வலுவான லோக்பால் மசோதாவை கொண்டு வந்தால் காங்கிரசுடன் இணைந்து செயல்பட தயார் - அன்னா ஹசாரே

பாராளுமன்ற குளிர்கால கூட்டத் தொடரில் வலுவான லோக்பால் மசோதாவை கொண்டு வந்தால், காங்கிரசுடன் இணைந்து செயல்பட தயாராக இருப்பதாக அன்னா ஹசாரே அறிவித்துள்ளார். சமூக சேவகர் அன்னா ஹசாரேவுக்கு பிரதமர் மன்மோகன்சிங் சமீபத்தில் ஒரு கடிதம் எழுதி இருந்தார். அதில், வலுவான லோக்பால் மசோதாவை கொண்டுவர உறுதி பூண்டிருப்பதாக கூறி இருந்தார்.

இந்நிலையில், மராட்டிய மாநிலத்தில் தனது சொந்த ஊரான ராலேகான் சித்தியில் அன்னா ஹசாரே நேற்று முன் தினம் காலவரையற்ற மெளன விரதத்தை தொடங்கினார். அதற்கு முன்பு ஒரு தனி யார் தொலைக்காட்சிக்கு அவர் பேட்டி அளித்தார். அப்போது அவர் கூறிய தாவது,

பிரதமர் எழுதிய கடிதத்தால், வலுவான லோக்பால் மசோதா கொண்டுவரப்படும் என்ற ஊக்கம், என்னுள் எழுந்துள்ளது. பாராளுமன்ற குளிர்கால கூட்டத் தொடரில், வலுவான லோக்பால் மசோதா கொண்டு வருவதுடன், தேர்தல் சீர்த்திருத்தம் தொடர்பான வாக்குறுதி களையும் நிறைவேற்றினால், நான் ஏன் காங்கிரசை எதிர்க்கப்போகிறேன்? இன்னும் சொல்லப் போனால், காங்கிரசுடன் இணைந்து செயல்படுவேன்.

அதே சமயத்தில், வலுவான லோக்பால் மசோதா கொண்டுவரப்படாவிட்டால், உத்தர பிரதேசம் உட்பட 5 மாநில சட்ட சபை தேர்தல்களில் காங்கிரசுக்கு எதிராக பிரசாரம் செய்வேன். எனது குழு காங் கிரசுக்கு எதிரானது என்பதோ, பா.ஜனதா மற்றும் ஆர்.எஸ்.எஸ். சின் கட்டளைப்படி தான் நான் காங்கிரசுக்கு எதிராக பிரசாரம் செய்தேன் என்பதோ தவறு.

நான் ஆர்.எஸ்.எஸ். தலைவரை நேரில் பார்த்தது கிடையாது. பேசியதும் கிடையாது. பா.ஜனதா மற்றும் ஆர்.எஸ்.எஸ். உடன் எனக்கு சம்பந்தம் இல்லை. காங்கிரஸ், பா.ஜனதா, ஆர்.எஸ்.எஸ். ஆகியவை கூட்டாக சதி செய்து எனது குழுவை களங்கப்படுத்தி வருகின்றன.

மேலும், ஆர்.எஸ்.எஸ். மூத்த தலைவர் ராம் மாதவை எனக்கு அடையாளம் தெரியாது. எனது உண்ணாவிரத மேடையில் பா.ஜனதா தலைவர் நிதின் கட்காரிக்கு நான் நன்றி சொல்லவில்லை. என் குழுவைச் சேர்ந்த வேறு யாராவது சொல்லி இருந்தால், அதுபற்றி எனக்கு தெரியாது.

என்னை ஜனாதிபதி தேர்தலுக்கு நிறுத்த பா.ஜனதா திட்டமிடுவதாக கூறுகிறார்கள். எனக்கு ஜனாதிபதி ஆவதற்கான திறமையோ, விருப்பமோ கிடையாது. ஒருவேளை, நான் ஜனாதிபதி ஆனால் கூட, இப்போது சமூகத்துக்கு செய்யும் வேலையைக் கூட, செய்ய முடியாமல் போய்விடும்.

காஷ்மீர் பற்றிய பிரசாந்த் பூஷணின் கருத்தில் எனக்கு உடன்பாடு இல்லை. நாட்டை கூறும்போடும் எந்த கருத்தையும் நான் ஆதரிக்க மாட்டேன். பிரசாந்த் பூஷண், எங்கள் குழுவில் நீடிக்கலாமா? என்பது பற்றி எங்கள் குழுவின் உயர்மட்டக் குழு ஆலோசனை செய்யும். அதன் பிறகு நான் முடிவு எடுப்பேன்.

அது போல், நான் பாராளுமன்றத்தை விட உயர்ந்தவன் என்று அரவிந்த் கெஜ்ரிவால் கூறியதையும் நான் ஏற்கவில்லை. பாராளுமன்றத்தை விட மக்கள்தான் உயர்ந்தவர்களே தவிர, நான் அல்ல.

இனிமேல் எல்லா பிரச்சினைகள் பற்றியும் கருத்து சொல்ல வேண்டாம் என்று எனது குழுவினடரிடம் சொல்லப்போகிறேன்.