கனடிய இன்ரர்போல்

தாய்லாந்தில் தேடுதல் நடவடிக்கை - 130ற்கும் மேற்பட்ட இலங்கை அகதிகள் கைது

தாய்லாந்தில் தாய்லாந்து பொலிசாரும், கனேடியன் இன்ரர்போலும் இணைந்து நடத்திய சுற்றிவளைப்புத் தேடுதல் நடவடிக்கையின் போது 130ற்கும் மேற்பட்ட இலங்கை அகதிகள் கைது செய்யப்பட்டுள்ளனர். கைதுசெய்யபட்டவர்களிள் 60 ஆண்கள் 50 பெண்கள் 7 கர்ப்பணித்தாய்மார்கள் 13 குழந்தைகளும் உள்ளனர். இவர்களுள் விசா இன்றி அங்கு தங்கியிருந்த தம்மை அகதிகளாக ஐக்கிய நாடுகள் அமைப்பில் பதிவு செய்திருந்த இலங்கை அகதிகளும் கப்பலில் கனடாவிற்கு செல்வற்காக வந்திருந்த அகதிகளும் கைதுசெய்யப்பட்டு தாய்லாந்து குடிவரவு திணைக்கள சிறப்பு முகாமிற்கு அழைத்துச் செல்லப்பட்டவர்களுள் உள்ளடங்கியுள்ளனர்.

இன்றுகாலை 06.30 மணியளவில் தாய்லாந்தின் ஒன்சபோன், சபான்மை, பொம்சிங் மற்றும் சபான்மை பிக்சி சுற்றுவட்டாரப் பிரதேசங்களை திடீரென சுற்றிவளைத்த தாய்லாந்து குடிவரவு திணைக்கள அதிகாரிகள், தாய்லாந்து இராணுவத்தினர் மற்றும் கனேடிய இன்ரர்போல் பொலிஸார் இவர்களைக் கைதுசெய்து கொண்டு சென்றுள்ளனர்.

அத்துடன் சுற்றிவளைப்புத் தேடுதல் நடவடிக்கையினை கனேடியன் இன்ரர்போலும், தாய்லாந்து இராணுவத்தினரும் தொடர்ந்து முன்னெடுத்து வருகின்றனர். இந்நிலையில் தாய்லாந்திலிருந்து கப்பலில் கனடாவுக்கு இலங்கையர்களை அனுப்பிவரும் நடவடிக்கையினை கட்டுப்படுத்தவே இந்நடவடிக்கை முன்னெடுக்கப்பட்டு வருவதாகவும் இவர்களை அனுப்பிவைக்கும் பிரதான முகவர்கள் உதவி முகவர்கள் சந்தேகநபர்கள் தப்பியோடி விட்டதாகவும் தாய்லாந்து குடிவரவு குடியகல்வு திணைக்கள அதிகாரிகள் தரப்பில் பேசப்படுகின்றது.

இன்றுகாலை இடம்பெற்ற சுற்றிவளைப்புத் தேடுதல் நடவடிக்கையின் போது கைது செய்யப்பட்டு சிறப்பு முகாமிற்கு கொண்டு செல்லப்பட்டவேளை தாய்லாந்து குடிவரவு திணைக்கள அதிகாரிகளைத் தாக்கிவிட்டு 15 இலங்கையர்கள் தப்பியோடி விட்டதாகவும், இதனைத் தொடர்ந்து தாய்லாந்து இராணுவமும், கனேடியன் இன்ரர்போலும் தொடர்ந்து தேடுதல்களை நடத்தி வருவதாகவும் கூறப்படுகின்றது.

இந்த சுற்றிவளைப்பு தேடுதல் நடவடிக்கை மற்றும் கைது என்பவற்றின் பின்னணியின் இலங்கை அரசின் இராஜதந்திர செயற்பாடும், கனேடியன் இன்டர்போலும் இருப்பதாக தெரிவிக்கப்படுகின்றது. இந்நிலையில் தாய்லாந்தில் தங்கியுள்ள தம்மை ஐக்கிய நாடுகள் அமைப்பில் அகதிகளாக பதிவு செய்துகொண்டுள்ள இலங்கை அகதிகள் பெரும் பதற்றத்துடன் உள்ளனர்.

அத்துடன் இவ்வாறான சுற்றிவளைப்பு தேடுதல் நடவடிக்கைகள் தொடர்ந்து முன்னெடுக்கப்படுமென்றும் அத்துடன் பிரதான முகவர்கள் உதவி முகவர்கள் சந்தேகநபர்கள் ஆகியோரின் பெயர் விபரம் மற்றும் புகைப்படங்கள் என்பன வெளியிடப்படுமென்றும் குடிவரவு அதிகாரிகள் தெரிவித்துள்ளனர்.

அண்மையில் கனடாவிற்கு சன் சீ கப்பலில் அகதிகளாக வந்தடைந்த 492 பேரும் புறப்பட்ட மூலவேர் தாய்லாந்து என கனடிய உளவுத்துறை விசாரணைகளிலிருந்து அறிந்து கொண்டது. கனடாவில் உள்ள புலிகளின் பினாமி அமைப்புகள் இவ் அகதிகளுக்காக ‘முந்திரிக் கொட்டை’யாக முந்திக் கொண்டு செயற்பட்டமை கனடிய புலனாய்வு பிரிவினரின் விசாரணை செயற்பாட்டிற்கும், பல தகவல்களை சேகரிப்பதற்கும் ஊற்று மூலமாக அமைந்திருந்தது என்று கனடிய வட்டாரங்கள் தெரிவிக்கின்றன.

ஆஸ்திரேலியா இலங்கை அகதிகளுக்கான கதவை இறுகப் பூட்டிய யுள்ளது. இந்நிலையில் கனடாவை தமது இலகு அகதிநிலைக் கோரிக்கைகளை நிறைவேற்ற உதவும் நாடாக கருதிய புலிகளின் வாரிசுகள் வெளிநாடு போவது என்ற ஆசையில் தூரக்கிழக்கு நாடுகளில் மாட்டுப்பட்டுக் கொண்டிருக்கும் இவர்களிடம் பெரும் பணத்தை கறந்தும், தமது சகாக்கள் சிலரையும் இவ் அகதிகள் கடத்தலுக்குள் கலந்தும் கனடா அனுப்பி வருவது இன்ரர்போல் போன்ற அமைப்புகளுக்கு நன்கு வெளிச்சமாகி விட்டது. இந் நிலையில் இனிவரும் காலங்களில் ஆட்கள் கடத்தும் இவ் முகவர்களின் செயற்பாடுகள் கடுமையான கண்காணிப்புக்குள் உள்ளாகலாம் என அரசியல் ஆய்வாளர்கள் கருத்து தெரிவிக்கின்றனர்.