யாழ்ப்பாணத்தில் மீள்குடியேறிவரும் முஸ்லிம்கள் எதிர் நோக்கும் பிரச்சினைகள் குறித்து ஹக்கீம் ஆராய்வு

இருபது ஆண்டுகளின் பின்னர் யாழ்ப்பாணத்தில் மீள்குடியேறி வரும் முஸ்லிம்கள் எதிர்நோக்கும் பல்வேறு பிரச்சினைகள் தொடர்பாக நீதியமைச்சரும் ஸ்ரீலங்கா முஸ்லிம் காங்கிரஸ் தலைவருமான ரவூப் ஹக்கீம், யாழ் மாவட்ட செயலாளர் (அரசாங்க அதிபர்) திருமதி. இமெல்டா சுகுமாருடன் நேற்று வெள்ளிக்கிழமை முற்பகல் அவரது அலுவலகத்தில் சந்தித்து நீண்ட நேரம் கலந்துரையாடினார். சுமுகநிலை ஏற்பட்டுள்ளதையடுத்து முன்னர் யாழ்ப்பாணத்தில் வசித்த முஸ்லிம்கள் கட்டம் கட்டமாக அங்கு திரும்பி மீள்குடியேறி வருவதாகவும், அவர்கள் அநேக பிரச்சினைகளுக்கு முகம் கொடுப்பதாகவும், அவற்றை நிவர்த்தி செய்ய அரசாங்க மட்டத்தில் தேவையான வசதிகள் அனைத்தையும் ஏற்படுத்திக் கொடுக்க வேண்டுமென்றும் அமைச்சர் ஹக்கீம் மாவட்ட செயலாளரிடம் கேட்டுக் கொண்டார்.

குறிப்பாக 1990 ஆம் ஆண்டுக்கு முன்னர் யாழ்ப்பாணத்தில் வசித்த முஸ்லிம்கள் அங்கிருந்து வெளியேற்றப்பட்டதைத் தொடர்ந்து புத்தளம், நீர்கொழும்பு, குருநாகல், கொழும்பு முதலான வேறு மாவட்டங்களில் சென்று குடியேறி வாழ்ந்த பின்னர் குடும்பத் தலைவர்கள் முதலிலும் அடுத்து ஏனைய குடும்ப உறுப்பினர்களுமாக சொந்த இடங்களுக்குத் திரும்பி மீள் குடியேறி வரும் நிலையில் காணி, வசிப்பிடம், உடைமைகள், பொருளாதாரம், வாக்குரிமை போன்றவற்றில் நிறைய சிக்கல்களுக்கும், பிரச்சினைகளுக்கும் ஆளாகியிருப்பதை அமைச்சர் ஹக்கீம் சுட்டிக்காட்டினார்.

வாக்காளர் இடாப்புக்களில் இருந்து பலரது பெயர்கள் நீக்கப்பட்டுள்ளதாகவும் தம்மை வாக்காளர்களாக பதிவு செய்து கொள்வதில் சிரமங்களை எதிர்நோக்குவதாகவும், கிராம சேவையாளர்களை சந்திக்க முடியாத நிலை காணப்படுவதாகவும் அமைச்சர் குறிப்பிட்டார். புதிய சுற்று நிருபம் பற்றி கூறப்பட்ட போது நாம் கொழும்பில் தேர்தல் ஆணையாளருடன் வாக்காளர் பதிவு பற்றி நேரில் சந்தித்து கலந்துரையாடி பிரச்சினைக்குரிய தீர்வைக் காணவுள்ளதாக அமைச்சர் ஹக்கீம் கூறினார்.

பொம்மைவெளி, பரச்சேரிவெளி போன்ற இடங்களில் முன்னர் வசித்த முஸ்லீம்களுக்கு சொந்தமாயிருந்த காணிகளில் வேறு பலர் வசித்து வருவதாக அல்லது அவற்றுக்கு சொந்தம் கொண்டாடுவதாக மாவட்டச் செயலாளரிடம் கூறப்பட்ட போது, தமக்கு முன்னர் பதவியிலிருந்த அரசாங்க அதிபர்களின் காலத்தில் அவ்வாறு நடைபெற்றிருந்தால் தாம் அதில் கவனம் செலுத்தி உரியவர்கள் அவற்றை பெறத்தக்க வகையில் நடவடிக்கை எடுப்பதாக திருமதி. சுகுமார் தெரிவித்தார். சோனகத்தெரு (மூர் வீதி) மக்களின் பிரச்சினைகள் பற்றியும் முக்கியமாக ஆராயப்பட்டது. வசிப்பதற்கு காணி இல்லாதவர்களுக்கு " பிம் சவிய'' செயல்திட்டத்தின் கீழ் இடங்களைப் பெற்றுக்கொடுப்பதற்கான சாத்தியப்பாடு பற்றியும் ஆராயப்பட்டது.

