கூட்டமைப்புக்குள் இன்னும் இழுபறி நிலை

சிவாஜிலிங்கம், இரு புளொட் உறுப்பினர்கள் ஜே.பி. முன்னிலையில் சத்தியப்பிரமாணம், சுரேஷ் அணியினர் இன்னும் முடிவு செய்யவில்லை

தமிழ்த் தேசியக் கூட்டமை ப்பின் வட மாகாண சபை உறுப்பி னர்கள் 9 பேரினது சத்தியப் பிரமாணம் தொடர்பில் கூட்டமை ப்பின் கட்சிகளிடையே நிலையான முடிவொன்று எட்டப்படாத நிலையில் நேற்று மேலும் மூன்று பேர் சத்தியப் பிரமாணம் செய்து கொண்டுள்ளனர். எம். கே. சிவாஜிலிங்கம் முள்ளிவாய்க் காலில் சமாதான நீதவான் ஒருவர் முன்னி லையிலும் புளொட் உறுப்பினர்களான தர்மலிங்கம் சித்தார்த்தன் மற்றும் ஜி. ரி. லிங்கநாதன் ஆகியோர் யாழ். கந்தரோடையில் அக்கட்சியின் செயலாளர் சமாதான நீதவான் சு. சதானந்தம் முன்னிலையிலும் நேற்று சத்தியப்பிரமாணம் செய்து கொண்டுள்ளனர். சுரேஷ் அணியினர் இன்னும் சத்தியப் பிரமாணம் எடுக்கவில்லை.

வட மாகாண சபைக்கு தமிழ்த் தேசியக் கூட்டமைப்பின் சார்பில் மேலும் 9 பேர் சத்தியப் பிரமாணம் செய்யவிருந்த நிலையில் நேற்றைய தினம் அவர்கள் சத்தியப்பிரமாணம் எடுத்துக் கொள்வதாக ஏற்கனவே அறிவிக்கப்பட்டிருந்தது. நேற்று அந்த நிகழ்வு நடைபெறாத நிலையில் மாகாண சபை உறுப்பினர் எம்.கே. சிவாஜிலிங்கம் நேற்று தனியே முள்ளிவாய்க்காலில் சமாதான நீதவான் ஒருவரின் முன்னிலையில் சத்தியப்பிரமாணம் எடுத்துக்கொண்டுள்ளார்.

தமது கட்சி ஆதரவாளர்களுடன் நேற்று முல்லைத்தீவுக்குச் சென்ற சிவாஜிலிங்கம் முள்ளிவாய்க்காலில் சேதமடைந்த நிலையிலுள்ள மண்டபம் ஒன்றுக்கு முன்பாக ஜே. பி. ஒருவரின் முன்னிலையில் காலை 10.30 மணிக்கு சத்தியப்பிரமாணம் செய்து கொண்டுள்ளார். வல்வெட்டித்துறை யிலுள்ள மாவட்ட வைத்திய அதிகாரி வைத்திய கலாநிதி கே. மயிலேறு பெருமாள் சமாதான நீதவானின் முன்னிலையிலேயே சிவாஜிலிங்கம் சத்தியப் பிராணம் செய்து கொண்டுள்ளார்.

‘வட மாகாண சபை அமைச்சு நியமனம் தொடர்பில் தமிழரசுக்கட்சி மேற்கொண்ட தன்னிச்சையான தீர்மானங்களை எதிர்க்கும் வகையிலேயே முதலமைச்சர் சி. வி. விக்னேஸ்வரன் முன்னிலையில் நான் சத்தியப் பிரமாணம் எடுக்கவில்லை. மக்கள் எனக்கு வழங்கிய ஆணையை மதித்தே நான் முள்ளிவாய்க்காலில் சத்தியப் பிரமாணம் செய்து கொண்டேன். வட மாகாண சபையை நான் எதிர்க்கவில்லை” எனவும் அவர் இதன்போது தெரிவித்துள்ளார்.

