சிரிய பயணிகள் விமானத்தை யுத்த விமானம் மூலம் தரையிறக்கி துருக்கி சோதனை

சிரியாவின் பயணிகள் விமானத்தை துருக்கி யுத்த விமானத்தைக் கொண்டு வலுக்கட்டாயமாக தரையிறக்கி சோதனையிட்டுள்ளது இரு நாடுகளுக்கும் இடையிலான பதற்ற நிலையை மேலும் அதிகரித்துள்ளது. இந்த விமானத்தில் ஆயுதங்கள் கொண்டு செல்லப்படுவதாக வெளியான தகவலை அடுத்தே துருக்கி இந்த அதிரடி நடவடிக்கையை எடுத்துள்ளது. ரஷ்ய தலைநகர் மொஸ்கோவில் இருந்து சிரிய தலைநகர் டமஸ்கஸை நோக்கி நேற்று முன்தினம் பயணித்த ஏ. 320 ஏர்பஸ் பயணிகள் விமானம் துருக்கியின் இரு யுத்த விமானங்களால் இடைமறித்து துருக்கி தலைநகர் அங்காராவிலுள்ள எஸன்பொகா விமான நிலையத்தில் தரையிறக்கப்பட்டது. பின் துருக்கி நிர்வாகத்தினால் 8 மணிநேரத்திற்கு மேல் சோதனைக்குட்படுத்தப்பட்ட விமானம் மீண்டும் சிரியாவை நோக்கிச் செல்ல அனுமதிக்கப்பட்டது. 180 பயணிகளை கொண்டு செல்லும் இந்த விமானத்தில் 30 பயணிகளே இருந்துள்ளனர்.

எனினும் இந்த விமானத்தில் இருந்து சட்டவிரோதமான பொருட்கள் பறிமுதல் செய்யப்பட்டதாக துருக்கி நிர்வாகம் அறிவித்துள்ளது. இதில் இராணுவத் தகவல் தொடர்பு சாதனங்கள் பறிமுதல் செய்யப்பட்டதாக அங்கிருந்து வரும் செய்திகள் தெரிவிக்கின்றன. விமானத்தில் ஆயுதங்கள் கொண்டு செல்லப்படுவதாகக் கிடைத்த தகவலை அடுத்தே விமானம் இடைமறிக்கப் பட்டதாக குறிப்பிட்டுள்ள துருக்கி வெளியுறவு அமைச்சர் அஹ்மட் டவுடொக்லு, துருக்கியினூடாகச் செல்லும் சந்தேகத்திற்கு இடமான சிரிய விமானங்கள் தொடர்ந்தும் சோதனைக்கு உட்படுத்தப்படும் என எச்சரித்தார்.

துருக்கி வான்பரப்பினூடே சிரியா ஆயுத தளவாடங்கள் கொண்டு செல்வதற்கு துருக்கி கடந்த செப்டம்பரில் தடை விதித்தது. இதனடிப்படையிலேயே சிரிய விமானத்தை துருக்கி வலுக்கட்டா யமாக தரையிறக்கியுள்ளது. ஆனால் துருக்கியின் செயல் சர்வதேச சிவில் விமான ஒப்பந்தத்தை மீறுவதாக உள்ளது என்றும் அது ‘வான் உரிமையை மீறி இருப்ப தாகவும் சிரிய போக்குவரத்து அமைச்சர் மஹ்மூத் சயீட் லெபனானின் அல் மனார் தொலைக்காட்சிக்கு குறிப்பிட் டுள்ளார்.

இதனிடையே மேற்படி இடைமறிக்கப் பட்ட விமானம் வழமை போன்று விமான நிலையத்தில் இருந்து பறந்ததாகவும் எந்த சம்பவமும் இடம்பெறவில்லை என்று அந்த விமானம் பயணத்தை ஆரம்பித்த மொஸ்கோவின் வ்னுகோவா விமான நிலையத்தின் பேச்சாளர் யெலெனா கிரிலோவா குறிப்பிட்டுள்ளார். சிரிய பயணிகள் விமானம் வாரத்திற்கு ஒருமுறை மொஸ்கோவுக்கும் டமஸ்கஸக்கும் இடையில் பயணத்தை தொடர்ந்துவருவதாகவும் அவர் குறிப்பிட்டார்.

