கடாபி மகன் சைப் அல் இஸ்லாம் சர்வதேச குற்றவியல் நீதிமன்றத்தில் சரணடைய தயார்

லிபிய முன்னாள் தலைவர் முஅம்மர் கடாபியின் மகன் சைப் அல் இஸ்லாம் சர்வதேச குற்றவியல் நீதிமன்றத்திடம் (ஐ.ஐ.சி) சரணடைய தயாராக இருப்பதாக லிபிய இடைக்கால அரசு அறிவித்துள்ளது. இதற்காக அவர் மூன்றாம் தரப்பிடம் தமது பாதுகாப்பு குறித்து உத்தரவாதம் கேட்டுள்ளதாகவும் இடைக்கால அரசு தெரிவித்துள்ளது. உளவுத் தகவல்களை மேற்கோள் காட்டியே இடைக்கால அரசு இந்த தகவலை வெளியிட்டுள்ளது. இதில் கடாபி அரசின் உளவுப் பிரிவு தலைவராக இருந்த அப்துல்லா அல் சனூசியும் சர்வதேச குற்றவியல் நீதிமன்றத்தில் சரணடைய தயாராக இருப்பதாக தகவல் வெளியாகியுள்ளது. எனினும் முஅம்மர் கடாபி அரசின் முக்கிய பிரமுகர்களான உளவுப் பிரிவு தலைவர் அப்துல்லா அல் சனூசி மற்றும் சைப் அல் இஸ்லாம் குறித்து உறுதியான தகவல்கள் எதுவும் இல்லை. இதில் 39 வயதான சைப் அல் இஸ்லாம் முஅம்மர் கடாபியின் வாரிசாக கருதப்பட்டவராவார். இவர்கள் இருவருக்கும் எதிராக சர்வதேச குற்றவியல் நீதிமன்றம் பிடியாணை பிறப்பித்திருந்தது.

இந்நிலையில் இருவரும் நெதர்லாந் தின் ஹேகோவிலுள்ள சர்வதேச குற்றவியல் நீதிமன்றத்தில் சரணடைய தயாராக இருப்பதாக கூறப்பட்டுள்ளது. எனினும் தமது உயிருக்கு உத்தரவாதம் அளிக்கும் வகையில் மூன்றாம் தரப்பின் உதவியை நாடியுள்ளனர். குறிப்பாக லிபியாவின் அண்டைய நாடுகளான நைகர் அல்லது அல்ஜீரியாவின் உதவியை கோரியுள்ளதாக உளவுத் தகவல்கள் மூலம் தமக்கு தகவல் கிடைத்ததாக லிபிய இடைக்கால அரசு கூறியுள்ளது. இதன் போது லிபியா நைகர் எல்லையில் உள்ள பாலைவன பகுதியில் சிக்கியுள்ள சைப் அல் இஸ்லாம் தாம் சர்வதேச குற்றவியல் நீதிமன்றத்தில் சரணடைய விசேட விமானம் ஒன்றையும் கோரியுள்ளதாக இடைக்கால அரசின் தகவல்கள் தெரிவிக்கின்றன.

தனது தந்தை முஅம்மர் கடாபி கொடூரமாக சுட்டுக்கொல்லப்பட்டது போன்ற சூழல் இடைக்கால அரசிடம் சரணடைந்தால் தமக்கும் நேரலாம் என்ற பயத்தினாலேயே சைப் அல் இஸ்லாம் இந்த முடிவுக்கு வந்துள்ளதாக தகவல்கள் தெரிவிக்கின்றன. எனினும் சைப் அல் இஸ்லாம் சரணடைவது குறித்து எந்த உத்தியோகபூர்வ அறிவிப்பும் கிடைக்கவில்லை என சர்வதேச குற்றவியல் நீதிமன்றம் குறிப்பிட்டுள்ளது. சைப் அல் இஸ்லாம் தொடர்ந்தும் தலைமறைவாகியே உள்ளார். அவர் எங்கே உள்ளார் என்பது குறித்து முரண்பட்ட தகவல்கள் வெளியா கியுள்ளன. சைப் அல் இஸ்லாம் ஒருசில தினங்களுக்கு முன்னர் அயல் நாடான நைகருக்கு தப்பிச் சென்றதாக ஒருதரப்பு செய்தி குறிப்பிடுகிறது.

எனினும் சைப் அல் இஸ்லாம் துர்கா இன போராளிகளுடன் லிபியாவின் பாலைவன பகுதியிலேயே தலைமறைவாகியுள்ளதாக கிளர்ச்சியாளர்கள் தெரிவித்துள்ளனர். அவர் நைகர், அல்ஜீரியா எல்லையை ஒட்டிய பாலைவன பகுதியில் தலைமறைவாகி இருக்கலாம் என நம்பப்படுகிறது. கடாபி அரசின் உளவுப் பிரிவு தலைவர் அப்துல்லா அல் சனூசி நைகருக்குள் தஞ்சம் புகுத்திருக்கலாம் என சந்தேகிக்கப்படுகிறது. இவர் துர்கா போராளிகளின் நிலப்பரப்பில் தலைமறைவாகி இருக்க வாய்ப்பு இருப்பதாக கூறப்படுகிறது. துர்கா ஆயுதக் குழு தனிநாடு கோரி மாலி மற்றும் நைகர் நாட்டுக்கு எதிராக போராடி வருகிறது. இந்த ஆயுதக் குழுவுக்கு கடாபி அரசு உதவியதாக கூறப்படுகிறது.