வடமாகாண சபைக்கு தமிழத் தேசியக் கூட்டமைப்பின் சார்பில் போட்டியிட்டு வெற்றியீட்டிய உறுப்பினர்கள் கடந்த வெள்ளிக்கிழமை யாழ்ப்பாணத்தில் முதலமைச்சர் சி. வி. விக்னேஸ்வரன் தலைமையில் சத்தியப் பிரமாணம் செய்து கொண்டனர். இதன்போது ஒன்பது உறுப்பினர்கள் அதனைப் புறக்கணித்ததுடன் அவர்கள் நேற்றைய தினம் முள்ளிவாய்க்காலில் சத்தியப் பிரமாணம் செய்து கொள்ளப் போவதாக தகவல்கள் வெளிவந்தன.

இதனையடுத்து மன்னார் மறைமாவட்ட ஆயர் இராயப்பு ஜோசப் ஆண்டகையின் தலையீட்டையடுத்து நேற்றைய சத்தியப் பிரமாண நிகழ்வு நிறுத்தப்பட்டு பிறிதொரு தினத்தில் இவர்கள் சத்தியப்பிரமாணம் செய்து கொள்ளப்போவதாக தெரிவிக்கப்பட்டது. இதற்கிடையிலேயே நேற்று மூன்று உறுப்பினர்கள் சத்தியப் பிரமாணம் செய்து கொண்டுள்ளனர்.

நேற்யை தினமும் சத்தியப் பிரமாணம் சம்பந்தமாக கருத்துத் தேரிவித்த தமிழ்த் தேசியக் கூட்டமைப்பில் அங்கம் வகிக்கும் கட்சிகள் ஏகமனதான ஒரு முடிவை தெரிவிக்கவில்லை. சிலர் இது ஒரு முக்கிய விடயமே அல்ல எனவும் முதலமைச்சர் முன்னிலையில்தான் சத்தியப் பிரமாணம் எடுப்பதென்பதில்லை, யாராவது ஒரு சமாதான நீதவான் முன்னிலையில் அவ்வாறு சத்தியப்பிரமாணம் எடுக்கலாம். எதிர்வரும் 25ம் திகதிவரை அதற்கான கால அவகாசமும் உள்ளது எனவும் தெரிவித்தனர்.

சுரேஷ் பிரேமச்சந்திரன் எம். பி. இது பற்றிச் கூறுகையில்:- “சத்தியப் பிரமாணம் எடுப்பதென்பது ஒரு பெரிய வேலையல்ல. அது ஒரு பெரிய ‘இசூ’ வுமல்ல. ஊடகங்கள் இதனை பெரிதுபடுத்தவும் தேவையில்லை. எமது உறுப்பினர்கள் யாராவது ஒரு ஜே. பி. முன்னிலையில் சத்தியப்பிரமாணம் எடுப்பார்கள். இது அலட்டிக்கொள்ள வேண்டிய விடயமொன்றல்ல” எனவும் தெரிவித்தார்.

செல்வம் அடைக்கலநாதன் எம்.பி. இதுபற்றி தெரிவிக்கையில்: “நேற்று நடைபெறவிருந்த சத்தியப்பிரமாணம் நிகழ்வு ஒத்திப்போடப்பட்டுள்ளது என அறிந்தேன். ஏனைய விபரங்களை அந்தந்த கட்சிகளிடமே கேட்டுத் தெரிந்து கொள்ள வேண்டும்” என இரண்டு வார்த்தையில் முடித்துக் கொண்டார்.

எது எவ்வாறாயினும் சத்தியப் பிரமானம் செய்வதில் எங்கு? யார் முன்னிலையில்? எப்போது, எடுத்துக் கொள்வது என்பதில் கூட்டமைப்பிலுள்ள கட்சிகளிடையே ஏகமனதான தீர்மானமொன்றில்லை என்பது மட்டும் தெளிவாகிறது.