நீதித்துறையை அச்சுறுத்தும் அ.தி.மு.க... 7 நாளுக்கு பிறகு வாய் திறந்த தி.மு.க.!

பெங்களுரு தனி நீதிமன்றத்தில் ஜெயலலிதாவுக்கு தண்டனை விதித்து சிறையில் அடைத்ததில் இருந்து கடந்த 7 நாட்களாக தமிழகம் முழுவதும் போராட்டங்கள் நடந்து வருகிறன. அரசு பஸ்கள் தீ வைத்து கொளுத்தப்பட்டது மட்டுமில்லாமல் கடையடைப்பு, உண்ணாவிரதங்கள் என்று பல்வேறு வகைகளில் போராட்டங்கள் நடக்கின்றன. ‘சட்டம் ஒழுங்கை நிலைநாட்ட உரிய நடவடிக்கை எடுக்கவேண்டும்’ என்று தீர்ப்பு வந்த அடுத்த நாளே, தே.மு.தி.க தலைவர் விஜயகாந்த் கவர்னர் ரோசய்யாவிடம் புகார் கொடுத்தார். ‘பொதுச்சொத்துகள் நாசமாக்கப்பட்டதற்கு அ.தி.மு.க.-விடம் இருந்து ரூ.500 கோடி நஷ்டஈடு பெற வேண்டும்’ என்று பா.ம.க நிறுவனர் டாக்டர் ராமதாஸ் வலியுறுத்தியுள்ளார். பிஜேபி, காங்கிரஸ், ம.தி.மு.க, கம்யூனிஸ்ட்டுகள் என்று அரசியல் கட்சிகள், தீர்ப்பு குறித்து தங்கள் கருத்துகளை வெளியிட்டுள்ளனர். பெரும்பாலான தமிழக தலைவர்கள் பெங்களுரு தீர்ப்பை தீர்ப்பாகத்தான் பார்க்க வேண்டும்; அரசியலாக்க வேண்டாம் என்று கூறியுள்ளனர். ஆனால், எதற்கெடுத்தாலும் முந்திக் கொண்டு கருத்து சொல்லும் திமுக தலைவர் கருணாநிதியிடம் இருந்து 7 நாட்கள் ஆகியும்,  பெங்களுர் தீர்ப்பு குறித்து எந்த அறிக்கையும் வெளிவரவில்லை.  

இதற்கிடையே ஜெயலலிதாவின் ஜாமின் மனு வரும் 7 ஆம் தேதி செவ்வாய்கிழமை விசாரணைக்கு வரும் நிலையில், அ.தி.மு.க- வினர் தொடர் போராட்டங்களை தமிழகம் முழுவதும் தீவிரப்படுத்தி வருகின்றனர். நாளை, (4.10.14) சென்னையில் எம்.ஜி.ஆர் சமாதி அருகே அ.தி.மு.க சட்டமன்ற உறுப்பினர்கள் காலை 8 மணி முதல் மாலை 5 மணி வரை தொடர் உண்ணாவிரத போராட்டத்தில் ஈடுபடுகின்றனர்.

தி.மு.க திடீர் புகார் மனு

இந்நிலையில் தீர்ப்பு வந்து 7 நாள் கழித்து தி.மு.க வாய் திறந்துள்ளது. தமிழக கவர்னர் ரோசய்யாவிடம் அக்கட்சியின் அமைப்புச் செயலாளர் ஆர்.எஸ்.பாரதி இன்று புகார் மனு கொடுத்தார். அவரோடு முன்னாள் சென்னை மேயர் மா.சுப்பிரமணியன், சென்னை மாநகராட்சி எதிர்கட்சி கவுன்சிலர் சந்திரபோஸ் ஆகியோர் உடன் சென்றனர். புகார் மனு குறித்து ஆர்.எஸ்.பாரதி கூறியதாவது:

முன்னாள் முதல்வர் ஜெயலலிதாவுக்கு எதிரான சொத்துக் குவிப்பு வழக்கில் பெங்களூரு தனி நீதிமன்றம் தீர்ப்பு அளித்ததிலிருந்து ஆளும் அ.தி.மு.க அமைச்சர்கள், மாவட்ட, வட்ட அளவிலான நிர்வாகிகள் மற்றும் அக்கட்சியினர் நீதிமன்றத்தின் அத்தீர்ப்புக்கு எதிராக பேருந்துகளைக் கொளுத்துவது, தி.மு.க அலுவலகங்கள், தலைவர்கள், தொண்டர்கள் மற்றும் அவர்களது உடைமைகள் மீது தாக்குவது போன்ற பல்வேறு சட்ட விரோதமான போராட்டங்களில் ஈடுபட்டு வருகின்றனர்.

