நாடெங்கும் அடைமழை, வெள்ளம், மினிசூறாவளி

கிழக்கில் கிராமங்கள் நீரில் மூழ்கின தெற்கில் மினி சூறாவளி

நாடளாவிய ரீதியில் நேற்று பெய்த கடும் மழை, மற்றும் மினிச் சூறாவளியினால் வடக்கு, கிழக்கு உட்பட பல பிரதேசங்கள் கடுமையான பாதிப்புக்கு உள்ளாகியதுடன், மக்களின் இயல்பு வாழ்க்கை பாதிக்கப்பட்டது. மினிச் சூறாவளி மற்றும் வெள்ளம் காரணமாக மாத்தறை மாவட்டத்தில் 7 பேர் உயிரிழந்துள்னர். 106 வீடுகள் முழுமையாக சேதமாகியுள்ளதுடன் 955 வீடுகள் பகுதிகளாக பாதிப் படைந்துள்ளன. மாத்தறையில் மினிச் சூறாவளியினால் மரங்கள் முறிந்து வீழ்ந்ததில் 3 பேரும் கடலுக்குச் சென்றவர்கள் நால்வருமே உயிரிழந்துள்ளதாக அனர்த்த முகாமைத்துவ நிலையம் தெரிவித்தது. அநுராதபுரம், மொனராகலை பகுதிகளில் இருவர் காணாமற் போயுள்ளதுடன், மாத்தறை மாவட்டத்தில் பாடசாலை மாணவர்கள் மூவர் காயமடைந்து வைத்திய சாலையில் அனுமதிக்கப்பட்டுள்ளனர்.

இம்மழை, கடுங்காற்று காரணமாக காலி மாவட்டத்தில் நூறு வீடுகள் சேதமடைந்திருப்பதாக காலி மாவட்ட மேலதிக செயலாளர் குறிப்பிட்டார். இதேநேரம் இரணைமடு குளத்தின் பத்து வான் கதவுகளும் திறக்கப் பட்டுள்ளன. இதேவேளை, வெள்ளம், சூறாவளி மற்றும் மண் சரிவு அனர்த்தங்களினால் பாதிப்புற்ற பகுதிகளின் நிவாரண நடவடிக்கைகளுக்கு பாதுகாப்புப் படையினரின் ஒத்துழைப்புகளைப் பெற்றுக்கொள்ளுமாறு ஜனாதிபதி மஹிந்த ராஜபக்ஷ அவர்கள் அனர்த்த முகாமைத்துவ தேசிய சபை அதிகாரிகளைக் கேட்டுக்கொண்டுள்ளார்.

நேற்று அலரி மாளிகையில் அனர்த்த முகாமைத்துவ தேசிய சபை கூடிய போதே ஜனாதிபதி இவ்வேண்டு கோளை விடுத்துள்ளார். அனர்த்தங் களினால் பாதிக்கப்படும் வீடுகளுக்கு நஷ்டஈடுகளை வழங்க காப்புறுதித் திட்டமொன்றை அறிமுகப்படுத்து மாறும் ஜனாதிபதி கேட்டுக்கொண் டார்.

தொடர் மழை காரணமாக கிழக்கு மாகாணத்தின் பல்வேறு பிரதேசங்கள் வெள்ளத்தில் மூழ்கியதுடன், மாத்தறை மாவட்டத்தில் வீசிய மினிச் சூறாவளியினால் வீடுகள் சேதமடைந்து மரங்கள் முறிந்து விழுந்ததில் வீதிகளின் போக்குவரத்து நடவடிக்கைகளும் பாதிக்கப்பட்டன. மாத்தறை மாவட்டத்தில் நேற்றுக் காலை 9 மணி முதல் சுமார் மூன்று மணித்தியாலங்கள் மினிச் சூறாவளி வீசியது. இதனால் மாவட்டத்தின் பல்வேறு பிரதேசங்கள் பெரிதும் பாதிக்கப்பட்டன. வீதிகளிலும் வீடுகளிலும் மரங்கள் முறிந்து விழுந்ததில் போக்குவரத்து நடவடிக்கைகள் பாதிக்கப்பட்டன. கடற்கரையை அண்டிய பிரதேச மக்கள் பெரும் அச்சத்துக்குள்ளா னதுடன், கடலுக்கு மீன் பிடிக்கச் சென்றவர்கள் தொடர்பில் தகவல்கள் எதுவும் கிடைக்கவில்லை எனவும் அங்கிருந்து கிடைத்த தகவல்கள் தெரி வித்தன. நேற்று பிற்பகலில் காலி மாவட் டத்தின் சில பகுதிகளிலும் பலத்த காற்று வீசியதாகவும் தகவல்கள் கிடைத்தன.

