உணவு விஷமானதில் 592 பேர் பாதிப்பு

தலவாக்கலையில் இரு அதிபர்கள் உட்பட ஐந்து பேர் கைது

உணவு விஷமானதால் பாடசாலை மாணவர்கள் 580 பேர் திடீர் சுகவீனமுற்ற சம்பவம் தொடர்பாக இரு அதிபர்கள் உட்பட 5 பேர் கைது செய்யப்பட்டு விசாரணைக்குட்படுத்தப்பட்டுள்ளதாக பொலிஸ் ஊடகப் பேச்சாளர் மெக்ஸி புரொக்டர் தெரிவித்தார். தலவாக்கலை கிரேட் வெஸ்டன் தமிழ் பாடசாலை மற்றும் தலவாக்கலை தமிழ் வித்தியாலயம் என்பவற்றில் நடைபெற்ற சிறுவர் தின வைபவங்களின் போது வழங்கப்பட்ட உணவு விஷமானதில் 580 மாணவர்களும் 12 பெரியவர்களும் நோய்வாய்ப்பட்டனர். இந்த சம்பவம் நேற்று முன்தினம் பிற்பகல் இடம்பெற்றது.

இந்த சம்பவம் குறித்து விசேட விசாரணை ஆரம்பிக்கப்பட்டுள்ளதோடு உணவு வாந்தி, மலம் என்பவற்றின் மாதிரிகள் பகுப்பாய்வுத் திணைக்களம் மற்றும் கொழும்பு மருத்துவ பரிசோதனை நிலையம் என்பவற்றுக்கு அனுப்பப்பட்டு ள்ளதாக மத்திய மாகாண சுகாதாரத் திணைக்களம் கூறியது.

தோட்டப் பகுதியொன்றில் இருந்தே உணவுப் பொருட்கள் தருவிக்கப்பட்டு ள்ளதோடு அவை அதிகாலை முதல் தயார் செய்யப்பட்டுள்ளதாக மாகாணப் பணிப்பாளர் சாந்தி சமரசிங்க கூறினார். பதிவு செய்யப்படாத உணவு விநியோக நிலையமொன்றில் இருந்தே உணவுப் பொதிகள் பெறப்பட்டுள்ளன. இவ்வாறு பெரிய வைபவமொன்றுக்கு உணவு விநியோகிக்கும் போது அது குறித்து சுகாதார மருத்துவ அதிகாரிக்கு முன்கூட்டி அறிவிக்க வேண்டும். ஆனால், அவ்வாறு எமக்கு யாரும் அறிவிக்கவில்லை. முன்கூட்டி எமக்கு அறிவித்திருந்தால் பொது சுகாதார பரிசோதகர் உணவு சமைக்கும் இடத்திற்குச் சென்று பரிசோதனை சய்திருப்பார் எனவும் மாகாண சுகாதாரப் பணிப்பாளர் தெரிவித்தார்.

இனிமேல் இவ்வாறு முன்அறிவித்தல் இன்றி வைபவங்கள் நடத்தினால் சட்ட நடவடிக்கை எடுக்கப்படும் எனவும் அவர் கூறினார். இந்த சம்பவம் தொடர்பில் கிரேட் வெஸ்டன் தமிழ் பாடசாலை, தலவாகலை தமிழ் பாடசாலை என்பவற்றின் அதிபர்கள், உணவு விநியோகித்த நபர், விழாவை ஏற்பாடு செய்த அரச சார்பற்ற நிறுவன உறுப்பினர்கள் இருவர் அடங்களான ஐவர் கைதாகியுள்ளனர். உணவு விஷமானதால் சுகவீனமுற்ற மாணவர்கள் நுவரெலியா, லிந்துல, கொட்டகல, திக்ஒயா, மஸ்கெலிய ஆஸ்பத்திரிகளில் அனுமதிக்கப்பட்டிருந்தனர். நேற்று பிற்பகலாகும் போது 33 பேர் மட்டுமே தங்கியிருந்தனர். ஏனையவர்கள் சிகிச்சை பெற்று வெளியேறியிருந்தனர்.