தூக்குத் தண்டனை கைதிகள்

கருணை மனுக்களின் விபரம் கோருகிறது இந்திய உச்சநீதிமன்றம்

இந்தியா முழுவதும் இதுவரை முடிவு எடுக்கப்படாத தூக்குத் தண்டனை கைதிகளின் கருணை மனுக்களின் விவரங்களை, டிசெம்பர் 16ந் திகதிக்குள் தாக்கல் செய்யும்படி, மத்திய அரசுக்கு உச்ச நீதிமன்றம் உத்தரவிட்டுள்ளது. ராஜீவ் காந்தி கொலைக் கைதிகளான பேரறிவாளன், சாந்தன், முருகன் ஆகிய மூவருக்கு விதிக்கப்பட்ட தூக்குத் தண்டனையை இரத்துச் செய்யக் கோரி, சென்னை மேல் நீதிமன்றத்தில் வழக்கு தொடரப்பட்டது. இந்த வழக்கில் அவர்கள் மூன்று பேருக்கும் தூக்குத் தண்டனையை நிறைவேற்ற தடை உத்தரவு பிறப்பிக்கப்பட்டது.

அதைத் தொடர்ந்து, இந்த வழக்கை சென்னை மேல் நீதிமன்றத்தில் விசாரிக்கக் கூடாது. வேறு மாநில நீதிமன்றத்திற்கு மாற்ற வேண்டும் எனக் கோரி, ஒரு அமைப்பு சார்பில் உச்ச நீதிமன்றத்தில் வழக்கு தொடரப்பட்டுள்ளது.

நீதிபதிகள் ஜி. எஸ். சிங்வி, முகோபாத்யாயா ஆகியோரைக் கொண்ட பெஞ்ச் நேற்று முன்தினம் காலை கூடியதும், இந்து மல்கோத்ரா என்ற பெண் வக்கீல் எழுந்து மூன்று பேர் தூக்குத் தண்டனை வழக்கை சென்னை உயர் நீதிமன்றத்திலிருந்து வேறு நீதிமன்றத்துக்கு மாற்றக் கோரி பேச முயன்றார். அவருக்கு பதில் அளித்த நீதிபதிகள் அதற்கு தனியாக மனு தாக்கல் செய்யும்படி தெரிவித்தனர்.

இதற்கிடையில், பஞ்சாப் மாநிலத்தில் புல்லர் என்பவருக்கு விதிக்கப்பட்ட தூக்குத் தண்டனையை இரத்துச் செய்யக் கோரி ஏற்கனவே தொடரப்பட்டிருந்த வழக்கு முதலில் விசாரணைக்கு எடுத்துக் கொள்ளப்பட்டது.

அனைத்து கருணை மனுக்கள் விவரம்

இந்த வழக்கில் ஆஜரான மூத்த வக்கீல் துள்சி வாதாடும்போது, மத்திய அரசின் உள்துறை அமைச்சகம், இந்தக் கருணை மனுக்களின் மீது எந்தெந்த திகதிகளில் முடிவு எடுத்தது என்ற விவரம், தகவல் அறியும் சட்டத்தில் தெரிவிக்கப்பட்டதைச் சுட்டிக்காட்டினார்.

உடனே, நீதிபதி ஜி. எஸ். சிங்வி, மத்திய அரசு வக்கீலான கூடுதல் சொலிசிட்டர் ஜெனரல் ராவத்திடம் இந்தியாவில் முடிவு எடுக்கப்படாமல், ஜனாதிபதியிடமும், மாநில கவர்னர்களிடமும் நிலுவையில் இருக்கின்ற அனைத்துக் கருணை மனுக்களைப் பற்றிய முழு விவரங்களையும் டிசெம்பர் 16 ஆம் திகதிக்குள் தாக்கல் செய்ய வேண்டும் என்று உத்தரவிட்டனர்.

எப்போது கருணை மனுக்கள் பெறப்பட்டன? எப்போது நிராகரிக்கப்பட்டன? என்பது குறித்த விவரங்களையும் தாக்கல் செய்ய வேண்டும் என்றும், அதனுடைய பிரதியை சட்டத்தரணி ஜெத்மலானிக்கு தர வேண்டும் என்றும் அந்த உத்தரவில் நீதிபதிகள் குறிப்பிட்டு உள்ளனர்.

ஜெத்மலானிக்கு வேண்டுகோள்

அத்துடன், சட்டத்தரணி ராம் ஜெத்மலானியிடம் நீதிபதி சிங்வி கூறியதாவது, இந்தியாவில் மரண தண்டனை விதிக்கப்பட்டு உள்ள பலர் வசதி அற்றவர்கள் என்பதால், வக்கீல்களைக் கொண்டு உச்ச நீதிமன்றத்தில் வாதாட வாய்ப்பு இல்லாமல் இருப்பார்கள். எனவே, இந்தியாவில் மரண தண்டனை விதிக்கப்பட்டு, ஜனாதிபதி மற்றும் ஆளுநர்களிடம் கருணை மனுக்கள் தாக்கல் செய்து உள்ளவர்கள் அனைவரும் சார்பிலும், இது குறித்து இந்த நீதிமன்றம் தக்க முடிவு எடுக்க உதவுகின்ற வகையில், நீங்கள் இந்த நீதிமன்றத்தின் நண்பனாக இருந்து உதவ வேண்டும் என்றர். அதற்கு ராம் ஜெத்மலானி, இதை இந்த நீதிமன்றம் எனக்கு அளித்த பெருமையாகக் கருதுகின்றேன். இந்தியா முழுவதும் தூக்குத் தண்டனை விதிக்கப்பட்டவர்களுக்காக நான் வாதாடுவேன். அதற்கு இடையில், சென்னையில் உள்ள மூவர் தூக்கு குறித்த வழக்கில் வாதிடுவதை ஒத்தி வைப்பேன் என்று கூறினார்.

ராம் ஜெத்மலானியை போல, மூத்த வக்கீல் அந்தி அர்ஜுனாவும் இந்தப் பிரச்சினையில் நீதிமன்றத்துக்கு உதவியாக வாதாட வேண்டுமென நீதிபதிகள் கேட்டுக்கொண்டனர். பின்னர் கருணை மனுக்கள் குறித்த அடுத்த விசாரணை ஜனவரி மாதம் இரண்டாவது வாரத்துக்கு தள்ளி வைக்கப்பட்டது. ராஜீவ் கொலை வழக்கில் தூக்குத் தண்டனை பெற்ற மூவர் வழக்கு விசாரணையில் ம. தி. மு. க. பொதுச் செயலாளர் வைகோவும் கலந்துகொண்டார். விசாரணை முடிந்ததும் மேற்கண்ட தகவல்களை வைகோ நிருபர்களிடம் தெரிவித்தார். ‘கருணை மனுக்கள் தாக்கல் செய்யப்பட்டவர்களின் வழக்கில் இருந்து பேரறிவாளன், சாந்தன், முருகன் வழக்கு வேறுபட்டதாகும். எனவே, நவம்பர் 29ம் திகதி சென்னை உயர் நீதிமன்றத்தில் இந்த வழக்கு வருகின்றபோது, உச்ச நீதிமன்றத்தில் மேற்கொள்ளப்பட்டு உள்ள நிலை சுட்டிக்காட்டப்படும்’ என்றும் அவர் கூறினார்.