மியன்மார் இராணுவ ஆட்சியுடன் இந்தியாவின் நல்லுறவு

தொண்ணூறுகளில் மியன்மார் ஜனநாயக இயக்கத்தினதும் அந்த இயக்கத்தின் தலைவியான ஆங் சான் சூ கீயினதும் வலுவான ஆதரவாளராக இந்தியா விளங்கியது. இந்தியாவின் அதிஉயர் சிவிலியன் விருதான ஜயஹர்லால் நேரு விருது 1993ம் ஆண்டு ஆங் சான் சூ கீக்கு வழங்கப்பட்டதை இங்கு குறிப்பிடலாம். இப்போது காட்சி மாறுகின்றது. மியன்மார் ஜனநாயக இயக்கத்தை ஆதரிக்கும் நிலையில் இந்தியா இல்லை. இரு நாடுகளினதும் அரசாங்கங்களுக்கு இடையிலான உறவு இப்போது நாளுக்கு நாள் வளர்ந்து வருகின்றது.

இன்றைய இந்திய அரசாங்கத்துக்கும் அமெரிக்காவுக்குமிடையே நெருக்கமான நல்லுறவு நிலவுகின்றது. அமெரிக்காவும் ஐரோப்பிய யூனியன் நாடுகளும் மியன்மார் ஜனநாயக இயக்கத்துடனான ஒருமைப்பாட்டை வெளிப்படுத்தும் வகையில் மியன்மார் மீது பொருளாதாரத் தடை விதித்திருக்கின்றன. அமெரிக் காவுடனான உறவைப் பேணுகின்ற அதேவேளை மியன்மார் பற்றிய அமெரிக்க நிலைப்பாட்டுக்கு முரணான வகையிலேயே இந்தியா செயற்படுகின்றது.

இந்தியாவின் உள்துறை அமைச்சுச் செயலாளர் ஜீ.கே. பிள்ளை ஜனவரி மாதத்தில் மியன்மாருக்கு விஜயம் மேற்கொண்டார். மியன்மார் இராணுவ ஆட்சித் தலைவர் ஜெனரல் தான் ஷுவே (THAN SHWE) ஜுலை மாத இறுதி வாரத்தில் இந்தியாவுக்கு விஜயம் செய்தபோது இரு நாடுகளுக்கு மிடையே பல ஒப்பந்தங்கள் கைச் சாத்தாகின.

கைதிகள் மற்றும் தேடப் படுபவர்கள் பரிமாற்ற ஒப்பந்தமும் இதில் அடங்கும். இந்தியாவின் வட கிழக்கு மாநிலங்களில் பிரிவினை கோரிச் சில அமைப்புகள் கெரில்லா போராட்டத்தில் ஈடுபடுகின்றன.

இந்த அமைப்புகளைச் சேர்ந்த பலர் மியன்மாரின் எல்லைப் பகுதிகளைத் தங்கள் மறைவிடமாகக் கொண்டிருக்கின்ற னர். சிலர் பல்வேறு குற்றங்களுக்காக மியன்மார் சிறைகளில் உள்ளனர். இந்த ஒப்பந்தத்தின் கீழ் இவர்களைக் கையளிக்குமாறு இந்தியா கோரலாம்.

மியன்மார் ஆட்சியாளர்களுடன் நல்லுறவைப் பேணுவதற்கு இந்தியா முன்வந்ததற்கு இரண்டு விடயங்கள் பிரதான காரணமாக இருக்கின்றன. ஒன்று மியன்மாரில் சீனாவின் செல்வாக்கு. மற்றது வடகிழக்கு மாநிலங்களில் பிரிவினைப் போராட்டம்.

ஆரம்ப காலம் தொட்டு மியன்மாரின் தற்போதைய இராணுவ ஆட்சியாளருக்குச் சீனா ஆதரவளித்து வருகின்றது. இரு நாடுகளுக்குமிடையே வர்த்தக உறவு வளர்ந்து வருவதுடன் மியன்மாரில் சீனாவின் முதலீடுகளும் அதிகரித்துள்ளன. இந்த வளர்ச்சிப் போக்கு இந்தியாவின் பிராந்திய நோக்கத்துக்கு உவப்பானதாக இல்லை.

