பொஸ்டன் குண்டு சந்தேக நபர்கள் ஜ_லை 4 இலேயே தாக்குதலுக்கு திட்டம்

பொஸ்டன் குண்டு தாக்குதல் சந்தேக நபர்கள் எதிர்வரும் ஜூலை 4 அமெரிக்க சுதந்திர தினத்தின் போதே தாக்குதல் நடத்த திட்டமிட்டிருந்தது தெரிய வந்திருப்பதாக அமெரிக்க ஊடகங்கள் செய்தி வெளியிட்டுள்ளன. எனினும் அதற்கான குண்டு முன்கூட்டியே தயாரிக்கப்பட்டுவிட்டதால் பொஸ்டன் மரதன் போட்டியில் அந்த குண்டு வெடிக்கச் செய்யப்பட்டுள்ளது என பெயர் குறிப்பிடப்படாத அமெரிக்க அதிகாரியை மேற்கோள்காட்டி அந்நாட்டு ஊடகங்கள் குறிப்பிட்டுள்ளன. பொஸ்டனில் ஒவ்வொரு ஆண்டும் ஜூலை 4 ஆம் திகதி மிகப் பெரிய வைபவம் நடத்தப்பட்டு வருகிறது.

மறுபுறத்தில் பொலிஸாருடனான துப்பாக்கிச் சண்டையில் கொல்லப்பட்ட மற்றொரு சந்தேக நபரான தமர்லன் சர்னெவ்வின் உடலை அவரது குடும்பத்தினர் பொறுப்பேற்றுள்ளனர். இறுதிக் கிரியைகளுக்கான பாதுகாப்புகள் உறுதிப்படுத்தப்பட்டிருப்பதாகவும், கொல்லப்பட்டவரது உடமைகளை குடும்பத்தினர் வியாழக்கிழமை பொறுப்பேற்றதாகவும் மிஸசுட்ஸ் மக்கள் பாதுகாப்பு திணைக்களத்தின் சார்பில் பேசவல்ல ஒருவர் குறிப்பிட்டார்.

கொல்லப்பட்ட சந்தேக நபரின் மனைவி கதரின் ரஸ்ஸல் உடலை பொறுப்பேற்க சம்மதித்த போதும் அவரது சிற்றப்பாவான ரஸ்லன் செர்னி, உடைமைகளை பொறுப்பேற்பதாக செவ்வாய்க்கிழமை கூறியிருந்தார்.

கைதாகியிருக்கும் சொகர்ரின் மூத்த சகோதரரான கொல்லப்பட்ட தமர்லனின் மரணத்திற்கான காரணம் மருத்துவ சோதனை மூலம் உறுதிப்படுத்தப்பட்ட போதும், மரணச் சான்றிதழ் வழங்கப்படும் வரை அது தொடர்பில் தகவல் வெளியிடப்பட முடியாத நிலை உள்ளது. அவர் எவ்வாறு கொல்லப்பட்டார் என்பது தொடர்பிலும் சந்தேகம் நிலவிவருகிறது.

துப்பாக்கிக் காயங்களுடன் பிடிபட்ட சொகர் சர்னெவ் தொடர்ந்து மருத்துவமனையில் சிகிச்சை பெற்றுவருகிறார். ஜூலை 4 ஆம் திகதியே தாக்குதல் நடத்த திட்டமிட்டிருந்ததாக அவர் எப். பி. ஐ. புலன் விசாரணையாளர்களிடம் குறிப்பிட்டுள்ளார். இதில் தாம் இருவரும் தற்கொலை தாக்குதல் நடத்துவதற்கே திட்டமிட்டிருந்ததாக 19 வயது சொகர் வாக்குமூலம் அளித்ததாக நியூயோர்க் டைம்ஸ் பத்திரிகை செய்தி வெளியிட்டுள்ளது.

உணவு சமைக்க பயன்படும் பிரஷ்ஷர் குக்கர் கருவியை பயன்படுத்தி தயாரிக்கப்பட்ட இரு குண்டுகளே கடந்த ஏப்ரல் 15 ஆம் திகதி பொஸ்டன் மரதன் போட்டியின் போது வெடிக்கச் செய்யப்பட்டன. இதில் மூவர் கொல்லப்பட்டதோடு 264 பேர் காயமடைந்தனர்.

எப். பி. ஐ. புலன்விசாரணையாளர்களை மேற்கோள் காட்டி மேற்படி பத்திரிகை வெளியிட்ட செய்தியில், தானும் தனது சகோதரரும் அமெரிக்காவில் பிறந்த அல்கொய்தா சந்தேக நபர் அன்வர் அவ்லாக்கியின் உரைகளை இணைய தளத்தின் ஊடே கேட்பதாகவும் சொகர் குறிப்பிட்டுள்ளார். அவ்லாக்கி அமெரிக்க ஆளில்லா விமானத் தாக்குதலில் 2011 ஆம் ஆண்டு யெமனில் கொல்லப்பட்டார்.

பொஸ்டன் குண்டுத் தாக்குதல் குற்றச்சாட்டுக்கு உள்ளாகியுள்ள சந்தேக நபர் சொகர் மீதான குற்றச்சாட்டு நிரூபிக்கப்பட்டால் அவருக்கு அதிக பட்சமாக மரண தண்டனை விதிக்கப்பட வாய்ப்பு உள்ளது. கொல்லப்பட்ட தமர்லன் மசசுட்ஸில் இருக்கும் கெம்ப்ரிட்ஜ் கட்டடத் தொகுதியில் தனது மனைவி மற்றும் குழந்தையுடன் வாழ்ந்து வந்தார். அங்கு குண்டு தயாரிக்க பயன்படுத்தப்பட்ட பொருட்கள் இருப்பது கண்டறியப்பட்டதாக பொலிஸார் குறிப்பிட்டுள்ளனர்.

எப். பி. ஐ. பொலிஸார் அங்கிருக்கும் டி. என். ஏ. மாதிரிகள் மற்றும் ஆதாரங்களை பெற்றுள்ளதோடு தமர்லனின் மனைவி, ரோட் ஐலன்டில் இருக்கும் தனது பெற்றோருடனேயே தற்போது தங்கி வருகிறார்.

எனினும் அவருக்கு அவரது கணவன் பற்றி பெரிதாக எதுவும் தெரியாது என கதரின் ரஸ்ஸலின் வழக்கறிஞர் குறிப்பிட்டுள்ளார். சுகாதார உதவிப் பணியில் வேலை செய்வதால் கதரின் பெரும்பாலும் வெளியிலேயே காலத்தை கழிப்பதாகவும் தமர்லன் குழந்தையை பார்த்துக்கொண்டு வீட்டில் இருப்பதாகவும் அவரது வழக்கறிஞர் மேலும் தெரிவித்துள்ளார். கைதுசெய்யப்பட்டிருக்கும் சொகர் சர்னெவ்வின் மூன்று கல்லூரி நண்பர்களும் விசாரணைக்கு இடையூறு செய்ததாக குற்றம் சாட்டப்பட்டு தடுப்பு காவலில் வைக்கப்பட்டுள்ளனர்.