மட்டக்களப்பு மாவட்டத்தில் வெள்ளப்பெருக்கு காரணமாக நேற்றும் 100 குடும்பங்கள் பாதிக்கப்பட்டுள்ளன. இவர்கள் தமது உறவினர்களின் வீடுகளில் தஞ்சம் புகுந்துள்ளதாக மாவட்ட அனர்த்த முகாமைத்துவ நிலையம் தெரிவித்தது.

இம்மாவட்டத்தில் 50,000 ஏக்கர் நெற்செய்கை பிரதேசம் வெள்ளத்தில் மூழ்கியுள்ளது. வாகனேரி வெல்லாவெளி கொக்கட்டிச்சோலை, வவுணதீவு, செங்கலடி, கிரான், வாகரை ஆகிய பகுதிகளிலேயே நெற் செய்கைகள் பாதிக்கப்பட்டுள்ளன. களுவாஞ்சிக்குடி, ஆரையம்பதி, காத்தான்குடி, ஏறாவூர், கிரான், வாழைச்சேனை, ஓட்டமாவடி, வெல்லாவெளி, பட்டிப்பளை, வவுணதீவு போன்ற பிரதேசங்களின் தாழ் நிலங்கள் வெள்ளத்தினால் மூழ்கியுள்ளன.

வெள்ளம் காரணமாக ஏறாவூர் பிரதேச செயலகப் பிரிவுக்குட்பட்ட 75 குடும்பங்களும், வவுணதீவு, கரவெட்டி பிரதேசங்களில் 22 குடும்பங்களும் கிரான், பிரம்படித்தீவு பகுதிகளில் பல குடும்பங்களும் இடம்பெயர்ந்துள்ளன. வாகரை, பட்டிப்பளை, வவுணதீவு பகுதிகளில் வெள்ளம் காரணமாக பல பாதைகள் போக்குவரத்துக்கு மூடப்பட்டி ருந்தன.

அக்கரைப்பற்று பகுதியில் தாழ்நிலங்கள் வெள்ளத்தில் மூழ்கியுள்ளதால் பெருமளவு நெற் செய்கைகள் பாதிக்கப்பட்டுள்ளன. களுத்துறை மாவட்டத்தில் தொடர்ச்சியாக பெய்துவரும் மழை காரணமாக மக்களின் இயல்பு நிலை பாதிக்கப்பட்டுள்ளது. குறிப்பாக தோட்டப்புறங்களில் மக்கள் வேலைக்குச் செல்ல முடியாத நிலையும் உருவாகியுள்ளது. காலி, மாத்தறை மாவட்டங்களில் கடும் மழையுடன் கூடிய காற்றும் வீசுவதால் பல கட்டட ங்கள் சேதமடைந்துள்ளன. வெலிகம மிதிகம பகுதி பாடசாலையொன்றின் மீது மரம் ஒன்று முறிந்து வீழ்ந்ததில் மூன்று மாணவர்கள் காயமுற்று வைத்தியசாலையில் அனுமதிக்கப்பட்டுள்ள தாக பாடசாலையின் அதிபர் ஜகத் குமாரசிறி தெரிவித்தார். இதனையடுத்து மாவட்டததின் பல பாடசாலைகள் நேற்று மூடப்பட்டுள்ளன. பதுளை மாவட்டத்தில் நேற்று கடும் மழையுடன் மண் சரிவும் ஏற்பட்டுள்ளது. பதுளை ஓயா, உமா ஒயா போன்ற பகுதிகளில் வெள்ளம் பெருக்கெடுத்து ள்ளதால், ஆறு களை அண்மித்த பகுதிகளில் வாழும் மக்கள் பாதுகாப்பான இடங்களு க்குச் செல்லுமாறு பணிக்கப்பட்டு ள்ளனர். நுவரெலியா மாவட்டத்தில் நேற்று பெய்த கடும் மழையினால் பல வீதிகள் வெள்ளத்தினால் மூழ்கியுள்ளன. அத்துடன் மன்னார் நகரமும் வெள்ளத்தினால் மூழ்கியுள்ளதாக அங்கிருந்து தகவல்கள் கிடைத்தன.