'வோல் தெரு ஆக்கிரமிப்பு' போராட்டம் உலகம் பூராவும் பரவியது

ஐரோப்பா நகரங்களில் கலவரம், ஆசியா, ஆபிரிக்காவிலும் ஆர்ப்பாட்டம்

அமெரிக்காவின் நியூயோர்க் நகரில் நடந்து வரும் “வோல் தெரு ஆக்கிரமிப்பு இயக்க” போராட்டத்திற்கு ஆதரவு தெரிவிக்கும் வகையிலும், உலகப் பொருளாதாரம் சீர்கேடு அடைவதற்குக் காரணமான வங்கிகள், நிதி நிறுவனங்கள், அரசியல்வாதிகளைக் கண்டித்தும், போராட்டங்கள் உலகளவில் ஆரம்பிக்கப்பட்டுள்ளன. “வோல் தெரு ஆக்கிரமிப்பு இயக்கம்” கடந்த செப்டம்பர் 17ம் திகதி நியூயோர்க்கில் ஆரம்பித்த போராட்டம், தற்போது அமெரிக்காவின் நூற்றுக்கும் மேற்பட்ட நகரங்களில் நடந்து வருகிறது. இந்நிலையில், நியூயோர்க்கில், ஆர்ப்பாட்டக்காரர்கள் தங்கியுள்ள, தனியாருக்குச் சொந்தமான “ஜூகோட்டி பூங்காவில்” இருந்து ஆர்ப்பாட்டக்காரர்களை வெளியேற்றும் நோக்கில், அந்தப் பூங்காவைத் தூய்மைப்படுத்தப் போவதாக, பூங்கா உரிமையாளரான “ப்ரூக்பீல்ட் பிரொபர்ட்டீஸ்” நிறுவனம் அறிவித்தது.

தூய்மைப்படுத்திய பின் ஆர்ப்பாட்டக்கா ரர்கள் பூங்காவில் மீண்டும் தங்கலாம் எனவும் கூறியிருந்தது. ஆனால், இதன் மூலம் தங்கள் ஆர்ப்பாட்டத்தை நசுக்க நியூயோர்க் பொலிஸார் முயல்வதாகக் கருதிய ஆர்ப்பாட்டக்காரர்கள் இரண்டாயிரத்துக்கும் மேற்பட்டோர், பூங்காவில் நேற்று முன்தினம் திரண்டு, அங்கிருந்து செல்ல முடியாது என தெரிவித்தனர்.

இதன் பின், கடைசி நேரத்தில், தனியார் நிறுவனம் வெளியிட்ட அறிக்கையில், பூங்காவை தூய்மைப்படுத்தும் நடவடிக்கை தள்ளி வைக்கப்பட்டுள்ளதாக தெரிவிக்கப்பட்டுள்ளது. இந்நிலையில் “வோல் தெரு ஆக்கிரமிப்பு போராட்டம்” உலகளவில் பரவி வருகிறது.

தென்னாபிரிக்கா, தென் அமெரிக்கா, கனடா, ஐரோப்பா, ஆசியா, தெற்காசிய, ரஷ்யா என உலகம் முழுவதும் போராட்டங்கள் நேற்று முன்தினம் முதல் ஆரும்பமானது. இதற்காக விசேட இணையதளம் ஒன்றும் தயாரிக்கப்பட்டுள்ளது.

இதில் உலகம் முழுவதும் இந்தியா உள்ளிட்ட 82 நாடுகளில், 951 நகரங்களில் “வோல்தெரு ஆக்கிரமிப்பு” போராட்டம் நடக்கப் போவதாக அறிவிக்கப்பட்டுள்ளது.

முதற்கட்டமாக, அவுஸ்திரேலியாவின் சிட்னி, மெல்போர்ன் நகரங்களிலும், நியூசிலாந்தின் ஒக்லாண்ட், வெல்லிங்டன், கிறிஸ்ட்சர்ச் நகரங்களிலும், தாய்வான் தலைநகர் தாய்பெய்யிலும், ஜப்பானின் டோக்கியோ, ரோப்போங்கி நகரங்களிலும், தென்கொரியத் தலைநகர் சியோலிலும் நேற்று முன்தினம் போராட்டங்கள் நடந்தது.

அதேநேரம், ரோம், ஏதென்ஸ், மெட்ரிட் போன்ற நகரங்களிலும், தென்னாப்ரிக்காவின் டர்பன், கேப்டவுன், ஜொவூன்னஸ்பர்க் நகரங்களிலும், ஜெர்மனியின் பிராங்கபர்டிலும் நேற்று முன்தினம் போராட்டங்கள் நடந்தன. பிரிட்டன் தலைநகர் லண்டனில் நடந்த போராட்டத்தில் “விக்கிலீக்ஸ்” நிறுவனர் ஜூலியன் அசாஞ்ச் கலந்து கொண்டார். இத்தாலியின் ரோம் நகரில் நேற்று முன்தினம் நடந்த போராட்டத்தில் வன்முறை வெடித்தது. கார்கள் தீக்கிரையாக்கப்பட்டன. கடைகள் அடித்து நொறுக்கப்பட்டன.