மியன்மாரில் தொடரும் கலவரம்

22,000 க்கும் மேற்பட்டோர் இடம்பெயர்வு: 4000 க்கும் அதிகமான வீடுகள் தரைமட்டம்

மியன்மாரில் மீண்டும் ஏற்பட்டுள்ள இனக் கலவரத்தில் 22,000 க்கும் மேற்பட்டோர் இடம்பெயர்ந்துள்ளதோடு 4000 க்கும் அதிகமான வீடுகள் தீக்கிரையாகியுள்ளதாக ஐ.நா. அறிக்கை கூறியுள்ளது. இந்த புதிய கலவரத்தில் நூற்றுக்கும் மேற்பட்டோர் கொல்லப்பட்டுள்ளமை குறிப்பிடத்தக்கது. ‘எமக்கு கிடைத்த புதிய தரவுகளின்படி 22,587 பேர் இடம்பெயர்ந்துள்ளனர். அதேபோன்று 4,665 வீடுகள் தரைமட்டமாகியுள்ளன. மியன்மார் அரசு ஐ.நாவுக்கு வழங்கிய தரவில் இது குறிப்பிடப்பட்டுள்ளது’ என்று யான்கோனுக்கான ஐ.நா. தூதுவர் அஷோக் நிகம் ஏ. எப். பி. செய்திச் சேவைக்கு இந்த தகவலை அளித்துள்ளார். இதில் வீடுகளை இழந்து இடம்பெயர்ந்தோரில் 21,700 பேர் முஸ்லிம்களாவர் என அவர் குறிப்பிட்டார்.

கடந்த ஜூனில் ஏற்பட்ட இனக் கலவரத்தை தொடர்ந்து மேற்கு மியன்மாரில் ரகினே பெளத்தர்களுக்கும் பங்காளி மொழி பேசும் ரொஹிங்கியா முஸ்லிம்களுக்கும் இடையிலான பதற்ற நிலை நீடித்து வருகிறது. எற்கனவே ரகினெ தலைநகர் சித்வாவிலுள்ள தற்காலிக முகாம்களில் ஆயிரக்கணக்கானோர் வசித்து வருகின்றனர்.

இந்நிலையில் தற்போது நிலைமை கட்டுப்பாட்டுக்குள் வந்திருப்பதாக ரகினெ மாநில அரச பேச்சாளர் வின் மியங் கடந்த சனிக்கிழமை தெரிவித்திருந்தார். பாதிக்கப்பட்ட பகுதிகளில் பாதுகாப்பு படையினர் நிறுத்தப்பட்டிருப்பதாகவும் அவர் குறிப்பிட்டார். இரு தரப்புக்கும் இடையிலான புதிய கலவரம் கடந்த 21 ஆம் திகதி தொடக்கம் நீடித்து வருகிறது. தற்போதைய கலவரத்தில் 112 பேருக்கும் மேல் கொல்லப்பட்டிருப்பதாக மியன்மார் அரசு கூறியிருந்தது.

செய்மதி படம் அம்பலம்

இதனிடையே மியன்மாரில் இருக்கும் ரொஹிங்கியா முஸ்லிம்களின் பாதுகாப்பு குறித்து மனித உரிமை அமைப்புக்கள் எச்சரிக்கை விடுத்துள்ளது. கலவரம் இடம்பெற்ற ஒருசில பகுதிகள் எரிந்து சாம்பலாகியுள்ள செய்மதி படங்கள் வெளியானதைத் தொடர்ந்தே மனித உரிமை அமைப்புகள் இந்த எச்சரிக்கையை விடுத்துள்ளது.

நியூயோர்க்கை மையமாக கொண்டு செயற்படும் மனித உரிமை கண்காணிப்பகம் வெளியிட்டுள்ள செய்மதி படத்தின் மூலம் கலவரத்தால் மியன்மாரின் பல பகுதிகளும் தரைமட்டமாகியுள்ளது அம்பலமானது. இதில் ரகினெ மாநிலத்தில் ரொஹிங்கியா முஸ்லிம்கள் பெரும்பான் மையாக வசிக்கும் கியவ்பியு பகுதி முற்றாக தரைமட்டமாக்கப்பட்டுள்ளது. இதுதவிர மோதல்கள் இடம்பெற்ற பல பகுதிகளிலும் கட்டடங்கள் எரிந்து சம்பலாகியுள்ளது அந்த செய்மதி படத்தின் மூலம் தெரியவந்துள்ளது.

கியவ்பியு பகுதியில் 811 க்கும் மேற்பட்ட படகு வீடுகள், கட்டடங்கள் சேதமடைந்துள்ளன. கடந்த 24 ஆம் திகதி இடம்பெற்ற மோதல்களிலேயே இந்த பகுதி தரைமட்டமாகியுள்ளது

இதனைத் தொடர்ந்து அங்கு வசித்துவந்த ரொஹிங்கிக்கள் கடல் மார்க்கமாக மாநில தலைநகர் சித்வெக்கு இடம்பெயர்ந் துள்ளனர் என்று மனித உரிமை கண்காணிப்பகம் குறிப்பிட்டுள்ளது.

