குமுதினிப் படுகொலை- 1985may 15

ஆம் ஆண்டு மே 15ஆம் திகதி 65பேருடன் நெடுந்தீவில் இருந்து யாழ்ப்பாணம் நோக்கி வந்துகொண்டிருக்கும் போது நடுக்கடலில் வைத்து கடற்படையினரால் வெட்டியும் குத்தியும் அடித்தும் 36 பேர் படுகொலை செய்யப்பட்டனர். மேலும் பலர் படுகாயங்களுக்கு உள்ளான நிலையில் வைத்தியசாலையில் அனுமதிக்கப்பட்டனர். விடுதலைப்புலிகள் சிங்கள இராணுவத்தை தாக்கும் ஒவ்வொரு சம்பவத்திற்கும் மக்கள் பழிவாங்கப்பட்டனர். அன்றைய சம்பவமும் அவ்வாறு தான் இடம்பெற்றது. அநுராதபுரத்தில் இடம்பெற்ற மோதல் ஒன்றிற்காக நெடுந்தீவில் இருந்து யாழ்ப்பாணம் நோக்கி குமுதினியில் வந்த மக்கள் நடுக்கடலில் வைத்து கடற்படையால் வஞ்சகம் தீர்க்கப்பட்டனர். எனினும் குமுதினிப்படுகொலை நினைவான கட்டப்பட்ட கட்டடமும் உடைக்கப்பட்டு தற்போது நினைவுத்தூபி மட்டும் உள்ளமை குறிப்பிடத்தக்கது

உயிர்வாழும் மரணங்கள்
15.05.2014 - வியாழக்கிழமை

குமுதினிப் படகு படுகொலைகள் நடந்து இன்றைக்கு இருபத்தொன்பது வருடங்கள்...

கடலலைகள் அப்படியே நின்று - பின் மீண்டதான அச்சம்பவம் - மறக்க முடியாத மரணங்கள் பட்டியலில் உயிர் வாழ்ந்து கொண்டிருக்கிறது.

கண்ணீரும்
கடல் நீருமாகக்
கலந்திருந்த அந்த உடல்கள்
இனவாதத்தின் உக்கிரத்தை
உரத்து
காட்சிப் படுத்தின

என்றாலும்
குமுதினிக்குத் தெரியாது
தன் வயிற்றில் இருந்து
இத்தனை உயிர்கள்
பிணமாகி வெளியேறுமென!

குமுதினி -
அவள் ஒரு தாய்...
எம்மைச் சுமந்து கரைசேர்ப்பவள்..

இக்கரை உள்வாங்கி
அக்கரை சேர்க்கும் வரை
அக்கறையுடன்
அசைந்து - அசைந்துச் செல்பவள்..

கடல் தாய்க்கு
ஆழமான மனது
என்பதால் -

எல்லோருக்கும்
நெடுந்தீவு பயணங்கள்
போய்ச் சேரும் வரை -
வந்து சேரும் வரை -
ஒவ்வொரு பிறப்புக்கள்..

அன்றும்
அக்கறையுடன் தான் கொண்டு வந்தாள்
அத்தனை உயிர்களையும்
இக்கரை வருமுன்
இரத்தக் கரையாகும்
என்பது அறியாமல்...

குமுதினிக்கு
இதயம் இயந்திரம் என்றாலும்
அன்றாடம்
உப்பு வாசனையையும் மீறி அவள்
மனித வாசனையை
அதிகம் சுவாசித்தவள்.

அலை வெறியையும் மீறி
இடைநடுவில்
கொலைவெறி மேலோங்கியதால்
கடலுக்குள்ளேயே அவள்
கண்ணீர் விட்டது.
கடவுளுக்குத் தெரிந்திருக்கும்

மறுகரையில்
நாகபூசணி அம்பாளும்
பார்த்துக் கொண்டுதானிருந்தாள்...

அந்த
மரண ஓலங்களை
அம்பாளும் கேட்டிருப்பாள்...
அதனால்தான்
குமுதினியை
அவள் பக்கமாக அழைத்தெடுத்தாள்...

குறிக்காட்டுவான் -
சரியாகத் தான் நின்றிருந்தான்
அனைவரையும்
இறக்கிவிட...

இன்றும் கூட
குறிக்காட்டுவான் முகத்தில்
வந்து அறையும் அலைகள் -
அந்த சம்பவத்திற்காக
அவனுக்குத்
தண்டனையா?

குமுதினி -
இன்றும்
வந்து போகின்றாள்..
பழைய உற்சாகம்
இன்றும் இருப்பதாகக்
கூற இயலாது...

அடிக்கடி
நோய்வாய்ப்பட்டுப் போகிறாள்...

அந்த வேதனைகள்
அவளை -
வாட்டுவதாக இருக்கலாம்...

அவளைக் குறை கூற
ஏதுமில்லை

குறிக்காட்டுவான்தான்
என்ன செய்வான்...
தீவுகளுக்குத் தான்
குறிகாட்டுகிறான்...
சாவுகளுக்கு அல்லவே!

அந்த
அலைகளைப் போல்
உயிரிழந்த அனைவரின்
ஆத்ம சாந்திக்காக
நாமும் பிரார்த்திப்போம்.

இப்னு அசுமத்