‘கிழக்கை நோக்கல்’ (Looking East) என்ற இந்தியாவின் கொள்கைக்குச் சீனா மியன்மாரில் காலூன்றுவது தடங்கலாகவே இருக்கும். பிராந்திய ஆதிக்கத்தை இலக்காகக் கொண்டு, கிழக்கேயுள்ள நாடுகளைத் தனது செல்வாக்குக்குள் கொண்டுவர விரும்பும் இந்தியா மியன்மாரில் சீனா ஏகபோகம் அனுபவிப்பதற்கு இடமளிக்கத் தயாராக இல்லை.

மேலும், அண்டை நாடுகளில் சீனாவின் செல்வாக்கு வலுவடைவது தனது பாதுப்புக்கு அச் சுறுத்தலாக இருக்குமென்பது இந்தியாவின் நிலைப்பாடு. மியன்மாரில் சீனாவுக்கு எவ்விதத்திலும் குறைவற்ற நிலையைப் பெறும் நோக்கத்தில் மியன்மார் அரசாங்கத்துக்குப் பல பொருளாதார உதவிகளை வழங்குவதற்கும் அங்கு முதலீடுகளைச் செய்வதற்கும் இந்தியா முன்வந்துள்ளது.

இந்தியாவின் வடகிழக்கு மாநிலங்க ளில் பிரிவினை கோருபவர்கள் நீண்டகாலமாகக் கெரில்லா போரில் ஈடுபட்டு வருகின்றார்கள். இந்தியாவுக்கும் மியன்மாருக்கும் இடையிலான 1640 கிலோ மீற்றர் நீளமான எல்லை வடகிழக்கு மாநிலங்களையே அண்டியிருக்கின்றது.

வடகிழக்கு மாநிலங்களில் தாக்குதல் நடத்தும் கெரில்லாப் போராளிகள் அடிக்கடி மியன்மார் பிரதேசத் துக்குள் தப்பிச் சென்று மறைந்து விடு கின்றனர். சில தாக்குதல்களும் அங்கிருந்தே திட்டமிடப்படுகின்றன. மியன்மாருடன் நல்லுறவை வளர்ப்பது வட கிழக்குப் பிரிவினைவாதிகளைக் கட்டுப்படுத்துவதற்குச் சாதகமான சூழ்நிலையைத் தோற்றுவிக்கும்.

மியன்மார் ஜனநாயக இயக்கத்துக்கு அளித்துவந்த ஆதரவை விலக்கிக் கொண்டு, பாதுகாப்பு மற்றும் பிராந்திய அதிகாரம் போன்ற காரணங்களுக்காக மியன்மார் இராணுவ ஆட்சியாளர்களுடன் நட்புறவை வளர்க்கும் நடைமுறை பார திய ஜனதா கட்சியின் ஆட்சிக் காலத்திலேயே இந்தியாவில் ஆரம்பித்து விட்டது.

பாரதிய ஜனதா கட்சி அரசாங்கத்தின் பாதுகாப்பு அமைச்சர் ஜோர்ஜ் பெர்னாண்டஸ் மியன்மார் ஜனநாயக இயக்கத்தின் தீவிர ஆதரவாளர். அவரது உத்தியோகபூர்வ வாசஸ்தலம் மியன்மாரிலிருந்து வெளியேற்றப் பட்டவர்களான ஜனநாயக இயக்க மாணவர்களின் உத்தியோகப் பற்றற்ற தலைமையகமாக விளங்கியது.

இந்தக் காலகட்டத்திலேயே அன்றைய வெளிவிவகார அமைச்சர் ஜஷ்வந்த் சிங் 2001 ஆம் ஆண்டிலும் 2002 ஆம் ஆண்டிலும் மியன் மாருக்கு விஜயம் மேற் கொண்டு இராணுவ ஆட் சியாளர்களுடனான நல்லுறவுக்கு வித்திட்டார். பாதுகாப்பு அமைச்சரின் நிலைப்பாட்டை வாஜ்பாய் அரசாங்கம் பொருட்படுத்தவில்லை.

“இந்தியா அயல் நாடுகளுக்கு ஜனநாயகத்தை ஏற்றுமதி செய்ய முடியாது. அந்நாடுகளின் அரசாங்கங்கள் எவ்வாறாக உள்ளனவோ அந்த நிலையிலேயே அவற்றுடன் தொட ர்புகளைப் பேண வேண் டும்”. இது இந்தியாவின் இன்றைய நிதியமைச்சர் பிரனாப் முகர்ஜி வெளி விவகார அமைச்சராக 2006 ஆம் ஆண்டு கூறிய கூற்று, இந்தியாவின் நிலைப்பாட்டை இக்கூற்று சரியாக வெளிப்படுத்து கின்றது.