ஜனாதிபதி தேர்தல் முடிவுக்கு எதிராக எகிப்தில் மக்கள் ஆர்ப்பாட்டம்

எகிப்து ஜனாதிபதி தேர்தலின் இரண்டாம் சுற்றில் போட்டியிட தகுதிபெற்ற ஹொஸ்னி முபாரக் அரசில் பிரதமராக இருந்த அஹமட் ஷபிக்கின் அலுவலகம் எதிர்ப்பாளர்களால் தீ மூட்டப்பட்டுள்ளது. அத்துடன் சட்டவிரோதமான தேர்தல் செயற்பாடுகளுக்கு எதிராக எகிப்தின் பல்வேறு நகரங்களில் மக்கள் ஆர்ப்பாட்டத்தில் ஈடுபட்டனர். கெய்ரோவில் உள்ள அஹமட் ஷபிக்கின் தேர்தல் அலுவலகம் நேற்று முன்தினம் இரவு இனந்தெரியாதோரால் தீ மூட்டப்பட்டது. எகிப்து ஜனாதிபதி தேர்தல் ஆணையம் முதல் சுற்று தேர்தல் முடிவுகளை உத்தியோகபூர்வமாக அறிவித்து ஒரு சில மணி நேரங்களிலேயே ஷபிக்கின் அலுவலகம் தீ மூட்டப்பட்டுள்ளது.

எனினும் இந்த தீவைப்பு சம்பவத்தால் எவருக்கும் காயம் ஏற்படவில்லை என்றும் தீ உடனடியாக கட்டுப்பாட்டுக்குள் கொண்டு வரப்பட்டதாகவும் தீயணைப்பு குழுவினர் தெரிவித்தனர்.

தீமூட்டப்பட்டபோது தாம் அலுவலகத்திற்குள் இருந்ததாக அஹமட் ஷபிக்கின் தேர்தல் பிரசார அதிகாரிகள் குறிப்பிட்டுள்ளனர். தம்மை அடையாளப்படுத்தாத ஒரு சிலர் பிரசார போஸ்டர்கள் வைக்கப்பட்டிருந்த அலுவலகத்தின் வாகன தரிப்பிடத்திற்கு தீவைத்ததாக அவர்கள் குறிப்பிட்டுள்ளனர்.

இதனிடையே அஹமட் ஷபிக் இரண்டாவது சுற்று ஜனாதிபதி தேர்தலுக்கு தகுதி பெற்றுள்ளதற்கு எதிர்ப்பு தெரிவித்து 2000 க்கும் மேற்பட்ட ஆர்ப்பாட்டக்காரர்கள் கெய்ரோவின் தஹ்ரியார் சதுக்கத்தில் நேற்று முன்தினம் ஒன்று கூடினர். இதுதவிர ஷபிக்கிற்கு எதிராக அலக்சான்ட்ரியா, சுயெஸ் மற்றும் போர்ட் நகரங்களில் ஆர்ப்பாட்டக்காரர்கள் ஒன்று கூடியதாக செய்தி வெளியாகியுள்ளது. இதில் தஹ்ரியார் சதுக்கத்தில் இடம்பெற்ற ஆர்ப்பாட்டத்தில் இரண்டாவது சுற்றில் போட்டியிடவுள்ள முஸ்லிம் சகோதரத்துவ அமைப்பின் வேட்பாளர் மொஹமட் மொர்சியும் பங்கேற்றுள்ளார்.

முடிவுகள் அறிவிப்பு

இதனிடையே எகிப்து ஜனாதிபதி தேர்தலின் உத்தியோகபூர்வ அறிவிப்பு நேற்று முன்தினம் வெளியிடப்பட்டது. தேர்தல் ஆணைக்குழு தலைவர் பருக் சுல்தான் கூறும் போது; ‘எந்த வேட்பாளரும் பெரும்பான்மை வாக்குகள் பெறப்படாத நிலையில், தேர்தல் சட்டத்தின் 40 ஆவது சரத்தின் கீழ் இரண்டாவது சுற்று தேர்தல் நடைபெறும். இதில் மொஹமட் மொர்சி மற்றும் அஹமட் ஷபிக் போட்டியிடுவர்’ என்றார்.

