இனப்பிரச்சினை தீர்வுக்காக குழு – ஜனாதிபதி

தமது மனதில் தமிழர் பிரச்சினை தொடர்பான தீர்வு திட்டம் இருப்பதாக ஜனாதிபதி மஹிந்த ராஜபக்ச தெரிவித்துள்ளார். த ஹிந்து நாளிதழுக்கு அளித்துள்ள செவ்வி ஒன்றில் இது தொடர்பாக அரசியல் கட்சிகளுடனும் பொது மக்களுடனும் கலந்துரையாடல்கள் நடத்தப்படும் என அவர் குறிப்பிட்டுள்ளார். அதிகார பரவலாக்கம் தொடர்பில் மக்கள் மனதில் இருக்கும் விடயங்களை தெரிந்து கொள்ள வேண்டும். அவர்களுக்கு என்ன தேவை உள்ளது என்பதை அறிந்து கொள்ள வேண்டும். இதன்போது தமது மனதில் உள்ள தீர்வு திட்டம் பொது மக்களுக்கு போதுமானதாக இல்லை என்ற நிலை ஏற்படலாம் எனவே அரசியல் கட்சிகள் மாத்திரம் அல்ல பொதுமக்களும் தீர்வு திட்டத்தை ஏற்று கொள்ள வேண்டும். இதனை அறிந்து கொள்வதற்காகவே தாம் குழுவொன்றை அமைத்து இரண்டு தரப்பினரும் கருத்துக்களை பெற்று கொள்ள உள்ளதாக ஜனாதிபதி குறிப்பிட்டுள்ளார்.

இதேவேளை வடக்கு மாகாண சபை தேர்தல் 2011 ஆம் ஆண்டு இடம் பெறும் என்பதையும் அவர் சுட்டிக்காட்டி உள்ளார். தமது முதலாம் தவணை காலத்தின் போது பயங்கரவாதத்தை ஒழித்து சமாதானத்திற்கான சூழ்நிலையை ஏற்படுத்தி உள்ளதாக ஜனாதிபதி இந்த செவ்வியின் போது தெரிவித்துள்ளார்.

இலங்கை தற்போது ஒரே நாடு என்ற கோட்பாட்டுக்குள் வந்துள்ளது. எனவே மக்களின் மனதை வெல்வதும் அபிவிருத்தியை முன் கொண்டு சென்று மக்களுக்கு அதன் மூலம் பயன் பெற்று கொடுப்பதுமே தமது இரண்டாம் தவணையின் நோக்கம் என ஜனாதிபதி மஹிந்த ராஜபக்ச தெரிவித்துள்ளார்.

வடக்கில் இருந்து இடம் பெயர்ந்த மூன்று லட்சம் பேரில் தற்சமயம் 18 ஆயிரம்  பேரே இடம் பெயர்ந்த முகாம்களில் தங்கியுள்ளனர். இவர்களில் 10 ஆயிரம் பேரையாவது இந்த வருட இறுதிக்குள் மீள்குடியேற்ற முடியும் என ஜனாதிபதி நம்பிக்கை வெளியிட்டுள்ளார். கடந்தவை கடந்தவைகளாகவே இருக்கட்டும்.

இந்தநிலையில் எதனையும் சாதகமாக பார்பதை விடுத்து பாதகமாக பார்க்க கூடாது என தெரிவித்த ஜனாதிபதி வடக்கு கிழக்கின் அபிவிருத்திக்கு சர்வதேச நாடுகள் உதவியளிக்க வேண்டும் என கேட்டுள்ளார்.

இதன் மூலம் இனங்களுக்கிடையிலான விரிசலை குறைக்க முடியும் என்றும் ஜனாதிபதி மஹிந்த ராஜபக்ச குறிப்பிட்டுள்ளார். இதேவேளை முன்னாள் இராணுவ தளபதியின் மருமகனான தனுன திலகரட்ண ஆயுத கொடுக்கல் வாங்கல்களில் ஈடுபடுபவர் என தமக்கு தெரிந்திருந்தால் அதற்கு உரிய நடவடிக்கைகளை தாம் எடுத்திருப்பதாகவும் ஜனாதிபதி குறிப்பிட்டுள்ளார்.

இதன்போது தனுன திலகரட்ணவிற்கு ஆலோசனைகளையும் எச்சரிக்கைகளையும் வழங்கி இருக்க முடியும் என அவர் குறிப்பிட்டுள்ளார்.

சரத் பொன்சேகாவின் இரு தலப்பட்சமான பொறுப்புக்களை கருத்திற் கொள்ளும் போது அவர் அந்த விடயங்களோடு செயற்படுவது கடினமான விடயம் எனவும் ஜனாதிபதி குறிப்பிட்டுள்ளார்.

இராணுவ தளபதியோ அல்லது வேறு எவரோ தவறுகளை மேற்கொள்ளும் போது அதன் பிரதிபலன்களுக்கு முகங் கொடுக்க நேரிடும் என ஜனாதிபதி மஹிந்த ராஜபக்ச த ஹிந்து நாளிதழுக்கு வழங்கிய செவ்வியில் தெரிவித்துள்ளார்.