இவையனைத்தும் தொலைக்காட்சி மற்றும் பத்திரிகைச் செய்திகளாகக் காட்டப்பட்டுள்ளன. இன்று வரை அவைதொடர்கின்றன. இத்தகைய சட்டவிரோத வன்முறைத் தாக்குதல்களில் அ.தி.மு.க.வினர் ஈடுபட்டிருப்பதால் அரசு நிர்வாகம் வாளாவிருக்கிறது. தமிழ்நாடு முழுவதும் சட்டம் ஒழுங்கு இல்லை; அமைதியும் பொது ஒழுங்கும் பாதிக்கப்பட்டுள்ளது. இந்தக் கொடுமைகளைக் கட்டுப்படுத்தவோ தடுக்கவோ எந்த அரசு அதிகாரியும் நிர்வாகமும் தங்களது அதிகாரத்தைப் பயன்படுத்தவில்லை. ஆளுங்கட்சி நிர்வாகிகளால் கட்டவிழ்த்துவிடப்படும் மேற்கூறிய குற்றங்களை சட்டத்தை அமல்படுத்தவேண்டிய நிர்வாகத்தினர் வேண்டுமென்றே கண்டுகொள்ளாமல் உள்ளனர். சட்டத்தின்படி உரிய உயரதிகாரி களிடம் பெற வேண்டிய முன்அனுமதியினைப் பெறாமலேயே போராட்டங்கள் நடைபெற்று வருகின்றன.

அவர்கள், பொதுச் சொத்துகளுக்கும் கடுமையான சேதங்களை ஏற்படுத்தி வருகின்றனர். இதற்கு அ.தி.மு.க.வே பொறுப்பாவதுடன், சட்டபடி நடவடிக்கை எடுக்கப்படவும் வேண்டும். சேதங்களுக்கு அ.தி.மு.க.விடமிருந்து வசூலிக்கப்படவேண்டும். மேற்கூறிய சூழ்நிலையில், அவர்கள் தேர்ந்தெடுக்கப்பட்ட உள்ளாட்சி அமைப்புகள் மூலமாகவும் தங்களது அக்கிரமங்களை அரங்கேற்றும் அளவுக்குச் சென்றுவிட்டனர். அவதூறான வார்த்தைகளில் நீதிபதியை விமர்சித்தும், நீதிபதிக்கும் நீதிமன்றம் அளித்த தீர்ப்புக்கும் எதிராக உள்நோக்கம் கற்பித்தும் உள்ளாட்சி அமைப்புகள் தீர்மானங்களை நிறைவேற்றுகின்றன.

இந்திய அரசியல் சட்டத்தின் 73 ஆவது திருத்தம் உள்ளாட்சி அமைப்புகளுக்கு ‘குட்டி குடியரசுகள்’ என்ற அந்தஸ்து அளித்து அவை அரசியல் சட்ட அந்தஸ்து பெற்றுள்ளதால் இது அரசியல் சட்டத்தின் மீதான தாக்குதலேயன்றி வேறேதுமில்லை. அவைகள் அரசியல் சட்டத்தின் உணர்வுக்கு எதிராக, அதாவது மற்றொரு அரசியல் சட்ட அமைப்பான நீதித் துறைக்கு எதிராகச் செயல்படக்கூடாது.

ஆளும் அ.தி.மு.க-வின் கட்டுப்பாட்டிலுள்ள இதர உள்ளாட்சி அமைப்புகளும் இத்தகைய பல சம்பவங்களுக்கு முயன்றுவருவதால் தாங்கள் உடனடியாக நடவடிக்கை எடுத்து  இத்தகைய அத்துமீறல்களைத் தடுத்துநிறுத்தாவிட்டால் அவை நிச்சயமாகத் தொடரும்.

மேற்கூறிய சம்பவங்கள் அனைத்தும் தொலைக்காட்சிகளிலும் பத்திரிகைகளிலும் காட்டப்படுகின்றன. இவை அவர்களது தலை வரை ஆதரிக்கவும் நீதித்துறையைக் களங்கப் படுத்தவும் ஆளும் அ.தி.மு.க அதிகார துஷ்பிர யோகம் செய்வதைக் காட்டுகின்றன. நீதிபதிக்கு உள்நோக்கம் கற்பிப்பதும், நீதித்துறையை அவ தூறாக விமர்சிப்பதும் நீதித்துறை மீதான தாக்கு தலாகவும், நீதித்துறையின் சுதந்திரத்துக்கு அச்சுறுத்தலாகவும் உள்ளதால் அரசு நிர்வாகத் தலைவரால் கண்டிக்கப்படவேண்டும்.

ஆளுங்கட்சியே இப்படி தெரிந்தே வேண்டுமென்றே நீதித்துறைக்கு இப்படி சேதத்தை ஏற்படுத்திவரும்போது, இந்திய அரசியல் சட்டத்தின் பாதுகாவலர் என்ற முறையில் தாங்கள், சட்டப்படி செயல்படுமாறு அரசுக்குக் குறிப்பாக உத்தரவிட்டும், அ.தி.மு.க கட்சியினர், நிர்வாகிகள் மற்றும் அவர்களது ஆதரவாளர்கள், சட்டம் மற்றும் விதிகளை மீறுபவர்கள் ஆகியோர் மீது உரிய நடவடிக்கைகளை எடுக்கும்படி ஆணையிட்டும் தமிழ்நாட்டில் சட்டத்தின் ஆட்சியை நிலைநாட்ட உடனடியாக, உரிய, தேவையான நடவடிக்கைகளை எடுக்கும்படி கேட்டுக்கொள்கிறோம்’’ என்று ஆர்.எஸ்.பாரதி தெரிவித்துள்ளார்.

என்ன செய்யப்போகிறார் கவர்னர்?

-எஸ்.முத்துகிருஷ்ணன்