மக்களின் பணத்தை சூறையாடியவர்களுக்கு பிணை தர முடியாது - சி.பி.ஐ. நீதிமன்றம்

மக்கள் பணத்தை தங்களது சொந்த காரியங்களுக்காக பயன்படுத்திய வர்களுக்கு நாட்டின் பொருளாதாரத்தை சீரழித்தவர்களுக்கு பிணை வழங்க முடியாது என்று டில்லி சி. பி. ஐ. சிறப்பு நீதிமன்ற நீதிபதி ஷைனி கடுமையாக கூறியுள்ளார். கனிமொழி உள்ளிட்ட 8 பேரின் பிணை மனுக்களை டில்லி சிறப்பு சி. பி. ஐ. நீதிமன்றம் நேற்று தள்ளுபடி செய்து விட்டது. பிணை கோரிக்கை தள்ளுபடி செய்ததற்கான காரணத்தை நீதிபதி ஷைனி தெரிவித்துள்ளார். இது தொடர்பாக அவர் பிறப்பித்த உத்தரவின் போது, குற்றவாளிகள் மீதான குற்றச்சாட்டு மிகப்பெரியது. நாட்டின் பொருளாதாரத்தை இவர்கள் சூறையாடியுள்ளனர். அழித்துள்ளனர். இவர்களுக்கு பிணை வழங்க முடியாது. மேலும் பொதுமக்களின் பணத்தை எடுத்து இவர்கள் தங்களது சொந்த நலன்களுக்காக பயன்படுத்தியுள்ளனர். மக்கள் பணத்தை இப்படி சூறையாடு வதற்கு யாருக்கும் உரிமை கிடையாது. இப்படிப்பட்டவர்களை பிணையில் விடுவிக்க முடியாது என்றார் நீதிபதி ஷைனி.

கனிமொழிக்கு பிணை வழங்க தாங்கள் ஆட்சேபிக்கப் போவதில்லை என்று சி. பி. ஐ. முன்பு கூறியிருந்தது. இதற்கு உச்ச நீதிமன்றம் கடும் கண்டனம் தெரிவித்திருந்தது. இதுவும் கூட நேற்று கனிமொழிக்கு பிணை மறுக்கப்பட ஒரு முக்கிய காரணம் என்று கூறப்படுகிறது. எப்படியும் கனிமொழிக்கு பிணை கிடைத்து விடும். அவரை கையோடு சென்னைக்கு அழைத்துச் சென்ற விடலாம் என்ற பெரும் நம்பிக்கையில் டில்லியில் முகாமிட்டிருந்தனர் தி. மு. க. தலைவர்கள். பாலு, ராசாத்தி அம்மாள், கனிமொழியின் கணவர், மகன் ஆகியோர் நீதிமன்றத்திற்கு வந்திருந்தனர்.

ஆனால் கனிமொழியின் பிணை மனு நிராகரிக்கப்பட்டதால் அனைவரும் பெரும் அதிர்ச்சி அடைந்தனர். ராசாத்தி அம்மாள் கண் கலங்கி அழுதார். கனிமொழியும் கூட தீர்ப்புக்கு முன்பு வரை உற்சாகமாக காணப்பட்டார். பின்னர் அவரும் சோகமாகி விட்டார்.

இதற்கிடையே கனிமொழியின் பிணை மனு நிராகரிப்பை எதிர்த்து டில்லி உயர் நீதிமன்றத்தில் மேற்முறையீடு செய்யவுள்ளது தி.மு.க. அங்கும் ஒரு வேளை நிராகரிக்கப்பட்டால் உச்ச நீதிமன்றத்தை நாடவும் தி.மு.க. முடி வெடுக்கலாம் என்று எதிர்பார்க்கப்படுகிறது. இவ்வழக்கில் நவம்பர் 11 ஆம் திகதி முதல் விசாரணை தொடங்கும் என டில்லி சிறப்பு சி. பி. ஐ. நீதிமன்றம் அறிவித்திருப்பதால் இனி கனிமொழி உள்ளிட்ட வழக்கில் சம்பந்தப்பட்ட யாருக்குமே பிணை கிடைக்க வாய்ப்பில்லை என்று கூறப்படுகிறது. இந்த நிலையில் மேலும் துயரமாக ராசா, கனிமொழி உள்ளிட்டோர் மீது நம்பிக்கை துரோக குற்றச்சாட்டை சுமத்தியது சி.பி.ஐ. இதனால் இவர்களுக்கு பிணை கிடைப்பதில் பெரும் சிக்கல் ஏற்பட்டது. கனிமொழி பிணை கோரினால் அதை ஆட்சேபிக்க மாட்டோம் என்று சி. பி. ஐ. திடீரென அறிவித்தது.

தி.மு.க. தலைவர் கருணாநிதி டில்லி சென்று பிரதமர் மன்மோகன் சிங், காங்கிரஸ் தலைவர் சோனியா காந்தி ஆகியோரை சந்தித்துப் பேசிய பின்னர் இந்த அறிவிப்பு வெளியானது. இதையடு த்து உச்ச நீதிமன்றத்திடம் வாங்கிக் கட்டிக் கொண்டது சி. பி. ஐ. ஏன் இந்த இரட்டை நிலை என்று உச்ச நீதிமன்றம் சி. பி. ஐக்கு கிடுக்கிப் பிடி போட்டது

விசாரணை தொடங்கவுள்ளதால் கனிமொழி உள்ளிட்டோருக்கு பிணை கிடைப்பதற்கான வாய்ப்பு இல்லை என்று சட்ட நிபுணர்கள் கருதுகிறார்கள். ஒருவேளை கனிமொழி உள்ளிட்டோர் டில்லி உயர் நீதிமன்றத்தை அணுகினால், இதைக் காரணம் காட்டியே அங்கும் மனு நிராகரிக்கப்படலாம் என்றும் கூறப்படுகிறது. இதனால்தான் கனிமொழி பிணை மனு நிராகரிப்பு தொடர்பாக தி. மு. க. கடும் அதிர்ச்சியில் உள்ளதாக கூறப்படுகிறது.

இந்த நிலையில் நவம்பர் மாத மத்தியில் தி. மு. க. வின் செயற்குழுக் கூட்டம் நடைபெறவிருப்பதாக தகவல்கள் கூறுகின்றன. இந்தக் கூட்டத்தில் என்ன முடிவெடுக்கப்படும் என்று தெரியவில்லை. நிச்சயம் காங்கிரஸடன் உறவு முறிவு, மத்திய ஆட்சியிலிருந்து விலகல் போன்ற முடிவுகள் எடுக்கப்படாது என்பது மட்டும் தெரிகிறது.

இதற்கிடையே இந்த தீர்ப்பால் தி. மு. க. தலைவர் கருணாநிதி கடும் அதிர்ச்சியில் மூழ்கியுள்ளதாக தி. மு. க. வட்டாரத் தகவல்கள் தெரிவிக்கின்றன. அவருடன் மூத்த மகள் செல்வி உடன் இருக்கிறார். கருணாநிதிக்கு அவர் ஆறுதல் கூறியதாக தெரிகிறது.

கனிமொழிக்கு பிணை கிடைத்தால் அழைத்து வருவதற்காக டில்லி சென்றிருந்த ஸ்டாலின் நேற்று அவசரமாக சென்னை திரும்பினார். கருணாநிதியைச் சந்தித்து ஆலோசனை நடத்தி அடுத்த கட்ட நடவடிக்கை குறித்து தி. மு. க. முடிவு செய்யும் என்று எதிர்பார்க்கப்படுகிறது.