இதுதவிர ரொஹிங்கிக்கள் வசிக்கும் அரகான் பகுதியில் பாதுகாப்பை பலப்படுத்த அரசு நடவடிக்கை எடுக்க வேண்டும் என மனித உரிமை கண்காணிப்பகத்தின் ஆசிய பிரிவுக்கான துணை இயக்குனர் பிலிப் ரொபட்சன் வலியுறுத்தியுள்ளார்.

மியன்மார் அரச தொலைக்காட்சி வெளியிட்ட செய்தியில் கடந்த 21 மற்றும் 25 ஆம் திகதிகளில் ஏற்பட்ட வன்முறைகளால் 2,818 வீடுகள் தரைமட்டமாக்கப்பட்டிருப்பதாக கூறியுள்ளது. இந்த வன்முறைகளால் நாட்டில் ஜனநாயகத்தை கொண்டுவரும் மியன்மாரின் முயற்சிக்கு பாதிப்பு ஏற்பட்டிருப்பதாக ஐ. நா. கூறியுள்ளது. ‘சமூக ஒழுங்கு பாதிக்கப்பட்டிருப்பதோடு அரசின் ஜனநாயகத்தை கொண்டுவரும் செயற்பாடுகள் இக்கட்டுக்குள்ளாகியுள்ளது’ என்று ஐ. நா. செயலாளர் நாயகம் பான் கீ மூன் வெள்ளிக்கிழமை வெளியிட்ட அறிக்கையில் கூறியுள்ளார்.

எனினும் மியன்மாரில் தற்போது ஏற்பட்டுள்ள இனக்கலவரத்திற்கான காரணம் குறித்து தெளிவில்லை என சர்வதேச ஊடகங்கள் தெரிவித்துள்ளன.

கடந்த ஜூன் மாதம் ஏற்பட்ட இனக்கலவரத்தில் 90 பேர் கொல்லப்பட்டதோடு 3000 வீடுகள் முற்றாக சேதமாக்கப்பட்டன. பெளத்த பெண் ஒருவரை கற்பழித்து கொன்றதாக மூன்று முஸ்லிம்கள் மீது குற்றம் சாட்டப்பட்டது.

இதனையடுத்தே கலவரம் மூண்டது. இதனால் இன்றும் 75,000 க்கும் மேற்பட்டோர் தற்காலிக முகாம்களிலேயே வசித்து வருகின்றனர்.

எனினும் இரு இனக் குழுக்களுக்கும் இடையிலான பதற்ற நிலையை தணிக்க அரசு எந்த முன்னெடுப்பையும் மேற்கொள்ள வில்லை என குற்றச்சாட்டுகள் எழுந்து ள்ளன.

இதனிடையே தற்போதைய கலவரங்கள் காரணமாக மியன்மாரின் இஸ்லாமிய அமைப்புகள் அனைத்தும் பெருநாள் கொண்டாட்டங்களை ரத்துச் செய்துள்ளமை குறிப்பிடத்தக்கது.

மியன்மாரில் வசித்துவரும் ஆயிரக் கணக்கான ரொஹிங்கிய முஸ்லிம்கள் சட்டவிரோத குடியேற்றவாசிகளாகவே அந்நாட்டு அரசு கருதி வருகிறது. இவர்கள் பங்களாதேஷிலிருந்து சட்டவிரோதமாக குடியேறியவர்கள் என மியன்மார் அரசு கூறுகிறது.

இந்நிலையில் மியன்மாரில் ஏற்பட் டுள்ள இனக் கலவரம் நாட்டின் பல பகுதிகளுக்கும் பரவும் அபாயம் இருப்பதாக அங்கிருக்கும் பி. பி. சி. செய்தியாளர் கூறியுள்ளார். எனினும் இந்த கலவரத்தை ஒட்டி பங்களாதேஷ் தமது எல்லைப் பகுதியில் பாதுகாப்பை பலப்படுத்தியுள்ளது.

மியன்மாரில் இருந்து தப்பிவரும் ரொஹிங்கியா முஸ்லிம்களை தடுத்துநிறுத்தும் முயற்சியில் பங்களாதேஷ் பாதுகாப்பு படையினர் ஈடுபட்டுள்ளனர். பங்களாதேஷின் இந்த செயலுக்கு ஐ. நா. ஏற்கனவே கண்டனம் வெளியிட் டிருந்தது.

இந்நிலையில் மியன்மார் ஆற்றினூடாக கடந்த ஒரு சில தினங்களில் பங்களா தேஷக்குள் ஊடுருவ முயன்ற ரொஹிங்கிய முஸ்லிம்களை ஏற்றிவந்த 52 படகுகளை பங்களாதேஷ் எல்லைப் பாதுகாப்பு படையினர் திருப்பி அனுப்பியிருப்பதாக அந்நாட்டு அதிகாரிகள் கூறியுள்ளனர்.