சந்தர்ப்பங்களைப் பயன்படுத்தி கிடைப்பதை பெற்றுக் கொள்ளுவோம்-அமைச்சர் டக்ளஸ்

நமக்கு கிடைக்கும் நல்ல சந்தர்ப்பங்களை பயன்படுத்தி கிடைப்பவற்றை பெற்றுக் கொள்ள வேண்டும் என்று பாரம்பரிய மற்றும் கைத்தொழில் அமைச்சர் டக்ளஸ் தேவானந்தா தெரிவித்துள்ளார். அரியாலை கிழக்கில் உள்ள வயல்நிலங்கள் 15 வருடங்களின் பின்னர் மக்களிடம் கையளிக்கப்பட்ட நிகழ்வில் கலந்து கொண்டு உரையாற்றும் பொழுதே அவர் இவ்வாறு தெரிவித்தார்.

அரியாலை கிழக்கில் குறித்த வயல்நிலங்கள் கையளிக்கப்படும் ஏர் பூட்டு விழா என்ற நிகழ்வு இன்று நடைபெற்றது. யாழ் மாவட்ட கமநல அபிவிருத்தித் திணைக்களத்தினரால் நடத்தப்பட்ட இந்த நிகழ்வில் மதகுருமார்களுடன் பாரம்பரிய கைத்தொழில் மற்றும் சிறுகைத்தொழில் அமைச்சர் டக்ளஸ் தேவானந்தா, வடமாகாண ஆளுநர் மேஜர் ஜென்ரல் சந்திரசிறி, யாழ் மாவட்ட நாடாளமன்ற உறுப்பினர் சந்திரகுமார் முருகேசு, யாழ் மாவட்ட கட்டளைத் தளபதி மகிந்தஹத்ருசிங்க, யாழ் மாவடட்ட அரச அதிபர் இமல்டா சுகுமார், விவசாய அமைச்சின் செயலாளரும் முன்னாள் அரச அதிபருமான பத்மநாதன் உள்ளிடப் பலர் கலந்து கொண்டார்கள்.

இந்த நிகழ்வில் பேசிய அமைச்சர் டக்களஸ் தேவானந்தா இன்று 400 ஏக்கர் வயல்காணிகள் மக்களிடம் கையளிக்கப்படுவதாக தெரிவித்தார். பாதுகாப்பு உறுதிப்படுத்தப்பட்டு இப்படி தொடர்ந்தும் காணிகள் மக்களிடம் கையளிக்கப்படும் என்றும் தெரிவித்தார். கிடைக்கும் நல்ல சந்தர்பங்களை சரியாகப் பயன்படுத்தி கிடைப்பவற்றை நாம் பெற்றுக் கொள்ள வேண்டும் என்று குறிப்பிட்டார்.

வடமாகாண ஆளுநர் சந்திரசிறி உரையாற்றுகையில் ஆசியாவில் ஆச்சரியம் மிக்க நாடாக இலங்கையை மாற்றும் ஜனாதிபதி அவர்களின் வடக்கின் வசந்தம் திட்டத்தில் நடைபெறும் மீள்குடியமர்வுகளில் இதுவும் ஒன்று என்று குறிப்பிட்டார். யாழ் மாவட்ட அரச அதிபர் இமல்டா சுகுமார் அவர்கள் அதி உத்தம ஜனாதிபதிக்கும் படையினருக்கும் அதிகாரிகளுக்கும் நன்றி தெரிவித்தார்.

யுத்த நடவடிக்கை காரணமாக கடந்த 15 வருடங்களாக இந்தப் பகுதியில் மக்கள் அனுமதிக்கப்படாத நிலையில் இன்றைய தினம் இப்பகுதி வயல்நிலங்கள் மக்களிடம் கையளிக்கப்பட்டன. சுமார் 400 ஏக்கர் காணிகள் கையளிக்கப்பட்டதுடன் உழவு இயந்திரங்கள், உரவகைகள், விதைநெல்லு என்பனவும் மக்களுக்கு வழங்கப்பட்டன.

நிகழ்வின் இறுதியில் அமைச்சர் டக்ளஸ் தேவானந்தா, வடமாகாண ஆளுநர், யாழ் மாவட்ட கட்டளைத்தளபதி மகிந்த ஹத்ருசிங்க, யாழ் மாவட்ட நாடாள மன்ற உறுப்பினர் சந்திரகுமார் முருகேசு, யாழ் மாவட்ட அரச அதிபர் இமல்டா சுகுமார் முதலியோர் ஏர் பிடித்து உழுது உழவை தொடங்கி வைத்தார்கள்