இலங்கை தோட்டத் தொழிலாளர் சங்கம்

இலங்கை தொழிலாளர் செங்கொடி சங்கம் என பெயர் மாற்றம்

இலங்கைத் தோட்டத் தொழிலாளர் (செங்கொடி) சங்கம் என்ற பெயரை இலங்கை தொழிலாளர் செங்கொடிச் சங்கம் என பெயர் மாற்றம் செய்ய இறுதியாக நடந்த பொதுக் கூட்டத்தில் ஏகமனதாக தீர்மானிக்கப்பட்டுள்ளதாக சங்கத்தின் பொதுச் செயலாளர் மேனகா கந்தசாமி தெரிவித்துள்ளார். இலங்கை தோட்டத் தொழிலாளர் (செங்கொடி) சங்கம் நீண்டகால தொழிற் சங்க வரலாற்றை கொண்ட இடதுசாரி தொழிற்சங்கமாகும். இச்சங்கத்தில் நீண்ட காலமாக பொது செயலாளராக செயற் பட்டு வந்த தோழர் ஓ.ஏ. இராமையா 18ம் திகதி மே மாதம் காலமானார். இவர் நீண்டகாலமாக சுகயீனமுற்று இருந்த காலகட்டத்தில் சங்கத்தின் நிர்வாக குழு சங்கத்தை நடாத்தி சென்றது. இவரது கடைசி காலகட்டத்தில் ஒரு பொதுச் செயலாளராக சங்கத்துக்கு இவரது பங்களிப்பை செய்ய முடியாது போனதற்கு இவர் சுகயீனமுற்ற நிலை ஒரு முக்கிய காரணமாகும். இதன் காரணமாக சங்கத்தின் நிர்வாக குழு எடுத்த தீர்மானத் திற்கிணங்க வருடாந்த பொதுக் கூட்டம் 21.04.2013 அன்று நடைப்பெற்றதுடன், சங்கத்தின் பொதுச் செயலாளராக மேனகா கந்தசாமி அவர்கள் நியமிக் கப்பட்டார்.

இவர் கடந்த ஆறு வருட காலமாக சங்கத்தின் தலைவராக செயற்பட்டார் என்பதும் குறிப்பிடத்தக்கது. அதேபோல சங்கத்தின் தலைவராக இச் சங்கத்தில் முப்பத்தைந்து வருடங்களுக்கு மேலாக சேவையாற்றிய தோழர் வி. கே. முத்து லிங்கம் நியமிக்கப்பட்டார். பொருளாளராக நியமிக்கப்பட்டவர் ஏற்கனவே இச் சங்கத்தில் பொருளாளராக செயற்பட்டு வந்த தோழர் எஸ். ஆர். ஸ்டீபன் ஆவார். இவரும் முப்பது ஆண்டுகளுக்கு மேலாக இச் சங்கத்தில் சேவையாற்றியவர் என்பதும் குறிப்பிடத்தக்க விடயமாகும்.

ஒரு தொழிற்சங்கம் என்பது தனிநபரின் சொத்தல்ல. அது தொழிலாளர்களின் பதிவு செய்யப்பட்ட ஸ்தாபனம். கடந்த காலங்களில் சங்கத்தின் வாகனங்கள், கட்டடங்கள் தனிநபர் ரீதியாக விற்கப் பட்டதாக செய்திகள் சங்கத்தின் நிர்வாக குழுவுக்கு கிடைத்துள்ளன. இன்றும் சங்கத்தின் ஹட்டன் தொழிற்சங்க காரி யாலயத்தை கடந்த ஆறுவருட காலமாக சங்க அபிவிருத்தியில் ஒரு துளியும் பங்குபற்றாத சில அந்நியர்கள் (சங்கத்துடன் சட்டரீதியாக எவ்வித தொடர்பும் இல்லாதவர்கள்) தோழர் ஓ. ஏ. இராமையாவின் மறைவிற்கு பின்னர் காரியாலயத்தை வியாபார நோக்கத்திற்கு பயன்படுத்திக்கொள்ள பல்வேறு நாசகார முயற்சிகளில் ஈடுபட்டுள்ளனர்.

இக்காரியாலயம் தொழிலாளர்களுக்கான காரியாலயம் என்பதால் மறைந்த தோழர் ஓ. ஏ. இராமையாவின் மனைவி உட்பட குடும்பத்தார் இவ் தொழிற்சங்க விடயத்தில் தலையிடுவதை ஒரு இடதுசாரி தொழிற்சங்கம் என்ற ரீதியில் எவ்வகையிலும் ஏற்றுக்கொள்ள முடியாது என்பதை செங்கொடி சங்க நிர்வாக குழு ஆணித்தரமாக வலியுறுத்துகின்றது.

26.05.2013 அன்று ஒரு தமிழ் பத்திரிகையில் வெளியிடப்பட்ட செய்தியான “செங்கொடி சங்க காரியாலயம் உடைக்கப்பட்டது” என்ற செய்தியை எமது நிர்வாக குழுவினர் வன்மையாக கண்டிக்கின்றோம். ஏற்கனவே பல வருட காலமாக இயங்கி வந்த ஹட்டன் காரியாலயத்தின் திறப்பு பொதுச் செயலாளர் என்ற அடிப்படையில் ஓ. ஏ. இராமையாவின் கையிலும் மற்றொரு திறப்பு தலைவரிடமும் இருந்தது குறிப்பிடத்தக்கது.

தோழர் இராமையா சுகயீனமுற்று காரியாலயத்திற்கு வருகைதர முடியாது இருந்த காலகட்டத்திலும் இவ் காரியாலயம் செயற்பட்டது என்பது குறிப்பிடத்தக்கது. கடந்த 23.05.2013 திகதி வழமைபோல காரியாலயம் திறக்கப்பட்டு செயற்பட்ட சம்பவத்தையே “ஹட்டன் காரியாலயம் உடைக்கப்பட்டதாக” தவறான செய்தியை வெளியிட்டுள்ளார்கள். எனவே இச் செய்தியை சங்கத்தின் நிர்வாக குழுவினர் கண்டிக்கின்றனர்.

இறுதியாக நடந்த வருடாந்த பொதுக் கூட்டத்தில் இலங்கைத் தோட்டத் தொழிலாளர் (செங்கொடி) சங்கம் என்ற பெயர் இலங்கை தொழிலாளர் செங்கொடி சங்கம் என பெயர் மாற்றம் செய்ய அங்கத்தவர்களால் ஏகமனதாக தீர்மானிக்கப்பட்டுள்ளது என்பதும் இங்கு குறிப்பிடத்தக்கது என்றும் அறிக்கையில் குறிப்பிடப்பட்டுள்ளது.