இப்படியும் செய்திகள்

உற்பத்திப் பொருட்கள் மாத்திரமன்றி சீனாவில் சான்றிதழ்களும் பெருமளவில் போலி!

சீனாவில் போலிப் பொருட்களின் நடமாட்டம் அதிகமாக உள்ளது. திருட்டுப் பொருட்கள் விற்பனை சகஜமாகி வருகிறது என சீன மக்கள் வெளிப்படையாகத் தெரிவித்துள்ளனர். பீஜிங்கில் நடத்தப்பட்ட கருத்துக் கணிப்பில் இது தெரியவந்துள்ளது. சர்வதேச அளவில் பொருளாதார வளர்ச்சியில் ஆதிக்க சக்தியாக விளங்க வேண்டுமென சீனா பகீரத பிரயத்தனம் செய்து வருகிறது. பொருளாதார முன்னேற்றத்தை நோக்கிச் செல்லும் அதே வேளையில், பிரபலமாக உள்ள வர்த்தகப் பொருட்களை போன்று அச்சு அசலாக போலிப் பொருட்களை தயாரிப்பதும், திருட்டு வீடியோ, கள்ளத்தனமாக புத்தகங்களை வெளியிட்டு கொள்ளை இலாபம் பார்க்கும் கூட்டம் ஒரு பக்கம் அதிகரித்து வருகிறது.

எது நல்ல பொருள், எது போலி என்று சொல்ல முடியாத அளவிற்கு சீனாவில் வியாபாரம் பெருகி வருகிறது. இந்த திருட்டு மோசடி வர்த்தகத்தில் மட்டுமல்லாது வேலை வாய்ப்பு, போலிச் சான்றிதழ்கள் தயாரிப்பு வரை போய் நிற்கிறது.

சீனாவில் சமீபத்தில் நடந்த விமான விபத்து பற்றி விசாரணை நடத்திய போது, பல திடுக்கிடும் தகவல்கள் வெளிவந்தன. ஷென் ஜென் ஏர் - லைன்ஸ் விமான நிலையத்தில் 200 விமானிகள் போலியான சான்றிதழ்களை கொடுத்து வேலைக்கு சேர்ந்துள்ளமை தெரியவந்துள்ளது.

இந்நிலையில் சீனாவில் இளைஞர்களுக்காக வெளிவரும் நாளிதழ் ஒன்று, போலிப் பொருட்கள் நடமாட்டம் குறித்தும், அதிகரித்துவரும் மோசடி சம்பவங்கள் குறித்தும் ஒன் - லைனில் ஆய்வு ஒன்றை நடத்தியது. இதில் 1365 பேர் பங்கேற்றனர். இவர்களில் 99.5 சதவீதம் பேர், தினந்தோறும் மோசடிகளை சந்தித்து வருவதாகவும், தாங்கள் வாங்கிய பொருட்கள் அனைத்தும் போலியாக இருப்பதைக் கண்டு அதிர்ச்சியடைந்ததாகவும் தெரிவித்துள்ளனர். 70 சதவீதம் பேர், தாங்கள் வாங்கிய புத்தகங்கள், ‘சிடி’க்கள், பாடப் புத்தகங்கள் போலியாக இருந்தது கண்டு அதிர்ச்சியடைந்ததாகவும் தெரிவித்துள்ளனர்.

பொருளாதாரத்தை மேம்படுத்துவதில் அரசு தீவிர முனைப்பு காட்டுவதில், அதைப் பயன்படுத்தி சிலர் கொள்ளை இலாபம் சம்பாதிக்கும் நோக்கில் இப்படி மோசடியில் ஈடுபடுகின்றனர் என கல்லூரி பேராசிரியர் ஒருவர் கூறினார். பொருட்கள் தயாரிப்பில் மட்டும் போலி இல்லை. வேலை கேட்டு வரும் விண்ணப்பங்களில் அன்றாடம் 10 சதவீதத்திற்கு மேல் போலியானவை என ஐ. டி. நிறுவன வல்லுனரான ரிச்சர்ட் பென்ஸ்பெர்க் கூறினார். மற்றவர்களின் சுயவிபரக் கோவையை திருடி அதை மாற்றி விண்ணப்பிக்கின்றனர் என்றார் அவர்.

இந்த மோசடிகளை கண்டுபிடித்து ஒழிக்க வேண்டிய பொறுப்பு அரசுக்கு உள்ளது. இதற்கு ஏற்ற வகையில் புலனாய்வு அமைப்புகளை அரசு பலப் படுத்த வேண்டும் என கருத்துக் கணிப்பில் பங்கேற்றவர்கள் கூறியுள்ளனர்.