கிழக்கு உக்ரைன் சுதந்திரம் பெற திட்டமிட்டபடி சர்வஜன வாக்கெடுப்பு

கிழக்கு உக்ரைன் சுயாட்சி பெறுவது அல்லது சுதந்திரம் பெறுவது குறித்த சர்வஜன வாக்கெடுப்பு திட்டமிட்டபடி இந்த வார இறுதியில் நடத்தப்படும் என ரஷ்ய ஆதரவு பிரிவினைவாதிகள் அறிவித்துள்ளனர். இந்த சர்வஜன வாக்கெடுப்பை ஒத்திவைக்கும்படி ரஷ்ய ஜனாதிபதி விளாடிமிர் புடின் விடுத்த கோர்க்கையை பிரிவினைவாதிகள் ஏற்க மறுத்துள்ளனர். இதில் பேச்சுவார்த்தைக்கு நிபந்தனை விதித்து சர்வஜன வாக்கெடுப்பை ஒத்திவைக்குமாறு புடின் கடந்த புதன்கிழமை கோரிக்கை விடுத்திருந்தார். ஆனால் கிளர்ச்சியாளர்களின் முடிவு கவனத்தில் கொள்ளப்பட மாட்டாது என்றும் தீவிரவாதத்திற்கு எதிரான நடவடிக்கை தொடர்ந்து முன்னெடுக்கப்படும் என்றும் உக்ரைன் அரசு அறிவித்துள்ளது. எதிர்வரும் ஞாயிற்றுக்கிழமை நடைபெறவிருக்கும் சர்வஜன வாக்கெடுப்புக்காக மில்லியன் கணக்கான வாக்குச் சீட்டுகள் தயாராக உள்ளன.

'சர்வஜன வாக்கெடுப்பு திட்டமிட்டபடி மே 11 ஆம் திகதி நடத்தப்படும். வாக்குச்சீட்டுகள் அச்சிடப்பட்டு தயார் நிலையில் உள்ளன. எல்லாம் திட்டமிட்டபடி நடக்கும். எந்த மாற்றமும் இல்லை" என்று கிழக்கு நகரான லுஹன்ஸ்கில் இருக்கும் செயற்பாட்டாளர்கள் ரஷ்ய செய்திச்சேவைக்கு நேற்று குறிப்பிட்டனர். லுஹன்ஸ் நகரின் ரஷ்ய ஆதரவு செயற்பாட்டாளர் தலைவர் டெனிஸ் பு'pலினி குறிப்பிடும்போது, ஞாயிற்றுக்கிழமை தேர்தலை நடத்த ஒருமனதாக தீர்மானம் நிறைவேற்றப்பட்டது என்றார்.

'தென்கிழக்கு மக்கள் பற்றி கவலைப்படும் ஒருவரால் இந்த பரிந்துரை முன்வைக்கப்பட்டது. ஆனால் நாம் காளை கொம்பின் மக்கள்கள்" என்று அவர் குறிப்பிட்டார்.

எதிர்வரும் தேர்தலின் அபாயம் குறித்து ஐரோப்பிய ஒன்றியம் எச்சரித்துள்ளது. 'இந்த வாக்கெடுப்பு ஜனநாயக உரிமையை கொண்டதாக இருக்காது. இது நிலைமையை மேலும் மோசமாக்கவே உதவும்" என்று ஐரோப்பிய ஒன்றியத்தின் வெளியுறவுக் கொள்கைக்கான தலைவரின் பேச்சாளர் குறிப்பிட்டுள்ளார். எனினும் எதிர்வரும் சர்வஜன வாக்கொடுப்பில் கிழக்கு உக்ரைனில் பெரும்பாலான மக்கள் தொடர்ந்து உக்ரைனுடன் இணைந்திருக்க விரும்புவதாக கருத்துக்கணிப்புகள் கூறும் நிலையிலேயே பிரிவினைவாதிகள் அங்கு வாக்கெடுப்பை நடத்த திட்டமிட்டுள்ளனர். இங்கு ரஷ்ய மொழி பேசுபவர்கள் பெரும்பான்;மையாக உள்ளமை குறிப்பிடத்தக்கது.

எவ்வாறாயினும் திடீர் கொள்கை மாற்றமாக சர்வஜன வாக்கெடுப்பை ஒத்திவைக்குமாறு ஜனாதிபதி புடின் கடந்த புதன் கிழமை பிரிவினைவாதிகளை கோரியிருந்தார். அதில் இம்மாத இறுதியில் நடைபெறவிருக்கும் உக்ரைனின் ஜனாதிபதி தேர்தலையும் புட்டின் வரவேற்றிருந்தார். உக்ரைன் ஜனாதிபதி தேர்தல் சரியான பாதையில் செல்வதாக கூறியிருந்தார். எனினும் கிழக்கு பிராந்தியத்தில் பிரிவினைவாதிகள் கோரும் அதிகபட்ச சுயாட்சியை உக்ரைன் இடைக்கால அரசு நிராகரித்து வருகிறது. இங்கு கிளர்ச்சியாளர்களின் கட்டுப்பாட்டில் இருக்கும் அரச கட்டிடங்களை மீட்க உக்ரைன் துருப்புகள் போராடி வருகின்றன.

முன்னர் இந்த சட்டவிரோதமான மற்றும் முறையற்ற வாக்கொடுப்பை ஒத்திவைப்பதை விட இரத்துச் செய்யும்படி வெள்ளை மாளிகை கூறியிருந்தது. ஏற்கனவே ரஷ்யாவின் பல தனிநபர்களுக்கும் வர்த்தக நிறுவனங்களுக்கும் தடை விதித்திருக்கும் ஐரோப்பிய ஒன்றியம் மற்றும் அமெரிக்கா, உக்ரைன் மீது மேலும் தலையிட்டால் பரந்த அளவில் தடைகளுக்கு முகம்கொடுக்க வேண்டி வரும் என்று எச்சரித்திருந்தன.

இந்நிலையில் ஞாயிற்றுக் கிழமை நடத்த திட்டமிடப்பட்டிருக்கும் சர்வஜன வாக்கெடுப்பு அமெரிக்கா மற்றும் ஐரோப்பிய ஒன்றியத்தை மேலும் ஆத்திரமூட்டச் செய்யும் செயலாக பார்க்கப்படுகிறது.

அத்துடன் ரஷ்ய ஜனாதிபதி புடின் கடந்த புதன்கிழமை வெளியிட்ட அறிக்கையில், ரஷ்ய துருப்புகளை உக்ரைன் எல்லையில் இருந்து திரும்பும்படி உத்தரவிட்டிருப்பதாகவும் குறிப்பட்டுள்ளார்.

எனினும் ரஷ்ய துருப்புகள் எல்லையை விட்டு பின்வாங்கியதற்கான எந்த அறிகுறியும் இல்லை என்று நேட்டோ குறிப்பிட்டுள்ளது.

ரஷ்யா கடந்த மார்ச் மாதம் உக்ரைனின் கிரிமியா தீபகற்பத்தை தன்னுடன் இணைத்துக் கொண்டதை அடுத்து தெற்கு மற்றும் கிழக்கு உக்ரைனில் பதற்றம் தீவிரமடைந்தது. உக்ரைனின் ரஷ்ய ஆதரவு ஜனாதிபதியான விக்டர் யனுகோவிச் மேற்கு ஆதரவு ஆர்ப்பாட்டக்காரர்களால் கடந்த பெப்ரவரியில் பதவி கவிழ்க்கப்பட்டதை அடுத்தே ரஷ்யா, கிரிமியா தீபகற்பத்தின் மீது கைவைத்தது.