வேலூர் சிறைச்சாலையைச் சூழ நான்கு பாதுகாப்பு வளையங்கள்

ராஜீவ் காந்தி கொலை வழக்கின் எதிரிகள் மூவருக்கும் எதிர்வரும் 9 ஆம் திகதி நிறைவேற்றப்படவிருந்த மரணதண்டனையானது நீதிமன்ற உத்தரவின் பேரில் எட்டு வார காலத்துக்கு இடைநிறுத்தி வைக்கப்பட்டுள்ள அதேவேளை, மரணதண்டனைக் கைதிகளான முருகன், சாந்தன், பேரறிவாளன் ஆகிய மூவரும் சிறை வைக்கப்பட்டுள்ள வேலூர் மத்திய சிறைச்சாலையில் பலத்த பொலிஸ் காவல் போடப்பட்டுள்ளது. வேலூர் மத்திய சிறைச்சாலைக்கு நான்கு அடுக்கு பாதுகாப்பு போடப்பட்டுள்ளது.

ராஜீவ் கொலை வழக்கில், வேலூர் மத்திய ஆண்கள் சிறையில் அடைக்கப்பட்டுள்ள முருகன், சாந்தன், பேவரறிவாளனுக்கு, செப்டெம்பர் 9 இல் தூக்குத் தண்டனை நிறைவேற்ற நடவடிக்கை எடுக்கப்பட்டு வந்தது. இதை எதிர்த்து வழக்கறிஞர் ராம் ஜெத்மலனி, சென்னை மேல் நீதிமன்றில் மனு தாக்கல் செய்தார். இந்த மனு குறித்துநடந்த விசாரணையில் தூக்குத் தண்டனையை எட்டு வாரத்துக்கு நிறுத்தி வைத்து மேல் நீதிமன்றம் உத்தரவிட்டது.

ராஜீவ் கொலையாளிகளுக்கு தூக்குத் தண்டனை நிறைவேற்ற திகதி குறிக்கப்பட்ட உடனே, வேலூர் மத்திய சிறையில் மூன்றடுக்கு பாதுகாப்பு போடப்பட்டது. தற்போது, பாதுகாப்பை மேலும் பலப்படுத்தும்படி, உளவுத் துறையிடமி ருந்து வந்த தகவலையடுத்து, சிறைக்கு நான்கடுக்கு பாதுகாப்பு போடப்பட்டுள் ளது.

இதையடுத்து மூன்று பேர் இருக்கும் சிறைக்கு வெளியே, 50 சிறைக் காவலர்கள் நிறுத்தப்பட்டுள்ளனர். அப்பகுதி முழுவதும் கண்காணிக்க 30 சிறைக் காவலர்கள் நியமிக்கப்பட்டுள்ளனர்.

சிறையின் பிரதான வாயில் முன் 25 பொலிசார் நிறுத்தப்பட்டுள்ளனர்.

அவர்கள் சிறைக்குச் செல்லும் பார்வையாளர்கள் அனைவரையும், உலோக அறிகருவி கொண்டு சோதனை செய்த பின், உள்ளே செல்ல அனுமதிக்கின்றனர். இது தவிர சிறையில் முன் புறம் அதிரடிப் படை, ஆயுதப்படை பொலிசாரும், பாதுகாப்புப் பணியில் நிறுத்தப்பட்டுள்ளனர். சிறையைச் சுற்றிலும், 50 பொலிஸார் உள்ளனர். சிறை மதிலின் உயரம் அதிகரித்து. அதைச் சுற்றிலும் இரும்பு கம்பி வலை வைக்கப்பட்டுள்ளது. பாதுகாப்புப் பணியில் ஈடுபட்டுள்ள பொலிசாருக்கு, புகைப்படத்துடன் கூடிய அடையாள அட்டை வழங்கப் பட்டுள்ளது.