எனினும் தமது நாட்டிலிருந்து புறப்பட்ட விமானத்தை இடைமறித்தது குறித்து ரய்ஷா, துருக்கியிடம் விளக்கம் கோரியுள்ளது. இதில் அந்த விமானத்தில் இருந்த 17 ரஷ்ய பிரஜைகளுடன் தொடர்புகொள்ள தமது இராஜதந்திரிகளுக்கு துருக்கி நிர்வாகத் அனுமதி அளிக்கவில்லை என்று ரஷ்ய வெளியுறவு அமைச்சு குற்றம் சாட்டியுள்ளது.

இதுகுறித்து ரஷ்ய வெளியுறவு அமைச்சு வெளியிட்டுள்ள அறிக்கையில், “விமானத்தில் இருப்போரின் உயிர் மற்றும் பாதுகாப்பை அச்சுறுத்தலுக்கு உள்ளாக்கி ரஷ்ய நிர்வாகம் இவ்வாறு நடவடிக்கை எடுத்ததற்கான காரணம் குறித்து விளக்கம் கோரப்பட்டுள்ளது” எனக் குறிப்பிடப்பட்டுள்ளது.

இந்தச் சம்பவத்தை தொடர்ந்து ரஷ்ய ஜனாதிபதி விளாடிமிர் புடினின் துருக்கி பயணம் ஒத்திவைக்கப்பட்டுள்ளது. இந்த ஒத்திவைப்புக்கான எந்தக் காரணமும் விளக்கப்படாமல் இந்த அறிவிப்பை ஜனாதிபதியின் பேச்சாளர் வெளியிட்டார்.

ரஷ்ய ஜனாதிபதி விளாடிமிர் புடின் எதிர்வரும் ஒக்டோபர் 15ஆம் திகதி துருக்கி பயணமாக இருந்ததாக ஊடக தகவல்கள் குறிப்பிடுகின்றன.

இதனிடையே துருக்கி நிர்வாகம் தன்னை மோசமாக நடத்தியதாக விமானத்தில் இருந்த சிரிய விமான சேவை ஊழியர்கள் குறிப்பிட்டுள்ளனர். சிரிய விமான சேவை தலைவர் குறிப்பிட்டுள்ளார். ஆனால் பணியாளர்கள் துருக்கியில் எவ்வாறு நடத்தப்பட்டார்கள் என்பது குறித்து மேலதிக தகவல்கள் அளிக்கவில்லை.

சிரிய அரசு அந்நாட்டு மக்கள் மீது தாக்குதல் நடத்துவதாக சர்வதேச நாடுகள் தொடர்ந்து குற்றம் சாட்டிவரும் நிலையில் ரஷ்யா, சிரியாவுடன் தொடர்ந்தும் நெருங்கிய உறவை பேணிவருகிறது. சிரியாவுக்கு எதிரான பாதுகாப்புச் சபை தீர்மானங்களை ரஷ்யா பலமுறை தனது வீட்டோ அதிகாரத்தைக் கொண்டு ரத்துச் செய்தமை குறிப்பிடத்தக்கது.

மறுபுறத்தில் துருக்கிக்கும் சிரியா வுக்கும் இடையில் இரு நாட்டு எல்லைப் பகுதியில் கடந்த ஒரு வாரத்திற்கும் மேலாக பதற்றம் நீடித்து வருகின்றது. துருக்கி எல்லை யோர கிராமத்தில் சிரிய எறிகணைத் தாக்கு தலால் ஒரே குடும்பத்தில் 5 பேர் கொல்லப்பட்டதைத் தொடர்ந்து சிரியா மீது துருக்கி பீரங்கித் தாக்குதல்களை நடத்தி வருகின்றமை குறிப்பிடத்தக்கது.

இந்நிலையில் சிரிய வான்பரப்பு பாதுகாப்பற்றது என துருக்கி அரசு அந்நாட்டு விமானங்களுக்கு எச்சரிக்கை விடுத்துள்ளது.

எனவே துருக்கி விமானங்கள் சிரிய வான் பரப்பை தவிர்க்குமாறு கோரப்பட்டுள்ளது.

இந்நிலையில் துருக்கியில் இருந்து மின்சாரத்தை பெறுவதையும் சிரியா நிறுத்திக் கொண்டுள்ளதாக துருக்கி வலுசக்தி அமைச்சர் டனர் யில்டிஸ் குறிப்பிட்டுள்ளார்.