ஸ்பெக்ட்ரம் வழக்கில் திருப்பம்

பா.ஜனதா ஆட்சியில் உரிமம் வழங்கப்பட்ட செல்போன் நிறுவனங்களில் சி.பி.ஐ சோதனை

2ஜி ஸ்பெக்ட்ரம் ஒதுக்கீடு ஊழல் காரணமாக மத்திய அரசுக்கு ரூ. 1.76 லட்சம் கோடி இழப்பு ஏற்பட்டதாக மத்திய கணக்கு தணிக்கைத் துறை கண்டுபிடித்து அறிவித்தது. இதையடுத்து உச்ச நீதிமன்ற உத்தரவின் பேரில் சி.பி.ஐ. வழக்கப் பதிவு செய்து முன்னாள் மத்திய மந்திரி ஆ. ராசா, கனிமொழி எம்.பி, கலைஞர் ரி.வி. நிர்வாக இயக்குனர் சரத்குமார் உட்பட 14 பேரை கைது செய்து டில்லி திகார் ஜெயிலில் அடைத்துள்ளனர். ஸ்வான், யூனிடெக், ரிலையன்ஸ் ஆகிய நிறுவனங்கள் மீதும் வழக்கு தொடரப்பட்டுள்ளது. இந்த வழக்கு விசாரணை டில்லி சிறப்பு சி.பி.ஐ. கோர்ட்டில் நீதிபதி சைனி முன்னிலையில் நடந்து வருகிறது. இதுவரை சி.பி.ஐ. இந்த வழக்கில் இரண்டு குற்றப் பத்திரிகைகளை தாக்கல் செய்துள்ளது. சதி கூட்டு வசதி அரசுக்கு வருவாய் இழப்பு ஏற்படுத்துதல், அரசுக்கு எதிராக நம்பிக்கை துரோகம் செய்தல் என பல பிரிவுகளில் குற்றம் சுமத்தப்பட்டுள்ளது.

ஸ்பெக்ட்ரம் உரிமம் பெற்ற நிறுவனங்கள் ஒரு பைசா கூட செலவு செய்யாமல் எப்படி இலாபம் சம்பாதித்தன என்பதும் குற்றப்பத்திரிகையில் கூறப்பட்டுள்ளது. ஸ்வான் நிறுவனம் ஸ்பெக்ட்ரம் உரிமத்தை ரூ. 1,537 கோடிக்கு வாங்கி அதை ஐக்கிய அரபு குடியரசு நாட்டைச் சேர்ந்த எடிசலாட் நிறுவனத்துக்கு ரூ. 4,500 கோடிக்கு விற்றது.

இதன் மூலம் ஸ்வான் நிறுவனத்துக்கு ரூ. 2,963 கோடி இலாபம் கிடைத்தது. அது போல ரூ. 1,651 கோடிக்கு ஸ்பெக்ட்ரம் உரிமம் பெற்ற யூனிடெக் நிறுவனம் அதை நோர்வே நாட்டைச் சேர்ந்த டெலிநார் நிறுவனத்துக்கு ரூ. 6,120 கோடிக்கு விற்றது. இதன் மூலம் யூனிடெக் நிறுவனத்துக்கு கிடைத்த இலாபம் ரூ. 4,469 கோடி. ஸ்வான் யூனிடெக் நிறுவனங்கள் போல ஸ்பெக்ட்ரம் உரிமம் பெற்ற மற்ற நிறுவனங்களும் பல ஆண்டுகளுக்கு முன்பிருந்தே முறைகேடுகளில் ஈடுபட்டிருக்கலாம் என்று சி.பி.ஐ.க்கு சந்தேகம் எழுந்தது.

இதையடுத்து பா.ஜ.க. தலைமையிலான தேசிய ஜனநாயக கூட்டணி ஆட்சியில் 1999 ஆம் ஆண்டு முதல் செய்யப்பட்ட ஸ்பெக்ட்ரம் ஒதுக்கீடு பற்றியும், உரிமம் பெற்ற நிறுவனங்கள் பற்றியும் விசாரணை நடத்தப்போவதாக சி.பி.ஐ. அறிவித்தது. பா.ஜ.க. ஆட்சியின் போது வோடாபோன், ஏர்டெல் ஆகிய இரண்டு தொலைத் தொடர்பு நிறுவனங்களுக்கு ஸ்பெக்ட்ரம் ஒதுக்கீடுகள் செய்யப்பட்டன.

அப்போது தொலைத் தொடர்புத் துறை மந்திரிகளாக பிரமோத் மகாஜன், அருண்ஷோரி இருந்தனர். இவர்களில் பிரமோத் மகாஜன் இறந்து விட்டார். அருண்ஷோரி சி.பி.ஐ. முன்பு ஆஜராகி பா.ஜ.க. ஆட்சிக் காலத்தில் ஸ்பெக்ட்ரம் உரிமங்கள் எப்படி வழங்கப்பட்டன என்று விளக்கம் அளித்தார்.

பா.ஜ.க. ஆட்சியின் போது செய்யப்பட்ட ஸ்பெக்ட்ரம் ஒதுக்கீடுகள் எந்தவித சர்ச்சையையும் ஏற்படுத்தாததால், அதன் மீது யார் கவனமும் திரும்பவில்லை. அதற்கு மாறாக தயாநிதி மாறன் மத்திய தொலைத் தொடர்பு மந்திரியாக இருந்த போது செய்யப்பட்ட ஸ்பெக்ட்ரம் ஒதுக்கீடுகள் பற்றியும், அவர் ஏர்செல் நிறுவனத்தை மிரட்டி விற்க செய்ததாக கூறப்படும் குற்றச்சாட்டு பற்றியும் மக்கள் மத்தியில் எதிர்பார்ப்பு ஏற்பட்டது.

சமீபத்தில் தயாநிதி மாறனிடமும் கலாநிதி மாறனிடமும் இது தொடர்பாக சி.பி.ஐ. விசாரணை நடத்தியது. ஏர்செல் மேக்சிஸ் நிறுவனங்களின் பங்கு மாற்று ஒப்பந்தத்தில் சதி இருப்பதாக சி.பி.ஐ. வழக்குப்பதிவு செய்துள்ளது. எனவே அடுத்த குற்றப்பத்திரிகை விரைவில் தாக்கலாகும் என்று தகவல்கள் வெளியாயின.