கர்நாடக சட்டமன்றத் தேர்தலில் காங்கிரஸ் அமோக வெற்றி

கர்நாடக சட்டமன்றத் தேர்தலில் காங்கிரஸ் கட்சி பெரும் வெற்றி பெற்றுள்ளது. மொத்தமுள்ள 223 தொகுதிகளில் அந்தக் கட்சி 120 இடங்களில் வென்று தனிப் பெரும்பான்மையுடன் ஆட்சியைப் பிடித்துள்ளது. இதன்மூலம் 7 ஆண்டுகளுக்குப் பின் மீண்டும் கர்நாடகத்தில் ஆட்சிக்கு வந்துள்ளது. காங்கிரஸ் 2004 ஆம் ஆண்டு தேர்தலில் யாருக்கும் பெரும்பான்மை கிடைக்காத நிலையில் தேவ கெளடாவின் மதசார்பற்ற ஜனதா தளமும் காங்கிரசும் இணைந்து ஆட்சியமைத்தன. காங்கிரஸ் சார்பில் தரம்சிங் முதல்வரானார். ஆனால் தேவ கெளடா தந்த தொல்லையால் அந்தக் கூட்டணி முறிந்தது. இதையடுத்து பா. ஜ. க.வும் மதசார்பற்ற ஜனதா தளமும் இணைந்து ஆட்சி அமைத்தன குமாரசாமி முதல்வரானார். ஆனால் தனது பதவிக் காலம் முடிந்து முதல்வர் பதவியை பா. ஜ. க.வின் எடியூரப்பாவிடம் தர குமாரசாமி மறுத்ததையடுத்து 2007 ஆம் ஆண்டு ஆட்சியைக் கவிழ்த்தது. பா. ஜ. க. இதையடுத்து நடந்த தேர்தலில் பா. ஜ. க. வெற்றி பெற்றது.

ஆனால் பெரும்பான்மை கிடைக்கவில்லை. எடியூரப்பா முதல்வரானார். இதையடுத்து ‘ஒபரேசன் கமலா’ என்றொரு அராஜகத்தை நடத்தி பல்வேறு கட்சிகளில் இருந்தும் எம். எல். ஏ.க்களை விலைக்கு வாங்கியது. இது தான் பா. ஜ. க.வின் முதல் தவறு. இதைத் தொடர்ந்து பா. ஜ. க. ஆட்சிக்கு ஏராளமாக செலவு செய்த ரெட்டி சகோதர்களின் அராஜகம் ஆரம்பித்தது.

மாநிலத்தின் கனிம வளத்தை சுரண்டி கொள்ளையடித்தனர். இதனால் அவர்கள் மீது வழக்குப் பதிவாகியது இதற்கிடையே எடியூரப்பாவுக்கு ரெட்டிகளிடமிருந்து எதிர்ப்பு ஆரம்பித்தது இதனால் ஆட்சி தள்ளாடியது. ஆனாலும் அதை எடியூரப்பா சமாளித்தார். இதைத் தொடர்ந்து பா. ஜ. க. அமைச்சர்கள் எடியூரப்பா அவரது குடும்பத்தினர் வரிசையாக நில மோசடி வழக்குகளில் சிக்கினர்.

மாபெரும் ஊழல்கள் நிறைந்த ஆட்சியாக எடியூரப்பா அரசு மாறியது. எடியூரப்பாவில் ஆரம்பித்து ரெட்டிகள், அமைச்சர்கள் என பலரும் சிறைக்குச் சென்றனர். இதனால் அவரை ஆட்சியை விட்டு பா. ஜ. க. நீக்க வேண்டிய நிலை வந்தது. ஆனல் பா. ஜ. க அவரிடம் பணிந்து நடந்து கொண்டது. அவர் சொன்னபடி சதானந்த கெளடாவை முதல்வராக்கியது.

பின்னர் அவரை நீக்க வைத்த எடியூரப்பா ஜெகதீஷ் ஷெட்டரை முதல்வராக்கினார். பின்னர் தனக்கு மீண்டும் முதல்வர் பதவி கேட்டார் எடியூரப்பா. இந்தமுறை பா. ஜ. க. தலைமை பணியவில்லை. கட்சியின் மாநிலத் தலைவர் பதவியைக் கேட்டார் அதையும் தர பா. ஜ. க. தலைமை மறுக்கவே கர்நாடக ஜனதா கட்சியை ஆரம்பித்தார்.

ஒரு வழியாக 5 வருட பா. ஜ. க.வின் ஆட்சி முடிவுக்கு வந்த நிலையில் மீண்டும் வெல்வோம் என்ற நம்பிக்கையே இல்லாமல் தான் தேர்தலை சந்தித்தது. பா. ஜ. க. நம்பியதைப் போலவே அவர்களுக்கு இந்தத் தேர்தலில் பெரும் தோல்வி கிடைத்துள்ளது. கடந்த 5 ஆண்டுகளில் எதிர்க் கட்சியாக இருந்தும் எந்த வகையிலும் உருப்படியான காரியம் எதையும் செய்யாத காங்கிரஸ் மீண்டும் வெற்றிபெற்றுள்ளது.

பா. ஜ. க.வை ஆட்சியை விட்டு நீக்க வேண்டும் என்ற ஒரே குறிக்கோளுடன் காங்கிரசுக்கு மக்கள் வாக்களித்துள்ளனர். அதே நேரத்தில் கெளடாவின் கட்சி அவரது சமூகத்தினரான ஓக்கலிகா மக்கள் அதிகம் வசிக்கும் காவிரிப் படுகை மாவட்டங்களில் மட்டும் வழக்கம் போல் வெற்றி பெற்றுள்ளது. இதனையடுத்து மாநிலத்தின் முதல் அமைச்சர் பதவியை கைப்பற்ற கடும் போட்டி நிலவுகிறது.

காங்கிரஸ் கட்சியின் கர்நாடக மாநில மூத்த தலைவர் சித்தராமையா மத்திய அமைச்சர்கள் வீரப்ப மொய்லி மல்லிகார் ஜூன் கார்கே, தற்போதைய கர்நாடக மாநில காங்கிரஸ் தலைவர் பரமேஸ்வரா ஆகியோர் முதல் அமைச்சர் பதவியை எதிர்பார்த்து களமிறங்கி உள்ளனர். இவர்களில் யாரை முதல் மந்திரியாக நியமிப்பது என்பதை காங்கிரஸ் தலைவர் சோனியா காந்தி விரைவில் அறிவிப்பார் என எதிர்பார்க்கப்படுகிறது. எனவே, காங்கிரஸ் ஆட்சி நடைபெறும் மாநிலங்களின் பட்டியலில் கர்நாடகம் 14 வது இடத்தை பிடித்துள்ளது.