அதிகாரப் பகிர்வை அர்த்தமுள்ளதாக்க மாகாணசபை முறைமையை மாற்ற வேண்டியது அவசியம் - ஜனாதிபதி

அதிகாரப் பகிர்வினை அர்த்தமுள்ளதாக மாற்றுவதற்காக தற்பொழுது காணப்படும் மாகாண சபை முறைமையை மாற்ற வேண்டியது அவசியமானது என ஜனாதிபதி மஹிந்த ராஜபக்ஷ தெரிவித்தார். தேசிய தராதரங்களை பயன்படுத்தி மாகாண முரண்பாடுகளை இல்லா தொழிப்பதே தேசிய நல்லிணக்கத்தினை ஊக்குவிப்பதற்கான பிரதான ஆயுதம் என்று கூறிய அவர் நாட்டு மக்கள் எதிர்நோக்கும் பிரச்சினைகளைத் தீர்ப்பதற்கு ஆக்கபூர்வமாக ஒத்துழைக்குமாறு எதிர்க்கட்சித் தலைவர், தமிழ் தேசிய கூட்டணி தலைவர் மற்றும் ஜே. வி. பி. தலைவர் ஆகியோருக்கு அழைப்பு விடுத்தார்.

2013 ஆம் ஆண்டுக்கான வரவு செலவுத் திட்ட உரையில் கருத்துத் தெரிவித்த ஜனாதிபதி மேலும் கூறியதாவது:-

இந்தப் பாராளுமன்றத்தில் உள்ள எதிர்க்கட்சி மற்றும் அரசாங்க தரப்பு உறுப்பினர்கள் அனைவரும் தேசிய நலனுக்காக நாம் ஒன்றுபட்டு செயற்பட முடியும் என்பதனை வெளிக் காட்டியிருக்கின்றனர்.

குடும்ப விழுமியங்களினால் பேணி வளர்க்கப்பட்ட பாரம்பரிய, கிராமிய, மர புரிமையின் செல்வாக்கிற் குட்பட்ட நீண்டகால அரசியல் அனுபவங்களினால் பெறப்பட்ட முதிர்ச்சி மற்றும் பொது நலவாய பாராளுமன்ற மாநாட்டினை நடாத்துவதற்கு இந்தப் பாராளுமன்றத்திற்கு உங்களால் வழங்கப்பட்ட தலைமத்துவமானது, நாம் சிறுவர்களாக இருந்தபோது மறைந்த எனது தந்தை டீ. ஏ. ராஜபக்ஷ அவர்கள் வழங்கிய அமைதியான தலைமைத்துவத்தினை ஞாபகப் படுத்துகின்றது. எமது தேசத்தின் சுமையாகக் காணப்படுகின்ற பிரச்சினைகளை நாம் தீர்த்துவைப்பதற்கு இது போன்ற உணர்வுடன் ஒன்றுபட்டு செயலாற்ற வேண்டும்.

எமது மக்களுக்கு அதிகாரப் பகிர்வினை அர்த்தமுள்ளதாக மாற்றுவதற்கு தற்பொழுது காணப்படும் மாகாண சபை முறைமை மாற்றப்படவேண்டியது அவசியமாகும். அதிகார பகிர்வு என்பது எம்மை கூறுபோடுகின்ற அரசியல் மறுசீரமைப்பாக இருக்க முடியாது.

அது எம் அனைவரையும் ஒன்றுபடுத்த வேண்டும். அத்தகைய மறுசீரமைப்புகள் அதிக செலவினம் கொண்டதாகவோ மக்கள் மீது சுமையினை ஏற்படுத்தக் கூடிய சிக்கலான நிருவாகக் கட்டமைப்பினையோ கொண்டிருக்க முடியாது. இலங்கையின் எல்லா பகுதிகளிலிருந்தும் என்னை சந்தித்த தமிழ், முஸ்லிம் அல்லது சிங்களவர் அனைவரும் கல்வி, சுகாதாரம், வேலைவாய்ப்பு, சிறந்த வாழ்க்கைத்தரம் மற்றும் நாட்டில் சம அந்தஸ்துடன் வாழ்தல் என்பவற்றையே வேண்டினர். தேசிய தராதரங்களை பயன்படுத்தி மாகாண முரண்பாடுகளை இல்லா தொழிப்பதே தேசிய நல்லிணக்கத்தினை ஊக்குவிப்பதற்கான பிரதான ஆயுதமாகும். இந்த அரசாங்கம் எமது மக்களின் அபிலாஷைகள் அனைத்தையும் நிறைவேற்றி வைப்பதற்கு தொடர்ந்தும் அர்ப்பணிப்புடன் உள்ளது.

எனவே எதிர்க்கட்சி தலைவர், தமிழ் தேசிய கூட்டணியின் தலைவர், மற்றும் மக்கள் விடுதலை முன்னணியின் தலைவர் போன்றவர்களை எமது மக்கள் எதிர்நோக்கும் பிரச்சினைகளைத் தீர்ப்பதற்காக ஆக்கபூர்வமாக எம்முடன் ஒத்துழைக்க வருமாறு நான் அழைப்பு விடுக்கின்றேன். இம்முயற்சியானது எமது உள்நாட்டுப் பிரச்சினைகளில் வெளிநாடுகளின் தலையீடுகளை ஏற்படுத்தாது, இது மிகவும் சுயமரியாதையுடன் கூடியதாகும். எதிர்க்கட்சி தலைவர், தமிழ் தேசிய கூட்டணியின் தலைவர் மற்றும் நான் உட்பட இப்பணியினை முன்னெடுத்துச் செல்வதற்கு எமது வாழ்க்கையிலும் அரசியலிலும் போதியளவான அனுபவத்தினைப் பெற்றிருக்கின்றோம்.

கெளரவ சபாநாயகர் அவர்களே, வறுமை தணிப்பு மற்றும் எமது குறைவருமானம் பெறும் மக்களின் வாழ்க்கைத்தர மேம்பாடு என்பவற்றின் பால் எமது பயணம் பாராளுமன்றத்தில் கடினமானதாக இருந்ததுடன், திவி நெகும அபிவிருத்தி திணைக்களத்தினை தாபிக்கின்ற சட்ட மூலத்தினை அங்கீகரிப்பதில் நீண்ட செயன்முறையினை எதிர்நோக்க வேண்டியேற்பட்டது.

இது எமது தேசம் ஆபத்துக்களிலிருந்து விடுபட்டுவிட்டதுவென ஓய்வாக இருப்பதற்கு எம்மை அனுமதிக்கின்ற மைல்கல்லாக முடியாது என்பதனைக் காட்டுகின்றது. அரசியல், பொருளாதார மற்றும் இயற்கை சுனாமிகள் என பல இருக்க முடியும். அவை அனைத்தும் எதிர்வுகூற முடியாதவையாகும். இந்த வகையில் வறுமையினை இல்லாதொழித்து வறிய மக்களின் வாழ்க்கைச் சூழலை தரமுயர்த்துவது எமது விடுபடாத இலக்காகும். 2015 ஆம் ஆண்டளவில் வறுமையற்ற இலங்கையினை உருவாக்குவதற்கு நாம் அனைவரும் அர்ப்பணிப்புடன் செயற்படுவோமாக.