கடற் தொழிலில்

40 குதிரை வலு மீன்பிடி படகுகள் மீதான தடை நீக்கம்

40 குதிரை வலு கொண்ட இயந்திரம் பொருத்தப்பட்ட படகுகளுக்கு விதிக்கப்பட்டிருந்த தடையை அரசாங்கம் நீக்கியுள்ளது. அத்துடன் இந்திய மீனவர்களின் அத்துமீறிய பிரவேசம், தடை செய்யப்பட்ட மீன் பிடிப் படகுகளின் பாவனைகளைத் தடுப்பது தொடர்பில் இந்திய அரசாங்கத்துடன் பேச்சுவார்த்தை நடத்தி உரிய தீர்வு பெறவும் தீர்மானிக்கப்பட்டுள்ளது.

கடற்றொழில் நீரியல் வள அபிவிருத்தி அமைச்சர் ராஜித சேனாரத்னவிற்கும் தேசிய பாதுகாப்பு அமைச்சின் செயலாளர் கோதாபய ராஜபக்ஷவிற்குமிடையிலான பேச்சுவார்த்தையின் போதே மேற்படி தீர்மானங்கள் எடுக்கப்பட்டுள்ளன.

கடந்த சில வருடங்களாக பாதுகாப்பு காரணங்களுக்காக 40 குதிரை வலு என்ஜின் படகுகளின் உபயோகத்திற்கு அரசாங்கம் தடை விதித்திருந்தது. குறிப்பாக வடக்கு, கிழக்கு மாகாணங்களில் விடுதலைப் புலிகளின் செயற்பாடு களையடுத்து மேற்படி படகுகளுக்கான தடையை பாதுகாப்பு அமைச்சு முழுமையாக அமுல்படுத்தியிருந்தது.

இதற்கிணங்க கடந்த காலங்களில் 40 குதிரை வலு என்ஜின் படகுகள் 141 ஐ பாதுகாப்புப் படையினர் கைப்பற்றியிருந்தனர். தற்போது பயங்கரவாதம் ஒழிக்கப்பட்டு நாட்டில் சமாதானம் நிலவும் நிலையில் 40 குதிரை வலு என்ஜின் படகுகளை உபயோகிப்பதற்கான அனுமதியினை மீனவர்கள் கோரியிருந்தனர்.

இது தொடர்பில் அமைச்சர் ராஜித சேனாரத்ன அரசாங்கத்துடனும் பாதுகாப்பு அமைச்சுடனும் நடத்திய பேச்சுவார்த்தையின் பலனாக மேற்படி படகுக்கு விதிக்கப்பட்டிருந்த தடை நீக்கப்பட்டுள்ளது. இதற்கிணங்க தென் பகுதி மீனவர்கள் 40 குதிரை வலு என்ஜின்கள் பொருத்தப்பட்ட படகுகளை உபயோகிக்க அனுமதி வழங்கப்பட்டுள்ளதுடன் வடக்கு, கிழக்கு மீனவர்கள் 30 குதிரை வலு என்ஜின் படகுகளை உபயோகிக்கவும் அனுமதி வழங்கப்பட்டுள்ளது.

இதனையடுத்து கைப்பற்றப்பட்டு பாதுகாக்கப்பட்டிருந்த 40 குதிரை வலு என்ஜின் பொருத்தப்பட்ட 141 மீன் பிடிப் படகுகளையும் பாதுகாப்பு அமைச்சு மீண்டும் கடற்றொழில் நீரியல் வள அபிவிருத்தி அமைச்சுக்குக் கைய ளித்துள்ளது.

அதேவேளை, அமைச்சர் ராஜித சேனாரத்னவுக்கும் பாதுகாப்பு அமைச்சின் செயலாளர் கோதாபய ராஜபக்ஷவிற்கு மிடையிலான பேச்சுவார்த்தையின் போது இந்திய மீனவரின் அத்து மீறிய செயற் பாடுகள், அவர்களின் தடை செய்யப்பட்ட படகுகளின் பாவனை தொடர்பிலும் கவனம் செலுத்தப்பட்டது. இச் செயற் பாடுகளைச் கட்டுப்படுத்தும் வகையில் இந்திய அரசாங்கத்துடன் பேச்சுவார்த்தை நடத்தி உரிய தீர்வினைப் பெற்றுக் கொள்ள உத்தேசித்துள்ளதாக கடற்றொழில் அமைச்சு தெரிவித்தது.