பிரபாகரன் தமிழ் மக்களின் பிரதிநிதி இல்லை என்று மறைமுகமாக கூறுகின்றார்  இரா.சம்பந்தன்.

குமரன் பத்மநாதன் சர்வதேச பொலிஸார் தேடிவரும் நபர்! அவர் தமிழ் மக்களின் பிரதிநிதி இல்லை! இப்படிக் கூறுபவர் வேறு யாரும் அல்ல இரா.சம்பந்தன். இவ்வளவு காலமும் தேசியத் தலைவர் என்று தலையில் தூக்கி வைத்துக் கொண்டாடிய பிரபாகரனும் சர்வதேச பொலிஸாரால் தேடப்பட்டுவந்த நபர் தான். பிரபாகரனும் இலங்கையிலும், இந்தியாவிலும் குற்றம் சாட்டப்பட்டிருந்தவர் தான். அப்படியென்றால் பிரபாகரனும் தமிழ் மக்களின் பிரதிநிதியாக இருந்ததில்லை என்று சொல்ல வருகிறாரா சம்பந்தன் ஐயா.

விடுதலைப்புலிகளின் முன்னாள் ஆயுதக் கொள்வனவாளரான கே.பி எனப்படும் குமரன் பத்மநாதன் தமிழ் மக்களின் பிரதிநிதி இல்லை. அவர் இலங்கையிலும் இந்தியாவிலும் குற்றஞ்சாட்டப்பட்டுள்ளவர். அவரை சர்வதேச பொலிஸார் தேடி வருகின்றனர். என தமிழ்த் தேசிய கூட்டமைப்பின் தலைவர் இரா. சம்பந்தன் தெரிவித்தார். இது தொடர்பாக தமிழ் தேசியக் கூட்டமைப்பின் நாடாளுமன்றக் குழுத் தலைவர் இரா.சம்பந்தன் மேலும் தெரிவிக்கையில், தேசிய பிரச்சினைக்கு நிரந்தர தீர்வு காண்பதற்கான பேச்சுவார்த்தையை தொடங்குவதற்காக அரசாங்கத்தின் சாதகமான சமிக்ஞையை எதிர்ப்பார்த்திருக்கிறேன்.

 விடுதலைப் புலிகளின் முன்னாள் ஆயுதக் கொள்வனவாளரான கே.பி எனப்படும் குமரன் பத்மநாதனின் அனுசரணையுடன் புலம்பெயந்தோருடன் அரசாங்கம் பேசவுள்ளதை அறிந்து தான் ஆச்சரியமடைகின்றேன். அவர் தமிழ் மக்களின் பிரதிநிதி இல்லை. அவர் இலங்கையிலும் இந்தியாவிலும் குற்றஞ்சாட்டப்பட்டுள்ளவர். அவரை சர்வதேச பொலிஸார் தேடி வருகின்றனர். அவருக்கு இதற்கான அதிகாரமோ தகுதியோ இல்லை. தமிழ் புலம்பெயர்ந்தோருடன் பேச இவரை ஒரு கருவியாக அரசாங்கம் பயன்படுத்துவதன் பின்னாலுள்ள நியாயம் எமக்கு விளங்கவில்லை.

 பேச்சுவார்த்தையை மீண்டும் தொடங்குவதற்கு தமிழ்த் தேசிய கூட்டமைப்பு ஏற்றுக்கொள்ளக்கூடிய ஒரு நிகழ்ச்சி நிரலை அரசாங்கம் முன்வைக்குமாயின், பேச்சுவார்த்தை மேசைக்கு கட்சி வரவும் நாடாளுமன்ற தெரிவுக்குழுவுக்கு அங்கத்தவர்களை நியமிக்கவும் தயாராக இருக்கின்றோம்.

 தமிழ்த் தேசிய கூட்டமைப்புடன் பேசவுள்ளதாக அரசாங்கம் கூறுவது சர்வதேச சமுதாயத்தை ஏமாற்றும் தந்திரம். நாம், அரசாங்கத்திடமிருந்து வெற்று வார்த்தைகளை எதிர்ப்பார்க்கவில்லை. பேச்சுவார்த்தையை தொடங்குவதற்கான நேர்மையான அணுகுமுறையையும் முழுமனதான ஈடுபாட்டையும் தான் நாம் எதிர்ப்பார்க்கின்றோம்.

 13 வது, திருத்தச் சட்டம் நீக்கப்பட வேண்டுமென பாதுகாப்பு செயலாளர் கோத்தபாய ராஜபக்சவும், ஜாதிக ஹெல உறுமயவும் கூறியுள்ளதை தமிழ்த் தேசிய கூட்டமைப்பின் தலைவர் கண்டித்துள்ளார். இது போன்ற பேச்சுக்கள் பிரச்சினையை மேலும் சிக்கலாக்கிவிடும் என்றார் இரா. சம்பந்தன்.

இந்தியப் பயணத்திற்கு முன்பு சம்மந்தர் வெளியிட்டுள்ள அறிக்கை ஒன்றில் 'இலங்கை – இந்திய ஒப்பந்தத்தின்படி கொண்டுவரப்பட்ட 13ஆவது சட்டத்திருத்தத்தை தமிழர் இனப்பிரச்சினைக்கான ஓர் அரசியல் தீர்வாக தாம் ஒருபோதும் ஏற்றுக்கொண்டதில்லை’ என்று புத்தி சாதுர்சியம் அற்ற அறிக்கை விட்டதை மறந்து விட்டா பேசுகின்றார் சம்மந்தர்.