கடந்த மே 23 மற்றும் 24 ஆம் திகதி இடம்பெற்ற ஜனாதிபதி தேர்தலானது முபாரக் அரசு கவிழ்க்கப் பட்டதன் பின் எகிப்தில் நடந்த முதலாவது சுயாதீன ஜனாதிபதி தேர்தலாகும். இதில் மொஹமட் மொர்சி 24.7 வீத வாக்குகளையும் அஹமட் ஷபிக் 23.6 வீத வாக்குகளையும் வென்றதாக பாருக் சுல்தான் குறிப்பிட்டார்.

தேர்தல் முடிவுகளுக்கு எதிராக 7 மேன்முறையீடுகள் கிடைக்கப்பெற்றதாகவும் அவை அனைத்தும் நிராகரிக்கப் பட்டதாகவும் தேர்தல் ஆணைக்குழு தலைவர் பாருக் சுல்தான் குறிப்பிட்டார்.

ஷபிக்கிற்கு தொடர்ந்து சிக்கல்

எகிப்தில் மக்கள் எழுச்சிக்கு பின்னர் அமைக்கப்பட்ட முஸ்லிம் சகோதரத்துவ அமைப்பினரை பெரும்பான்மையாகக் கொண்ட பாராளுமன்றம், ஹொஸ்னி முபாரக் அரசில் உயர் பதவிகளை வகித்தவர்களுக்கு தேர்தலில் போட்டியிட தடைவிதிக்கும் சட்ட மூலத்தை நிறைவேற்றியிருந்தது.

இதன்படி முபாரக் அரசில் பிரதமராக இருந்த அஹமட் ஷபிக் தேர்தலில் போட்டியிட அந்நாட்டு தேர்தல் ஆணையம் தடைவிதித்து ஒரு தினத்திற்குள் அந்த தடையை விலக்கிக் கொண்டது.

இந்நிலையில் எகிப்தின் உச்ச அரசியலமைப்பு நீதிமன்றம் எதிர்வரும் ஜூன் 11 ஆம் திகதி அஹமட் ஷபிக் வேட்பாளராக போட்டியிடுவது குறித்த சட்ட ரீதியான தகைமை குறித்து ஆராயவுள்ளது. இதில் ஷபிக்கிற்கு எதிராக முடிவு கிடைக்குமானால் அவர் இரண்டாவது சுற்றில் போட்டியிடுவதில் சிக்கல் ஏற்படவாய்ப்பு ஏற்பட்டுள்ளது.

முதல் சுற்று தேர்தலில் இடதுசாரி வேட்பாளர் ஹம்தீன் சப்பாஹி 20.7 வீத வாக்குகளை வென்று மூன்றாவது இடத்தைப் பிடித்தமை குறிப்பிட்டத்தகது.

மொர்சிக்கு சலபிக்கள் ஆதரவு

இரண்டாவது சுற்று தேர்தலில் போட்டியிடும் முஸ்லிம் சகோதரத்துவ அமைப்பின் வேட்பாளர் மொஹமட் மொர்சிக்கு சலபிக்களின் கட்சியான அந்நூர் ஆதரவை வெளியிட்டுள்ளது. அந்நூர் கட்சியின் உயர் சபை இந்த முடிவை எடுத்துள்ளது.

அந்நூர் கட்சியின் ஜனாதிபதி வேட்பாளர் ஹஸம் அல் இஸ்மையில் தகுதி நீக்கப்பட்டதைத் தொடர்ந்து முதல் சுற்று தேர்தலில் அந்த கட்சி முன்னாள் முஸ்லிம் சகோதரத்துவ அமைப்பின் வேட்பாளர் அப்துல் மொனைம் அபுல் பதுவுக்கு தனது ஆதரவை வெளியிட்டிருந்தமை குறிப்பிடத்தக்கது.

அந்நூர் கட்சி எகிப்து பாராளுமன்ற தேர்தலில் இரண்டாவது அதிக வாக்குகளை வென்றது. எனினும் முதல் சுற்றில் பின்தங்கிய ஏனைய வேட்பாளர்கள் தமது ஆதரவு குறித்து இன்னும் அறிவிக்கவில்லை.