பூமியதிர்ச்சி ஏற்படும் வலயத்தினுள் இலங்கை

பூமியதிர்ச்சி ஏற்படும் வலயத்துக்குள் இலங்கை உட்பட்டிருப்பதால், எதிர்காலத்தில் பாரிய பூமியதிர்ச்சிகள் ஏற்படுவதற்கான வாய்ப் புக்கள் இருப்பதாக அனர்த்த முகாமைத்துவ நிலையத்தின் பூமியதிர்ச்சியிலிருந்து பாது காக்கும் வகையில் கட்டடங்களை வடிவமைப்பது தொடர்பான உபகுழுவின் தலைவர் கே.எல்.எஸ். சஹபந்து தெரிவித்தார். பூமியில் இந்திய – அவுஸ்திரேலியத் தகடு இலங்கையிலிருந்து தென்மேற்கு பகுதியில் 500 முதல் 700 கிலோ மீற்றர் தூரம் வரை நகர்ந்துள்ளது. இதனால் இலங்கைக்கிடையில் புதிய பூமித்தகடு உருவாகியுள்ளது என்றும், இது எதிர்காலத்தில் இலங்கையில் பூமியதிர்ச்சிகள் ஏற்படுவதற்கான சாத்தியக்கூறுகளைத் தோற்றுவித்திரு ப்பதாகவும் அவர் குறிப்பிட்டார்.

அனர்த்த முகாமைத்துவ அமைச்சில் நேற்று முன்தினம் நடைபெற்ற செயலமர்வில் கருத்துத் தெரிவிக்கும்போதே அவர் இவ்வாறு கூறினார். அங்கு தொடர்ந்தும் உரையாற்றிய அவர், 1615 ஆம் ஆண்டு இலங்கையில் பாரிய பூமியதிர்ச்சி ஏற்பட்டது. இதில் ஆயிரக்கணக்கானவர்கள் உயிரிழந்தனர். அண்மைக் காலத்தில் இலங்கையில் பல சிறிய அதிர்வுகள் உணரப்பட்டன. இவற்றால் பாரிய சேதங்கள் ஏற்படாதபோதும், நிலநடுக்கங்களை உணர்ந்துள்ளோம்.

பூமிக்கடியில் ஏற்பட்டிருக்கும் மாற்றம் மற்றும் சனத்தொகையை வைத்துப்பார்க்கும்போது எதிர்காலத்தில் கொழும்பு போன்ற நகரப்பகுதிகளில் ஏற்படக்கூடிய பூமியதிர்ச்சி கூடுதலான சேதங்களை ஏற்படுத்தும் வாய்ப்புக்கள் உள்ளன. எனவே, பூமியதிர்ச்சியிலிருந்து பாதுகாக்கக்கூடிய வகையில் கட்டடங்களை வடிவமைக்கவேண்டிய தேவை ஏற்பட்டுள்ளது. பூமியதிர்ச்சி ஏற்படுவதைத் தடுக்கமுடியாது.

இது இயற்கையானது. எனினும், அதனால் ஏற்படக்கூடிய சேதங்களை எம்மால் குறைக்க முடியும். கடந்த தசாப்தத்தில் அரச மற்றும் அரசசார்பற்ற அமைப்புக்கள் கவனம் செலுத்தின. தற்போது இவ்விடயத்தில் அனர்த்தமுகாமைத்துவ அமைச்சு கூடுதல் கவனம் செலுத்தியுள்ளது. எதிர்காலத்தில் பூமியதிர்ச்சி ஏற்படும்போது நாட்டின் பல்வேறு பகுதிகளில் ஏற்படக்கூடிய மாற்றங்கள் குறித்து ஆராய்வதற்கு நாம் நடவடிக்கை எடுத்துள்ளோம்.

பூமியதிர்ச்சியால் வெவ்வேறு இடங்களில் ஏற்படக்கூடிய பாதிப்புக்கள் குறித்தும் ஆராயவுள்ளோம். அதேநேரம், உபகுழுவானது பூமியதிர்ச்சியிலிருந்து பாதுகாக்கக் கூடிய வகையிலான கட்டட வடிவமைப்பு மற்றும் அது தொடர்பான வழிகாட்டல்கள் குறித்து கவனம் செலுத்தும். விஞ்ஞான ரீதியான சாட்சியங்களை வைத்து பூமியதிர்ச்சி பாதுகாப்பை திட்டமிட்டால், பூமியதிர்ச்சி தொடர்பான தேசிய கொள்கையொன்றை நாம் தயாரிக்க முடியும் என்றும் அவர் மேலும் தெரிவித்தார்.

பூமியதிர்ச்சியிலிருந்து பாதுகாக்கக்கூடிய வகையிலான கட்டங்கள் அமைப்பது, பாதிப்புக்கள் குறித்த பரிந்துரையொன்றையும் இந்த உபகுழு தயாரிக்கும் என்றும் கூறினார்.