லிபியா பற்றி எரியும் வரை போராடுவதை நிறுத்த மாட்டேன் - கடாபி

“நாங்கள் பெண்கள் அல்ல. தொடர்ந்து லிபியாவில் போராட்டம் நடத்துவோம். லிபியா பற்றி எரியும் வரை போராட்டம் தொடரும்” என தலைமறைவாகியுள்ள முஅம்மர் கடாபி அறிவித்துள்ளார். சிரியாவில் இருந்து செயல்படும் கடாபி ஆதரவு, ‘அல் – ராய்’ தொலைக் காட்சியில் முஅம்மர் கடாபியின் உரை நேற்று முன்தினம் ஒளிபரப்பப்பட்டது. இதில் லிபியாவில் போராட்டம் தொடரும் என குறிப்பிட்டுள்ள கடாபி, வெளிநாட்டு படைகள் லிபியாவில் தொடர்ந்தும் தலையிட்டால் அவர்களுக்கு எதிராக கொரில்லா யுத்தம் முன்னெடுக்கப்படும் என எச்சரித்தார். முஅம்மர் கடாபியின் ஆட்சிக்கு 42 ஆண்டுகள் பூர்த்தியாகும் நிலையிலேயே அவர் இந்த உரையை வெளியிட்டுள்ளார். “எனது போராட்டத்தை கைவிடமாட்டேன். நான் சரணடைய மாட்டேன். நாங்கள் பெண்கள் அல்ல. தொடர்ந்து போராடுவேன்.

நாங்கள் ஒவ்வொரு நகரமாக ஒவ்வொரு பள்ளத்தாக்காகவும் தாக்குதல் நடத்துவோம். அவர்கள் லிபியாவை ஆட்சி செய்வதை அனுமதிக்க மாட்டோம். லிபியாவில் அவர்களை நிம்மதியாக இருக்க விடமாட்டோம். எமது நாட்டு கோத்திரத்தார் உங்களது ஆட்சியை ஏற்க மாட்டார்கள். அவர்கள் ஆயுதம் தாங்கிய வண்ணமே உள்ளனர்” என்று முஅம்மர் கடாபி குறிப்பிட்டுள்ளார்.

இதேவேளை, முஅம்மர் கடாபி இன்னும் லிபியாவிலேயே உள்ளதாக கிளர்ச்சிப் படை நம்பிக்கை தெரிவித்துள்ளது. எனினும் கடாபி இருப்பிடம் குறித்து முரணான தகவல்கள் வெளியிடப்பட்டுள்ளன. கடாபி திரிபோலிக்கு அண்மையிலுள்ள பாலைவன நகரொன்றில் அவரது மகன் சைப் அல் இஸ்லாம் மற்றும் உளவுத்துறை தலைவர் அப்துல்லா அல் அனூசியுடன் தலைமறைவாகியுள்ளதாக கிளர்ச்சிப் படையின் முக்கிய தளபதி ஒருவர் தெரிவித்துள்ளார்.

அதேபோன்று தேசிய மாற்ற கெளன்ஸிலின் திரிபோலிக்கான இணைப்பாளர் அப்துல் மஜீட் மிலெக்டா கூறும் போது, கடாபி திரிபோலிக்கு கிழக்காக 150 கிலோ மீற்றருக்கு அப்பால் உள்ள பனி வலித்தில் தலைமறைவாகியுள்ளதாக நம்பிக்கை தெரிவித்தார்.

பனி வலித்தில் லிபியாவில் பெரும்பான்மையாக கொண்ட வர்பலா கோத்திரத்தார் உள்ளனர். அத்துடன் அங்கு தான் கடாபியின் கோத்திரங்களுக்கான இணைப்பாளர் அலி அல் அஹ்வாலும் உள்ளார். எனவே கடாபி அங்கே இருப்பதற்கு அதிக வாய்ப்பு உள்ளதாக மிலெக்டார் குறிப்பிட்டார்.

இதேவேளை, முஅம்மர் கடாபி அல்ஜீரியா எல்லைப் புற நகரான கடாபி மிஸ்ஸில் தங்கியுள்ளதாக அல்ஜீரிய பத்திரிகை ஒன்று செய்தி வெளி யிட்டுள்ளது. அத்துடன் அவர் அல்ஜீரியாவில் தஞ்சம் புகவும் அந்நாட்டு ஜனாதிபதி அப்துல் அஸ் பெளத்பிகாவிடம் கோரிக்கை விடுத்து ள்ளதாகவும் அந்த செய்தியில் குறிப்பிடப் பட்டுள்ளது.

இதேவேளை, கடாபி ஆதரவுப் படை சரணடைவதற்கான காலக்கெடுவை கிளர்ச்சிப்படையின் தேசிய மாற்ற கெளன்ஸில் நீட்டித்துள்ளது. லிபியாவில் தொடர்ந்து மோதல்களை தவிர்க்கும் நோக்கிலேயே இந்த முடிவு எடுக்கப்பட்டதாக மாற்ற கெளன்ஸில் குறிப்பிட்டுள்ளது. முன்னதாக இந்த காலக்கெடு இன்றைய தினத்துடன் முடிவடைய விருந்தமை குறிப்பிடத்தக்கது.

இதனிடையே லிபியாவில் மேலும் 18 மாதங்களுக்குள் தேர்தல் நடத்தப்பட்டு புதிய அரசியலமைப்பு உருவாக்கப் படும் என தேசிய மாற்ற கெளன்ஸில் தலைவர் முஸ்தபா அப்தல் ஜலீல் உறுதியளித்தார். பிரான்ஸில் நடைபெற்ற லிபிய எதிர்காலம் குறித்த மாநாட்டிலேயே அப்தல் ஜலீல் இந்த அறிவிப்பை வெளியிட்டார்.

63 நாடுகள் மற்றும் சர்வதேச அளவில் முக்கிய அமைப்புகள் பங்கேற்ற இந்த மாநாட்டில் லிபியா தொடர்பில் பல முக்கிய தீர்மானங்கள் நிறைவேற்றப்ப ட்டன.