சென்னைக்குள் மேலும் இரு உளவாளிகள் ஊடுருவி இருக்க வாய்ப்பு, மிகப்பெரிய தாக்குதலுக்கு தீவிரவாதிகள் சதித்திட்டம்

இலங்கையில் இருந்து, தீவிரவாதிகள் கடல் வழியாக வந்து, தமிழகத்தில் மிகப்பெரிய தாக்குதல் நடத்த திட்டமிட்டுள்ளதாக திடுக்கிடும் தகவல்கள் வெளியாகி உள்ளது. சென்னையில் சமீபத்தில் பாகிஸ்தான் உளவு அமைப்பான ஐ.எஸ்.ஐ.யுடன் தொடர்பு வைத்திருந்ததாக ஜாகீர்உசேன் என்பவர் கைது செய்யப்பட்டார். இலங்கையில் உள்ள பாகிஸ்தான் தூதரக அதிகாரிகள் இருவர் தன்னை சென்னைக்கு உளவு பார்க்க அனுப்பியதாக ஜாகீர்உசேன் தெரிவித்ததாக குற்றம் சுமத்தப்பட்டது. 3 நாட்கள் காவலில் வைத்து ஜாகீர் உசேனிடம் விசாரணை நடத்திட நீதிமன்றம் அனுமதி வழங்கி உள்ளது. அவரிடம் இரகசிய இடத்தில் வைத்து கியூ பிரிவு பொலிசார் விசாரணை மேற்கொண்டனர். இந்த விசாரணையில் ஜாகீர் உசேன் மேலும் திடுக்கிடும் தகவல்களை வெளியிட்டுள்ளதாக கூறப்படுகிறது. ஆனால் கியூ பிரிவு பொலிசார் இதை உறுதி செய்யவில்லை.

பாகிஸ்தான் ஆதரவு தீவிரவாதிகள் தமிழகத்தின் மீது மிகப்பெரிய தாக்குதல் நடத்த திட்டமிட்டுள்ளனர். கடல் வழியாக ஊடுருவி வந்து தமிழகத்தில் தீவிரவாதிகள் தாக்குதல் நடத்தலாம். தீவிரவாதிகளின் முதல் இலக்கு சென்னையில் உள்ள அமெரிக்க தூதரகம் அடுத்த இலக்கு பெங்களூரில் உள்ள இஸ்ரேல் தூதரகம் ஆகும்.

இதுபோல அடுத்தடுத்து தமிழகத்தின் பல இடங்களில் தாக்குதல் நடத்த வாய்ப்பு உள்ளது. இந்த தாக்குதல், செப்டம்பரில் நடக்கும் விநாயகர் சதுர்த்தி திருவிழா ஆகஸ்ட் 15 சுதந்திர தினவிழா அல்லது டிசம்பர் 6ந் திகதி பாபர்மசூதி இடிப்பு தினம் ஆகிய நாட்களில் அரங்கேற வாய்ப்பு உள்ளதாக தகவல்களில் தெரிவிக்கப்பட்டுள்ளது. ஜாகீர் உசேனைப் போல மேலும் 2 உளவாளிகள் சென்னை நகருக்குள் ஊடுருவி இருக்கலாம் என்று தெரிய வந்துள்ளது. அந்த உளவாளிகள் இருவரும் போலி பாஸ்போர்ட் மூலம் வந்திருக்கலாம் என்றும் புதிய தகவல்கள் தெரிவிக்கின்றன. அதுபற்றி தீவிர விசாரணை நடந்து வருகிறது.

ஜாகீர் உசேனிடம் கியூ பிரிவு பொலி சாரும், சி.பி.சி.ஐ.டி. பொலிசாரும் நடத்திய விசாரணையில் சென்னை சென்ட்ரல் ரயில் நிலையத்தில் கடந்த மே 1ந் திகதி நடந்த ரயில் குண்டு வெடிப்பு வழக்கில் தனக்கு தொடர்பு இல்லை என்று மறுத்துவிட்டதாக தெரிய வந்துள்ளது. தனக்கு கொடுக்கப்பட்ட வேலை சென்னை அமெரிக்க தூதரகம் மற்றும் பெங்களுரில் உள்ள இஸ்ரேல் தூதரகம் ஆகியவற்றின் புகைப்படங்களை எடுத்து அனுப்புவதுதான் என்றும் ஜாகீர் உசேன் உறுதிபட கூறிவிட்டாராம்.

ஜாகீர்உசேனின் வக்கீல் ஜெய்னூல் ஆப்தீன் நேற்று முன்தினம் கூறும்போது, ஜாகீர் உசேன் பாகிஸ்தான் உளவாளி என்பதை ஏற்கமுடியாது என்றும் விரைவில் உரிய ஆதாரங்களுடன் நாங்கள் பத்திரிகையாளர்களை சந்திப்போம் என்றும் குறிப்பிட்டார்.