலும் மெருகூட்டுகின்றது.

அன்னையின் பெயரில் இலங்கையில் பல ஆலயங்களை காணக்கூடியதாக இருந்தாலும் அதில் மிகவும் பிரசித்தம் பெற்ற ஆலயம் இராகம தேவத்தை பகுதியிலுள்ளது.

இராகம பிரதேசத்திலுள்ள மக்கள் தூய லூர்து அன்னையின் பேரில் மிகுந்த பக்தியை வைத்துள்ளார்கள். அதற்கு நல்லதொரு உதாரணம்தான் அப்பகுதியிலுள்ள வீதி ஓரங்களிலும், வீடுகளிலும், அன்னையின் திருச் சுருபங்களை வைத்து மக்கள் வழிபடுவதே.

கருங்கற் குகைக்குள் தனது இரு கரங்களையும் கூப்பிய வண்ணம் வானத்தை அன்னார்ந்து பார்த்து முற்ரோசா செடியை காலால் மிதித்துக் கொண்டு காட்சி தரும் அன்னை லூர்து பலரின் குடும்பக் காவலராக விளங்குகின்றார்.

பலர் தங்கள் பெண் குழந்தைகளுக்கு அன்னையின் பெயரைச் சூடி வைத்திருப்பதன் மூலம் அவர் மேல் உள்ள பக்தியை அது வெளிக்காட்டு கின்றது.

இன்று நமது நாட்டில் ஓர் அமைதியான சூழல் நீண்ட காலத்திற்குப் பின் நிலவுகின்றது. இந்தச் சூழல் நீடித்து நிலைக்க வேண்டுமென்பது அனைவரினதும் அவா. ஆனால் இடைக்கிடையே ஏற்படும் அமைதியற்ற சூழலினால் பலர் பல அசெளகரியங்களு க்கும் அனர்த்தங்களுக்கும் உள்ளாகி வருகின்றனர். இவைகள் நீடிக்காமல் நிரந்தரமான சுதந்திர நிலையும், அமைதியான சூழலும் எம் அனைவருக்கும் கிடைக்க வேண்டுமென்று இன்றைய திருநாளில் விசேடமாக பிரார்த்திப்போமாக.