நட்டத்தில் இயங்கும் தொழில் முயற்சிகளையும் நிறுவனங்களையும் சுவீகரித்து புத்துயிரளிக்கும் சட்டமூலம்' அரசியல் யாப்புக்கு முரணானது அல்ல

குறைந்த செயற்பாடுள்ள, நட்டத்தில் இயங்குகின்ற தொழில் முயற்சிகளையும், நிறுவனங்களையும், சொத்துக்களையும் சுவீகரித்து அவற்றுக்கு புத்துயிர் அளிப்பது தொடர்பான சட்டமூலம் அரசியல் யாப்புக்கு முரணானது அல்ல என உச்சநீதிமன்றம் அறிவித்துள்ளதாக பிரதி சபாநாயகர் சந்திம வீரக்கொடி நேற்று பாராளுமன்றத்தில் அறிவித்தார். பாராளுமன்றம் நேற்று பிரதி சபாநாயகர் சந்திம வீரக்கொடி தலைமையில் கூடியது. சபையின் ஆரம்ப நிகழ்வாக சபாநாயகருக்கு அறிவிக்கப்பட்டிருந்த உச்சநீதிமன்றத்தின் தீர்ப்பை பிரதி சபாநாயகர் சபைக்கு அறிவித்தார்.

பாராளுமன்றத்தில் சமர்ப்பிப்பு

செயற்பாடு குறைவாகவுள்ள, நட்டத்தில் இயங்குகின்ற தொழிற்முயற்சிகளுக்கும் மற்றும் குறைவாகப் பயன்படுத்தப்படுகின்ற சொத்துக்களுக்கும் புத்துயிர் அளிப்பது தொடர்பாக சட்டமூலம் நேற்று பிரதமர் டி. எம். ஜயரட்னவால் சபையில் சமர்ப்பிக்கப்பட்டது.

இந்த சட்டமூலத்தின்படி இனங்காணப்பட்ட செயற்பாடு குறைவாக உள்ள அல்லது குறைவாகப் பயன்படுத்தப்படுகின்ற சொத்துக்கள் தேசிய நலன் கருதி அரசுடமையாக்கப்படும். மேலும் இவை தொடர் பில் தகுதிவாய்ந்த அதிகாரி ஒருவரை நியமித்தல், நஷ்ட ஈடு செலுத்துதல் மூலமும் முகாமைத்துவம் புத்துயிர் அளிக்கப்படுவதன் ஊடாகவும் இவற்றை மேம்படுத்த உள்ளதாக பிரதமர் சபையில் தெரிவித்தார்.

செயற்பாடு குறைவாக உள்ள தொழில் முயற்சிகளுக்கும், குறைவாகப் பயன்படுத்தப்படும் சொத்துக்களுக்கும் புத்துயிர் அளித்தல் தொடர்பான சட்ட மூலத்தை தேசிய நலன்கருதி உடனடியாக ஆராய்ந்து அறிவிக்குமாறு கோரி ஜனாதிபதியினால் உச்ச நீதிமன்றத்துக்கு சமர்ப்பிக்கப்பட்டது. இதன்படி உச்ச நீதிமன்றத் தீர்ப்பு சபாநாயகருக்கு அறிவிக்கப்பட்டிருந்தது. இந்த சட்டமூலம் அரசியல் யாப்புக்கு முரணானது அல்ல என உச்ச நீதிமன்றம் அறிவித்துள்ளது என பிரதி சபாநாயகர் அறிவித்துள்ளார். எதிர்க்கட்சி எதிர்ப்பு

குறித்த சட்டமூலம் தொடர்பில் உச்ச நீதிமன்றத்தில் மூன்று வழக்குகள் பதியப் பட்டுள்ளதால் அவற்றுக்கான தீர்ப்பு வழங்கப்படும்வரை இதுதொடர்பான விவாதத்தை ஒத்திவைக்குமாறு ஐ.தே.க. கோரியபோதும் ஆளும் தரப்பினர் இத ற்கு எதிர்ப்புத் தெரிவித்தனர். குறித்த சட்ட மூலம் தொடர்பான விவாதம் இன்று (9) நடைபெறவுள்ளதால் அதன்போது தமது ஆட்சேபனையை முன்வைக்குமாறு தெரிவித்த பிரதி சபாநாயகர் சந்திம வீரக்கொடி, இதுதொடர்பில் சபாநாயகர் தனது முடிவை இன்று அறிவிப்பார் என்று அறிவித்தார்.

குறித்த சட்டமூலம் பற்றி யாருக்கும் தெரியாது எனவும், இதுதொடர்பில் மனித உரிமை மீறல் வழக்கு தாக்கல் செய்யப்பட்டுள்ளதால் தீர்ப்பு வரும்வரை விவாதத்தை ஒத்திவைக்குமாறும் எதிர்த்தரப்பு பிரதி பிரதம கொரடா தயாசிறி ஜயசேகர சபையில் கோரினார்.

சபை முதல்வர்

இது தொடர்பில் அரசாங்கம் சார்பாகக் கருத்துத் தெரிவித்த சபை முதல்வர் நிமல் சிறிபால டி. சில்வா, உச்ச நீதிமன் றத்தின் தீர்ப்பு தெளிவாக சபைக்கு அறிவிக்கப்பட்டுள்ளது. இந்த சட்டமூலம் அரசியல் அமைப்புக்கு இயைபானது என உச்ச நீதிமன்றம் அறிவித்துள்ளது. எனவே குறித்த சட்டமூலம் தொடர்பில் எத்தைகய வழக்குத் தாக்கல் செய்யப்பட்டிருந்தாலும் இந்த சட்டமூலத்தை இங்கு ஆராய முடியும்.

பாராளுமன்ற செயற்பாடுகளை உச்ச நீதிமன்றத்தினால் நிறுத்த முடியாது. இது தொடர்பில் முன்னாள் சபாநாயகர் அநுர பண்டாரநாயக்க முன்மாதிரியான தீர்ப்பு வழங்கியுள்ளார். மீயுயர் அதிகாரம் பாராளுமன்றத்துக்கே உள்ளது. பாராளுமன்ற சட்டமூலமொன்றை விவாதிக்க உச்ச நீதிமன்றத்துக்கோ வேறு நீதிமன்றத்துக்கோ தடை உத்தரவிடமுடியாது.

உச்ச நீதிமன்றத் தீர்ப்புக்களை பின்பற்றாது பாராளுமன்ற மீயுயர் அதிகாரம் இதற்கு முன்னர் பாதுகாக்கப்பட்டுள்ளது. உச்சநீதிமன்றத்தில் வழக்குத் தாக்கல் செய்யப்பட்டிருப்பதற்காக பாராளுமன்ற செயற்பாடுகளை எந்தவகையிலும் நிறுத்த முடியாது என்றார்.

இதற்குப் பதிலளித்த பிரதி சபாநாயகர் இன்று இந்த சட்டமூலம் தொடர்பில் விவாதம் நடைபெறவில்லை. இதனால் இந்த விடயம் தொடர்பாக இன்று கேள்வியெழுப்ப முடியாது. ஆனால் சபாநாயகர் இன்று (9) இதுதொடர்பான தனது தீர்ப்பை அறிவிப்பார் என்றார்.

குறித்த சட்டமூலத்தின் பிரகாரம் இனங்காணப்பட்ட செயற்திறனற்ற 36 நிறுவனங்கள் அரசுடமையாக்கப்படவுள்ளன. இதில் பெல்வத்த, செவனகல சீனித் தொழிற்சாலைகளும் அடங்கும்.