இந்திய வீட்டுத் திட்டத்தின் கீழ் நாநூற்று முப்பத்தேழு முஸ்லிம் குடும்பங்கள் வீடுகள் பெறத் தகுதி பெற்றிருந்தும், நூற்று அறுபத்தேழு குடும்பங்கள் சமர்ப்பித்த விண்ணப்பங்களே அங்கீகரிக்கப்பட்டிருப்பதை அமைச்சர் மாவட்டச் செயலாளரின் கவனத்திற்குக் கொண்டுவந்தார்.

மன்னார், வவுனியா, முல்லைத்தீவு போன்ற மாவட்டங்களில் மீள்குடியேறும் மக்களுக்கு முதல் கட்டமாக இருபத்தையிரம் ரூபாக்கள் வழங்கப்படும்போது யாழ்ப்பாணத்தில் ஐயாயிரம் ரூபாக்களே வழங்கப்படுவதாக சுட்டிக்காட்டப்பட்டது. அது பற்றி கவனம் செலுத்துவதாக மாவட்டச் செயலாளர் தெரிவித்தார். முதல் ஆறு மாதங்களுக்கான உலர் உணவு பொருட்கள் வழங்கி முடிவடைந்த நிலையில் வசதியற்று வாழ்வோருக்கு சமுர்த்தி உதவியை பெற்றுக் கொடுப்பதற்கு நடவடிக்கை எடுக்க முடியுமென அமைச்சர் ஹக்கீம் கூறினார். அத்துடன் அரச சார்பற்ற நிறுவனங்கள் மீள்குடியேறும் முஸ்லிம்கள் தொடர்பில் போதிய கவனம் செலுத்தாததையிட்டு அமைச்சர் கவலை தெரிவித்தார்.

இந்தச் சந்திப்பில் அமைச்சரின் யாழ். மாவட்ட இணைப்பாளர் ரொஷான், சோனகத்தெரு முஹம்மதிய்யா பள்ளிவாசல் தலைவர் எம்.ஏ.சீ.ஏ. முபீன், மானிப்பாய் பெரிய முஹியத்தீன் பள்ளிவாசல் தலைவர் எம்.எஸ். லாபீர், யாழ், கிளிநொச்சி முஸ்லிம் சம்மேளனத் தலைவர் ஏ.எம்.ஜமால், செயலாளர் ஜயூப் அஸ்மீல், முன்னாள் யாழ். பிரதி மேயர் எம்.ஜி. பஷீர், சட்டத்தரணி எம்.எஸ்.எம். ரமீஸ் ஆகியோர் உட்பட ஏனைய முக்கியஸ்தர்கள் சிலரும் கலந்து கொண்டனர்.

வியாழக்கிழமை யாழ்ப்பாணம் குருநகர் சிறுவர் நீதிமன்றம், பருத்தித்துறையில் புனரமைக்கப்பட்ட நீதவான் நீதிமன்றம் ஆகியவற்றை உத்தியோகபூர்வமாக திறந்து வைப்பதற்காக பிரதம நீதியரசருடன் யாழ். விஜயத்தை மேற்கொண்ட நீதியமைச்சர் ஹக்கீம் பருத்தித்துறையில் அமைந்துள்ள ஆங்கிலேயர் காலத்தில் தென் இந்தியா தேவிப்பட்டணம் முஸ்லிம் வர்த்தகர்கள் அங்கு வசித்தபோது நிர்மாணித்திருந்த பழைமையான பள்ளிவாசலையும் சென்று பார்வையிட்டார். முஸ்லிம்கள் அங்கிருந்து வெளியேற்றப்பட்ட நிலையில் யுத்தகாலத்திலும் கூட தமிழ் மக்கள் அந்தப் பள்ளிவாசலைப் பாதுகாத்து வந்ததாக பருத்தித்துறை நகரசபை பிரதித் தலைவர் பத்மநாதன் அமைச்சரிடம் தெரிவித்தார். அந்தப் பள்ளிவாசலை புனரமைக்க உதவுமாறும் அவர் கேட்டுக் கொண்டார்.